السلام عليكم ورحمة الله وبركاته
مساء الفل ياشباب زى الفل
انا أخوكم الكبير فى السن وعايز احكى لكم عن تجربتى مع العاده السريه\وطبعا ده كان زمان
بصراحه كده الصحه كانت مساعده ( يعنى ماكنتش حاسس انى خسران حاجه ادين باتسلى ) وكنت فاكر انى بابسط نفسى وباعيش شبابى
وكان كل ما ضميرى يلتهب حبتين اهرش فيه واقول له يعنى انا حاعمل ايه انا عندى طاقه وعندى رغبه ومش عارف حاتجوز امتى ( جوزونى وانا ابطل )

ولكن انا كان عندى ميزه والحمد لله هى انى غاوى قراءه وكمان باحافظ على الصلاه ومن حين لآخر باصلى لما الاقى نفسى قريب من المسجد والآذان يؤذن بانكسف وادخل اصلى جماعه وفى بعض المرات كنت بالاقى درس بعد الصلاه لما مايكونش ورايا حاجه كنت باسمع ( مانا برضه مش خسران حاجه )
وفى مره سمعت حديث الرسول عليه الصلاة والسلام ( نعمتان مفتون فيهما الانسان الصحه والفراغ ) ساعتها ما اتأثرتش بالحديث ولكنه اتخزن فى عقلى و استفدت منه كتير بعد كده

ومره تانيه واحد شيخ ربنا يكرمه فال حاجه جميله اوى وكان بيتكلم عن سيرة الصحابه والصالحين وبعد ماحكى لينا بعض الحكايات عهم واللى تثبت اللى قاله قال ( ان غض البصر يزيد من فحولة الرجل ) ايه فحوله؟ايه؟ الكلمه دى كان ليها معايا مفعول السحر

لان مين من الشباب مايتمناش انه يكون فحل الفحول؟
مين من الشباب ما عندهوش استعداد يعمل اى حاجه علشان يزود فحولته؟
ولما يكون الثمن هو غض البصر دى تبقى حاجه سهله اوى ( انا كنت فاكر انها سهله )
ولكن لقيت نفسى مش قادر اغض بصرى المهم انا كنت قولتلكم انى غاوى قراءه وده خلانى عندى حاجه كويسه قوى وهى انى باتكلم مع نفسىي يعنى فيه لغة حوار بينى وبين نفسى ودى على فكره حاجه سهله قوى وموجوده عندنا

كلنا لكن الشيطان الرجيم اللعين والعياذ بالله قاعدلنا دايما فى الحته دى كل مانيجى نتكلم مع نفسنا شويه علشان نعرف احنا رايحين فين وجايين منين يخطف منها السماعه ويقعد يرغى معانا فى الهجايص علشان الصوره ماتبقاش واضحه قدامنا ويفضل راكبنا ومدلدل رجليه وساحبنا واحنا متغميين
المهم ومن خلال الخلفيات اللى قلتهالكم انا قعدت مره قعدة صفا مع نفسى ولكن بصدق
-موش قاعده من بتوع صدقيني- وسالت نفسى شوية اسئله
س:انا ليه بامارس العاده السريه؟
ج:فكرت كتير فى الاجابه لقيت انى كنت باعمل كده فى الاول علشان اطمئن على فحولتى -انا راجل ولا لا- شوفتو الخيبه- قال يعنى اللى بيمارس العاده السريه اكتلر يبقى سيد الرجاله-
انا كنت فاهم كده كنت صغير معلهش وبعدين تحول الموضوع معايا الى ادمان

س:بس انا لو ما مارستش العاده باتعب قوى بيحصللى احتقان فى البروستاتا اعمل ايه؟
ج:الاجابه على السؤال ده اخدت منى وقت وتفكير كتير ووصلت الى الحقيقه الآتيه
شوف يا عم الدكاتره انت اللى بتبص على المزز وبتبص بذمه وتقعد تسرح بخيالك يعنى انت اللى بتجيبه لنفسك يعنى لو ما تبصش موش حتتعب ولا احتقان ولا كتمان من الاول خليك فى الامان

س:ماشى ياعم المؤدب انا برضه ماقدرش مابصش عندك حل تانى؟
ج: بصراحه لا بس ان كان ولا بد بص بس ما تسرحش قوى
وخلصت القاعده على مافيش كل اللى وصلتله انا ابتديت ليه امارس العاده العبيطه دى بس وده يفيد بايه دلوقت ماللى حصل حصل
المهم بعد كده قريت عن حاجه مهمه فوى اسمها الطاقه الايجابيه والطاقه السلبيه عند الانسان
ودى هى اللى نفعتنى قوى
بيقولك يا سيدى ان الواحد لما يعمل عمل ايجابى يعنى عمل خير لاى حد او خير لنفسه ده يزود عنده الطاقه الايجابيه اللى تخليه يتصرف تصرفات ايجابيه ويبعد عن السلوكيات السلبيه والعكس صحيح كل ما الواحد يعمل تصرف سلبى ده يخليه ( يشعر بالدونيه ) يعنى يحس انه اقل من غيره وده يزود الطاقه السلبيه عنده ويخليه يعمل اى حاجه بسهوله من غير ما يقول لنفسه لا لان خلاص اللى حصل حصل زى ماتقول كده كان مفرش ابيض وجميل وقعت عليه نقطة حبر وموش حتفرق بعد كده لو حتى كبيت عليه ولا مؤاخذه لبن
المهم ياشباب انا اهتميت بالموضوع وبقى كل همى انى اتصرف تصرفات ايجابيه كتير مهما كانت بسيطه وفعلا لقيت نتيجه ولكن بعد مده من الاصرار والمواظبه لدرجة انى فى مره لقيت نفسى باقول لنفسى ماتيجى النهارده مانبصش على جسم البنات تعالى نبص على الوجوه الجميله والعيون الكحيله وفعلا عملت كده وواحده واحده لقيت نفسى باشوف فى المراه حاجات اجمل بكتير من اللى بالى بالك لدرجة انى بقي يعجبنى فى بعض البنات الحشمه والعفه والادب سبحان مغير الاحوال
نسيت اقول لكم ان الرغبه فى ممارسة العاده السريه كانت بتشاغلنى من حين لآخر ولكنى استعنت بخير معين وهو الله سبحانه وتعالى وبقيت اواظب على قراءة القرآن كل يوم ولو حتى الفاتحه وده نفعنى جدا وكل ما حرارتى تعلى شويه بفعل عوامل التعريه آخد دش بارد حتى ولو فى الشاء - بس من غير شقاوه
المهم ياشباب عايز اوصيكم بشوية ايجابيه وشوية عزيمه
ايوه عزيمه -انا عارف انها كلمه دمها تقيل ولكنى اكتشفت متاخر ان هى دى الرجوله الحقيقيه ان يبقى عندك عزيمه
وربنا يحفظكم من كل سوء ويخليكم لبلدكم الى محتاجاكم قوى اليومين دول :
وسبحان الله والحمد لله والله أكبر