الحِزن الوطني لمصلحتك.. والمستقبل ليـــك

فرخة بفحمة وحتة لحمة.. إياك يتمر فيـــك

أوضة بحالها لكل مواطن.. وكمان بالشبابيــك

وعشان مانوقفشي مصالحك.. قطرين يخبطوا بيك

الحزن الوطني لمصلحتك.. بص وشوف بعنيـك

الحِزن الوطني دا حرية.. هنطرطشها عليـــك

فكر جديد إصلاح متجدد.. بطلوا بقي تشكيـــك

رأيك قوله ومهما تقول.. بكرة نجيب رجليــك

بص لحالك ربـِي عيالك.. وبلاش تعمل ديـــك

الحزن الوطني لمصلحتك.. وده شئ مش بإديـك

الحِِزن الوطني لمصلحتك.. هيأمِّـن حواليـــــك

شرطة وأمن وعسكر صاحي.. وبوليس يضرب فيك

بلدي يا بلد الأمن يا واعية.. تقفيـش بالتلكيـــك

مالوا الحبس أهو شقة تلمّك.. من نفسك نحميــك

الحزن الوطني لمصلحتك.. وف حضنه يخبيـــك

في الحِزن الوطني يامــحلانا.. عفاريت ف التسليك

مصر ف عينّا وخيرها ف جيبنا.. مالناش فيها شريك

أمّا الشعب فعمره قصيــــر.. وتقول هات يديـِـك

خليك بس يا شعب ف بيتكو .. والإصلاح هيجيـــك