هاى يا بمباويات ازيكوا .. انا بقى انهارده عاوزه اكلمكوا عن موضوع يخصنا ويخص الناشفين كمان ... ركزوا معايا

مين فينا بتحلم بالعريس .. الفارس اللى هيجى ياخدها على الحصان الابيض ؟؟..بتحلم ومامتها كمان بتحلم معاها
لدرجه انها ما ينفعش تخرج من بيتهم الا وهى على سنجه عشره زى ما اومر مامتها ما بتقول حتى لو خارجه تجيب حاجه من عند البقال اللى قدامهم لازم تبقى خارجه وهى ما فيهاش هفوه يمكن يمكن عريس يشوفها ويعجب بيها وما يبقاش فى تصرفاتها غلطه كلام كتير ممنوع .. ضحك ممنوع .. تتصرفى على طبيعتك ممنوع طبعا وده كله وانتى خارجه رايحه شغلك او جامعتك او خارجه مع مامتك فى مشوار والاهم هى المشواير دى طبعا يمكن تقابل حد من صحابتها يشوفك يعجب بيكى ولا يجى عن طريقه العريس برده ... كل الطرق متاحه عشان العريس

الجزء اللى يضحك بقى وده خاص بالناشفين ... هنفترض ان عريس شافك واعجب بيكى وراح لغايه البيت يقابل والدك ووالدتك اللى رحبوا بيه اخر ترحيب وشالوه فوق دماغهم وبعد كده مشى وما رجعش ولا ردش واكتشفتى بعد كده انه بيلف يشوف بنات تانيه ... ويقول البنات كتير مفيش اكتر منهم اشوف كل اللى يعجبنى واختار الاحلى والاجمل والاظرف اللى فيها كل المميزات ويفضل يشوف بنات لدرجه ان ممكن توصل لغايه صاحبتك الانتيم ويشوفها هى كمان وتيجى تلاقيها بتقولك مش جالى عريس فلان الفلانى ويمكن فى الاخر تتخطبله وتتحطم البنت الاولانيه اللى مالقيتش فى نفسها عيب عشان يمشى ويروح لغيرها .... ويمكن يرجع للبنوته الاولانيه ويبقى عاوز يخطبها طب هى فى الحاله دى تعمل ايه مش هتحس انه جرح كرامتها حتى لو فى الاخر اختارها هى ... كان لازم يلف على البنات يعنى عشان يختارها هى فى الاخر ولا يختار غيرها

الموقف ده حصل لناس كتير جدا حواليا ... تقريبا بقى يحصل عالطول طب ليه ...ان العريس يروح لكذا واحده وينقى مهى البنات كتير ومش خسران حاجه .... طب ليه بيحصل كده فى وجهة نظركوا وهل حصل مع حد كده وهل الناشفين لهم وجهة نظر فى الموضوع او حصل مع حد منهم كده

ياريت يا جماعه تقولولى رايكوا بكل صراحه فى الموضوع ده