وقف البـطـل فى المفترق

هبت عليه أربع رياح

(1)

ريح الشمال
حدفت عليه أشجار كتيرة والورق
اللى عليها م العطش
كان اتحرق

(2)

ومن الجنوب
هبت رياح جابت طيور
ملهاش جناح
ماشية على الأرض السداح
ومعاها جيش
نمل وديدان
وأفاعى وضفادع كمان
والفيل بخرطومه الطويل
كان ماشى وياه الغزال
حلو وجميل
وزراف طويـــل
وحمار عليــل
جيش بالتمام

(3)
والشــــــــرق
جاب العاصفــة
جاب مخلوقات حرة ماهش متكتفة
جاب الخيال فيه الجمال
والبشر تبقى قصادها مش بشر
أفكار كتير .. أحلام كتير
إيه كل ده .. ؟
إيه بعد ده .. ؟

(4)
الغرب.....
جاب ريح المنون
جاب الرجال من كل جنس وكل لون
زى الكتايب كلهــــا
ماشية تزق فى بعضها


.. .. .. ..

وجريت أنا وقلت : بــطــل
وصرخت لكن صرختى
ضاعت ما بين أربع رياح
ووقفت مكسور الجناح
خايف أخش فى المفترق لأنجرف
ولقيت البطل بيـضـيع وعمره بينخطف
وبتنتهى ..... رحلة بطل
.