السلام عليكم ورحمه الله وبركاته

النهارده حبيت اجيبلكم فكره جديده على قديمه معرفتش انام بسببها

قهوه المعاشات

هتكلم عن اتنين اصحاب كبار السن سمعهم تقيل شويه فى حوار لذيذ دار بيهم

على قهوه المعاشات


عم سعيد السلام عليكم ازيك يا عم حسين

عم حسين انا فين؟ ياعم ارمى السلام انا هنا من بدرى

عم سعيد قدرى . لا والله مشوفتهوش

عم حسين فنكوش اى ياراجل اكبر بقى عيالك عجزو
بس جميل اوى الجاكت

عم سعيد ساكت؟ مانا بكلمك هو انت نايم

عم حسين على رأيك البلد اتملت بهايم
لكن انتلابس ومتشيك كده ليه؟

عم سعيد ايه؟ جوزت بنتك مسعده؟
طيب ياراجل كنت تقول

عم حسين لأ جوزتها للواد بهلول

عم سعيد افطر انت الفول بيتعبلى القولون

عم حسين وكمان طلعوا فى التلفزيون

عم سعيد مليون وشويه كمان جوازت البنات بتكلف

عم حسين كمان هيا لحقت تخلف؟



عرفه القهوجى ياعم حسين يا عم سعيد تشربوا ايه بقالى ساعه بنده

عم سعيد موزه معديه جامده؟
يابنى احنا كبرنا على الكلام ده

عرفه القهوجى انا بقول تشربوا ايه

عم حسين قوم بينا يا حاج سعيد
اصل البعيد عرفه غبى ومبيسمعش





وده كان الحوار اللى دار بينهم وخدوا بعض وقاموا يتمشوا


على قهوه المعاشات هتلاقى ناس مسنين

هتلاقى مدير سابق وهتلاقى ناس غلبانين

كلهم قاعدين من صباحيه ربنا

بنظرات كسرتها الشيخوخه

وملامح اكلتها الآيام والسنين

وظهر انحنى شال ياما احمال كتير

ده كان مزارع وده كان صنايعى وده كان غفير

تحس انهم قاعدين مستنيين

امبارح ودعوا صاحبهم

تاترى الدور على مين

اللى ادى فى الحياه رسالته

واللى عاش فى خيبته حزين

واللى حفيده تحت رجله بيشده

هات ربع جنيه يا جدو

واللى الزمان هدو

ومش عارف هو مين

وناس عيالهم رموهم وعاشوا منسيين

ضيعوا عليهم شبابهم

وردلهم الجميل بعقوق الوالدين


وتفضل الحكايه عايشه

ليوم ما يموت صاحبها

وتفضل القهوه شاهده ليوم الدين






اتمنى تكون عجبتكم

مش عايز مجامله