بالعامّى الفصيح
كلام بسيط
واضح وصريح
من غير تلميح
ولا تجريح
منا قولت صريح
يعنى مريح
اسمع منى وراح
تستريح..........

بالعامّى الفصيح (1)

ست الحبايب يا حبيبة


ست الحبااااااااااااااااايب يا حبيبة تيرارار يا اغلى من روحى ودمى تيرارا يا حنينة وكلك طيبة يارب يخليكى يا أمى

من اول ما صحيت والاغنية دى بتطادرنى كل ما اروح حتة اسمعها لدرجة انى فكرت امشى واسيبلها البيت

آآآآآآآه لا وكمان بتفكر الحاجة والدتى انى معبرتهاش ولا حتى بقلم رصاص

وتدراكاً للموقف وحقناً للخناق وإمداداً للوفاق بينى وبين الحاجة والدتى

جيت جنبها وبكل حنية لا تفتقر الى الكثير من الخبث الذى لا يخفى على من ربتنى وقولتلها :

كل سنة وانتى طيبة ياست الكل والسنة الجاية تبقى عند الكعبة المشرفة قولى آآمين

ردت الغالية بهدوء: آآمين

واوعى تفتكرى يا ماما انى نسيتك ومجبتش الهدية زى كل سنة لالالالا اووووعى تفكرى ف كدا لحظة واحدة

انا بس يا حبيبتى عرفت انه بدعة وقولت مينفعش نحتفل بيه زى الاجانب لانه حراااااام

وكمان انتى مسمعتيش الشيخ ف الخطبة امبارح دا مشدد جااااااامد جدا ع الحكاية دى

غير كدا يا امى انا لو اطول كنت جبتلك الدنيا دى واحطهالك تحت رجلك يا ست الكل


وبعد ما خلصت وصلة الحنية المزعومة ...... بصتلى الغالية بمنتهى الحنية برضو وقالتلى:

انتى فاكرة يا زوزو ال 100 جنيه اللى اخدتيها ف عيد ميلادك ؟

ايوة طبعا يا ماما ودى حاجة تتنسى

طب يا قلبى انا عرفت ان اعياد الميلاد بدعة وعشان كدا بقول انك تقومى تجيبهالى ونجيب

بيها هدايا للولاد المحتاجين احسن واهى تكون صدقة جارية علشان ربنا يباركلنا يا حبيبتى


كدااااا يا ماما حاضر يا حبيبتى وانا اقدر اقول لا دا حتى النهاردة عيد الام