المره دي مش هقول زي كل مره ازيكوا يا نجعاويه لاني المره دي لازم اقول ازيكوا يا مصريين


ركزوا اوي على (يا مصريين) دي لانها هي رابطه من اهم الروابط اللي بتجمع بينا


قريب اوي هنكمل الـ80 مليون

هنبقى كتير اوي مننا المسلم والمسيحي وكمان البهائي واحيانا الشيعي واكيد الصوفي حتى لو بوذي بس برضه مصريين ولو كان فيه يهود كانوا برضه هيكونوا مصرين.

كلنا اتولدنا هنا واتربينا هنا اكلنا سوا وحلمنا بنفس الاحلام بالرغم من اختلافنا في الدين

ليه انا قلت الكلمتين دول؟

علشان الكارثه اللي احنا عايشين فيها

شوفتو اللي حرقوا بيوت البهائيين؟

اكيد سمعتو عنهم بس يا ترى سمعتو عنهم ايه؟

دول ناس وحشين مش بيعبدوا ربنا وبيعبدوا بشر اسمه البهاء وعلشان كده لازم نموتهم ونخلص منهم وميعيشوش معانا في مصر

يا ترى هيكون ايه رايك لو سمعت الكلام ده؟

انا شخصيا قلت طـــــــــظ لان انا ميهمنيش هما بيعبدوا مين انا اللي يهمني انهم مصريين زينا وكمان انا عايز اعرف مين الجاهل ده اللي شايف انه بيفهم اكتر من ربنا فقرر ان ربنا غلطان انه سابهم يعيشوا في امان وكافيين خيرهم شرهم فقرر هو انه يصلح الغلطه دي بانه يولع في بيوتهم ويموتهم.

اصل الجاهل ده هو برضه اللي كل يومين بيولع الدنيا بين المسلمين والمسيحيين اللي عايشين في بلد واحده وطول عمرهم مع المسلمين على الحلوه والمره ولما جت الحرب حاربوا معانا وجينا دلوقتي بس مع انتشار التعصب في الشعب الطيب ده قرر انه يكب شويه بنزين على النار علشان......

يا ترى علشان ايه؟

1- نقتل بعض
2-نخون بعض ونشك في نفسنا
3-نولع في بعض
4-ننسى الفساد اللي معشش بينا ونهتم باننا نقتل جيراننا فمنفكرش في الحريه

4+3+2+1=نهدم البلد اللي احنا عايشين فيه بادينا


كل مصري هو صاحبي
كل مصري هو حبيبي
اللي مش عاجبه يطق يموت او علشان يمشي في طريق اللي سبقوه (يموتني انا) لان انا كمان مصري