البنت زعقت صرخت

هافضل لإمتى مشرنقة . . ؟

هاخرج ولو للمشنقة ..

ياأما إفهمينى وإنطقى ..

ياأما إشرحى ..

قولى ياأمى ووضحى ..

هى السدود ملهاش ضحية غير كيانى المستحى ؟

القطر فات .. القطر فات
ولإمتى راح نفضل بنات .. ؟

العمر باين راح . .

وخلاص أنا برتاح

وبكل غلب وهم ..!

ردت عليها الأم ..!

مبلاش يا بت نواح

فيه عندنا زوار ..!

جايين يطفوا النار

ومنهم المنظور .. اللى معاه النور ..

ليلك هيبقى نهار

جاى النهاردة خلاص

وأنا قلبى له مرتاح

وهناك شجر وورود .. ده هناك فرح معقود

مبلاش يابت نواح

أنا خايفة يأما القطر .. يبعد وينسانى

وأشوف سنين العمر .. بتعدى فى ثوانى

معقول هشوف الفرحة .. ؟

معقولة هلبس طرحة .. ؟

أمانا يا أما تشرحـى .. قولى يا أمى ووضحى

هى السدود فتحت بيبان .. ؟

والقطر منها جه وبان .. ؟

وخلاص هودع اللى كان .. ؟

وأحس تانى بالأمان .. ؟

مفيش دموع مفيش جراح

مفيش ياأمى خلاص نواح

قومي يا أمي وإفرحي

القطر جاى لمطرحي

بأمر الله في يوم موصول

والعفا أحسن دوا

واللي صبر هاينول

اللي صبر هاينول