السلام عليكم ورحمة الله
انظر ثم اجب

بعد
ثلاث سنين جواز ... وفوزيه قاعده مع مع حنفى جوزها فى امان الله كبست عليهم حماتها ام حنفى " ازيك يامرات ابنى .... ازيك ياحماتى " وكلوا من تحت الضرس .... وتمصمص حماتها شفايفها وتبصلها من فوق لتحت وتقولها " هـــا ايه الاخبار " ابتسامه عريضه على شفايف فوزيه وترد وتقول " لسه ياحماتى البركه فى دعواتك لينا "
ترجع ام حنفى تمصمص شفايفها من تانى وتقولها " قليل البخت يلاقى العضم فى الكرشه ... نهايته روحى اعمليلى فنجان قهوه .... ساده ... معبلى اكلم ابنى كلمتين على انفراد " تبتسم فوزيه ابتاسمه صفرا وتقول فى بالها " انفراد ولا انكماش ... الهى تنفردى تحت قطر ويعدى عليكى سبع مرات "
راحت فوزيه تعمل قهوه لحامتها .... وقعدت ام حنفي جمب ولدها ومسكت ودنه وهاتك يارغى وقالتله " ايه ياضنايا ... ايه ياحوحو ياحبيبي مش هشوف حفيدى قبل ماموت " رد الابن المدلل " ليه بس بتقولى كده يا امى ربنا يديكى الصحه ويبارك فيكى " ردت الوليه امه وقالت" ياحوحو عاوزه اشوف حفيدى وسندك قبل ماموت " رد عليها وقال : ان شاء الله يا امى ... لسه ربنا مأذنشي " برقت ام حنفى فى وش ابنها وقالتله " اقف معوج واتكلم عدل ااه ... انا مش كل ماسئلك تقولى لسه ربنا مأذنشي ... الموضوع باين من اوله ... مراتك ياضنايا مبتخلفشي ... اه وانا مش هقعد جمبك احط ايدى على خدى واستنى الفرج ... لاءا شوفلك حل ... وعلى رأى المثل خيرها فى غيرها "
رد عليها حنفى وقال " يعنى ايه الكلام ده بس يا امى عاوزانى اجيب دره لفوزيه ... مقدرشي يا امى " ترد عليه امه وهى رافعه حاجبها الشمال " تجبلها دره تجبلها الضغط ان شالله شلل اطفال .. المهم عندى اطمن عليك قبل ماموت واشوف سندك فى الدنيا من بعدى ... ده انت ابنى الوحيد الى حيلتى "
وطى حنفى وشه فى الارض من كلام امه ... راحت كملت وقالت " حط عقلك فى راسك تعرف خلاصك ... بالاذن ياحبيبي "
وراحت شدت رحيلها ... وفى نفس الوقت جات فوزيه بفنجان القهوه ومازلت الابتسامه العريضه على شفايفها ... بصتلها حماتها من فوق لتحت وقالتلها " حطى عليها لمون واشربيها "


فاتت ايام وايام وقاعد حنفى على مكتبه فى شغله سرحان وقلقان ومتوتر بيفكر فى كلام امه بخصوص الخلف
سعيد افندى الى فى المكتب الى قصاده مخلصهوش يشوف صاحبه حنفى فى الحاله دى وميشفهوش ماله فى ايه " مالك ياحنفى افندى ؟؟" رد حنفى وهو مهموم " خلاص ياسعيد افندى دماغى هتنفجر ... خلاص مش قادر " رد سعيد افندى وقاله " مالك بس ياحنفى افندى فضفض عشان ترتاح " بصله حنفى وقاله " خلاص يا سعيد افندى انا قررت .... "





روح حنفى لمراته فوزيه وفى ايده اتنين كيلوا برتقال وازازة زيت للقليه وكيلو خيار ودخل عليها مبتسم للحياه دائما وبعد نص ساعه سمعت فوزيه بتصوت وتقوله " عاوز تتجوز عليا ياحنفى ده اخرت صبرى فيك ... الله يرحم يوم ماتجوزتك كنت عامل زى رغيف الفينو المسكع .... جاى تعايرنى انت وامك عشان مبخلفشي .... هما خيارتين ملهومشي تالت ... يانا يالدره الى هتجيبها عليا .... طلقنى ياحنفى ........ "



بعد الحوار الى قريته
سؤالى للرجاله ؟؟؟
_ لو لقدر الله بعد جوازك من الانسانه الى اختارتها واتجوزتها طلعت مش بتخلف ... ايه هيكون تصرفك خصوصا لو انت طول عمرك بتتمنى يكون لك ابن او ابنه ... هتتجوز جوازه تانيه عشان تخلف ولو مراتك موافقتش على انك تتجوز عليها وطلبت منك الطلاق لو انت مصر على انك تتجوز عشان تخلف ... ايه هيكون تصرفك وقرراك ؟؟



للستات بقا ؟؟؟
لو انتى لقدر الله طلعتى مش بتخلفى ... وجوزك نفسه يخلف .... هتوافقى انه يتجوز واحده تانيه ويكون ليكى دره عشان يخلف منها ولو اصر انه يتجوز هتطلبى الطلاق ولا هترضى ؟؟؟


يارب يكون الموضوع نال اعاجبكم وياريت اشوف منكم تعليقات واجابه على اسئلتى من الطرفين
ودمتم بخير