مش عارف ليه عايز النهارده اتكلم عن السلام النفسي للبشر

ناس كتير اوي كارهين نفسهم وعيشتهم

وناس تانيين عايشيين بس عمرهم ما شافوا نفسهم ولا حاولوا يتفاهموا معاها

اما بقى الناس التالتين فدول ياما قابلوا نفسهم واتفقوا او على الاقل وصلوا لحل وسط

الدعوه النهارده لاخرج العقد المكبوته ولان كل عقده وليها حل فانا هناقش مع نفسي حل مشكله مطلعه عيني ومن غير اي كسوف

كلمتها في التليفون وحاولت اتقابل معاها


انـــــــــا:آلو
نفسي:يوه هو انت تاني؟ يابني انا بقالي كتير مسترحيه منك وفاكه دماغي من عقدك ومن قرفك
انـــــــــا:يستي اسمعيني بس انا عندي مشكله وعايزك تحليها معايا
نفسي:قول يا سيدي لما نشوف آخرتها معاك
انـــــــــا:مش هينفع في التليفون لازم نتقابل
نفسي:امتى وفين
انـــــــــا:نتقابل ادام مسجد لشعراوي ونروح قهوه نفريتيتي النهارده بالليل
نفسي:هتفضل زي ما انتا يعني نتقابل ادام المسجد علشان نروح القهوه
انـــــــــا:اهو اي مكان نتكلم فيه براحتنا من غير ما ندوش حد
نفسي:زي بعضه نتقابل 8 بالليل
انـــــــــا:اوك سلام
نفسي:في ستين الف.........


وطول النهار حيران اكلمها ازاي واقولها ايه المهم جه الميعاد ونزلت واتقابلنا ووصلنا القهوه

انـــــــــا:بصراحه انا متضايق من طريقه مقابلتك ليا
نفسي:يبني انا مش واحد صاحبك,انا انت يعني لما اقابلك وحش ده معناه انك مش راضي عن نفسك
انـــــــــا:بطلي فلسفه والنبي
نفسي:اخلص بس ايه مشكلتك
انـــــــــا:مشكلتي المزز
نفسي:طول عمرك تافه
انـــــــــا:من غير طوله لسان
نفسي:انا مش بشتمك انا بقول الحقيقه بتاعتك,يعني انت جايبني هنا وعندي مشكله ومش عارفه ايه علشان تقولي مشكلتي المزز؟
انـــــــــا:هو انا مش شاب زي باقي الشباب ومن حقي اصاحب واتصاحب وكده يعني؟
نفسي:كده ايه يبني انت,الكلام اللي انت بتقوله ده بتاع طفل في مرحله المراهقه مش شاب زيك المفروض انه بيجهز نفسه علشان يكون اسره
انـــــــــا:انتي عارفه ان انا معيشتش مراهقه زي بقيه البشر واني طول عمري مكبوت من ناحيه البنات,ده انا حتى بتكسف منهم
نفسي:من الناحيه دي انت عندك حق ده انا بتحرج منك في مواقف كتير مع البنات
انـــــــــا:طيب وايه الحل
نفسي:دي مشكلتك انت
انـــــــــا:يسلام يعني احنا جايين هنا علشان تقوليلي كده
نفسي:مهو معنى انك جيبتني وجيت هنا انك حاسس ان فيه مشكله وبتدور لها على علاج وده حله في ايدك انت
انـــــــــا:بس انا مش عارف الاقيه
نفسي:انا هحطك على اول الطريق وانت تتصرف بعد كده
انـــــــــا:ايدي على كتفك
نفسي:شوف يا سيدي الاول احنا لازم نزود ثقتك بنفسك وده عن طريق انك تحسن مظهرك شويه
انـــــــــا:طيب وده احسنه ازاي ده
نفسي:حتى دي مش عارف تعملها لوحدك
انـــــــــا:مهو معنى اني بكلمك دلوقتي اني بعملها لوحدي
نفسي:عندك حق,بص يا سيدي انت تحلق دقنك دي الاول وتسرح شعرك_بطل تنزل الشارع منكوش وكانك لسه صاحي من النوم_ وهاتلك طقمين
شبابي وياريت لو تحاول تخس شويه_نزل كرشك ده_ بس وبكده واحده واحده المشكله هتختفي
انـــــــــا:احنا اتكلمنا قبل كده في موضوع لكرش ده وانا مش ناوي انزله
نفسي:انت حر اولع المهم تكمل باقي الحاجات
انـــــــــا:هحاول
نفسي:طيب لما تخلص ابقى كلمني تاني سلام


بكده انا ونفسي ناقشنا مشكله من المشاكل اللي عندي وحليناها من غير خناق ومن غير ما نزود عقد جديده

حاول انت كمان
اقعد انت ونفسك على القهوه وحاولوا توصلوا لحل وسط بس منغير خناق