دى حاجه كده ممكن نسميها كلام اخر الليل او تخاريف قبل النوم


زمان وانا فى سنه اولى

كنت طفل بيجرى ويلعب اوله

والدنيا قدامى بتضحك

وكل مشاكلى محلوله

حلمت يكتب عنى التاريخ

حلمت انى اكون بطل

والناس تتباهى بيا

واخرج من بطوله ادخل بطوله

او عالم او مخترع او فنان

وعشت العمر بطوله

كبرت ونسيت اكبر معايا حلمى

فضل يصغر لحد ما مات

حسيت برعشه من غير برد

وانى اضعف مخلوق على الارض

واحلامى جوايا مقتوله

بحارب علشان اعيش

معايا فلوس ولا معييش

كله فى الاخر مالوش قيمه

كله فى الاخر ميساويش

مكانش طبعى الاستسلام

مكانتش ليا الاحلام

مشاعر جوايا مجهوله

وبواقى انسان

وحمم بركان حب قديم

وقصه حب مش فى زمانها

ولا مكانها

بتسرق عمرى منى بسهوله

مشانى فى طريق مالوش نهايه

همشيه لوحدى محدش معايا

لحد ما الشيخوخه تنسينى احلام الطفوله

بس ياترى هتخمد البركان

اللى ثاير جوايا من زمان

النهارده زى امبارح متغيرش

نفس الناس ونفس الكلام

كلها نفس الرتم الايام

واحد قالى مشكلتك محلوله

غير جلدك جدد حياتك

وحب من جديد

تلاقى العيد

مادد ايد وبيندهلك

وابقى اسأل اهلك

قولت فى نفسى وده معقوله

تانى هحلم وابنى امال

قصور جميله على الرمال

مانا لازم يكون ليا هدف

لازم يكون ليا مع نفسى وقفه

ما لازم قبل العيد بتيجى الوقفه