الدكتور "محمد أبو الغيط"
الأستاذ بكلية الطب جامعة القاهرة
وسكرتير عام الجمعية المصرية
الطبية لدراسة السمنة..







مشكلتي في الحياة السمنة وعقدتي الدائمة في المدرسة وفي الجامعه لدرجة أن الموضوع سبب لي "اكتئاب"، وأصبحت أتجنب الناس خوفاً من نظراتهم التي كانت تؤلمني كثيراً، فقررت أن أخسر وزني، وفعلاً بدأت أحقق جزءاً من هدفي وإن شاء الله هاوصل... عندي تحدٍ كبير بيشجعني لكن نفسي أعرف لو نفسي أرتاح شوية من الريجيم وأكمل بعدين.. ازاي أحافظ على وزني، ولما أخس إيه طريقة التثبيت؟

نوران


التثبيت هو ببساطة أن نحصل على سعرات توازي المجهود المبذول يومياً وأن نراقب ما نأكله بعد التوقف عن الريجيم وأراقب وزني كل فترة ومن المفترض خلال فترة الريجيم أتعلم طريقة الأكل الصح وأعود نفسي عليه ويبقي ده أسلوب حياتي على طول.. صحيح مش معقول أعيش طول حياتي أعمل ريجيم أو أتابع مع دكتور أو ماشي بورقة ريجيم..!! والحل في التثبيت لو عاوز أكتفي بهذا القدر أو زهقت ونفسي أتوقف وأكمل بعدين..

فيه أكتر من شكل للتثبيت إما أقلل كميات أكلي يعني آكل كل حاجة لكن بكميات أقل وطبعا أكل معتدل قليل الدسم مع الرياضة اليومية المتاحة حسب إمكانياتي والمتاح أمامي مشي.. طلوع السلم.. العجلة.. الجيم.. السباحة.

الطريقة التانية أعمل توازن لو يوم خرجت مع أصحابي وهاخد راحتي في الأكل اليوم اللي بعده أمشي على دايت لو لخبطت في الأكل يومين، اليومين اللي بعدهم أعملهم دايت.. وهكذا..

المهم أوزن نفسي على الأقل مرة كل أسبوع عشان لو لقيت نفسي وزني زاد أقلل في الوجبات الحرة خلال الأسبوع لو محدد ثلاث وجبات في الأسبوع أقللهم لوجبة واحدة أو اتنين لو بدأت آكل قطعتين شيكولاته في اليوم أخليهم قطعة واحدة كل يومين وهكذا... لو لقيت نفسي نازل على الميزان ممكن أزود شوية الحاجات اللي بحبها ولكن بحدود

مهم جداً مراقبة الوزن عشان ممكن الكيلو يجر كيلو ومن غير ما تشعر هاترجع اللي نقصته بسرعة.

لابد أن نأخذ في الاعتبار أن التثبيت بيختلف من شخص لآخر حسب طبيعة النشاط وكمان طبيعة حالتي المزاجية فيه ناس بتحب تاكل لما تشبع في هذه الحالة عند التثبيت أكتر من الأكل اللي بيشعرني بالامتلاء زي السلطة والفاكهة أكتر من الأنواع الاخرى لو بحب الحلويات أقلل من الكميات عشان أحصل على قطعة شيكولاته وهكذا بعد فترة كل واحد بيعرف طبيعة جسمه واستجاباته والفيصل وزني على الميزان.

في معظم الحالات وإن كان لا يمكن التعميم لو أخذنا وجبة فاكهة في اليوم ويفضل أن تكون في العشاء ونمشي ألف خطوة في اليوم (ساعة ونص) يومياً مش لازم مستمرة ويمكن أن تكون متقطعة عادة نقدر نحافظ على وزننا بسهولة.

أنا وزني عامل لي مشكلة جامدة جداً.. وفعلاً بعمل ريجيم وأخس عليه خمسة كيلو مثلاً وبمجرد لما أتوقف أرجع أزيد عشرة كيلو مش عارف أعمل إيه؟

إيهاب

الرجوع إلى الوزن السابق بسرعة هائلة ويصبح الوزن أكثر من الأول مشكلة تواجه كل اللي بيعملوا ريجيم من أجل هدف وقتي أو لأسباب خاصة زي اجتياز امتحان أو مقابلة عمل أو حضور مناسبة بمجرد تحقيق الهدف تتنهي علاقاتنا بتنظيم نوعية الأكل وللأسف أغلب المرضى لا يرغب أن يتحول الريجيم إلى نظام للحياة في المستقبل.

المشكلة أننا نمارس عادات سيئة في الأكل طول الوقت ولما بنعمل ريجيم بنوقفها وبمجرد ما نتوقف عن الريجيم بنرجع مرة تانية لكل عاداتنا الغذائية السيئة ونعوض أيام الحرمان بأكل كميات هائلة من كل حاجة كنا محرومين منها وقت الريجيم وخاصة لو أهملنا تثبيت الوزن وبصراحة خسارة التعب اللي راح على الفاضي... وهو ده سبب إننا بنرجع بسرعة وأكتر من الأول يعني لو خسرنا خمسة كيلو ممكن نرجعهم عشرة لو لم نثبت الوزن..