رحت ومن قبل ميعادك استنيت

ياقطر جه ميعادك ولا انت جيت

ياترى انت قريب ولا بعيد

فرحنى بوصولك ياابو قلب حديد

وهاتلى الاخبار من الحبيب

بينى وبينه مشوار بعيد

ياقطر تعالى بريحه الصعيد


ناس كتير ولحم فوق لحم

بدلوك بالبنزين بدال الفحم

ولسه مش باين عليك التجديد

قرب سمعنى زمارتك العاليه

وقربنى من الناس الغاليه

ده ساعه وصولهم هنا عيد


قطر داخل و قطرخارج ورا بعض

ناس بتقابل وناس بتودع بعض

وناس غلابه شغاله فى المحطه

شيال اتقطع نفسه من تقل الشنطه

وكمثرى وسواق مروح لعياله سعيد


وزماره جايه من هناك طويله

يلا اشتقنالك ياابو قلب حديد