كلام المسؤلين علي دخول الالفيه

هنمحي الاميه ونهضه حضاريه

احنا في سنة 2000 عصر التطور السريع

وهنحافظ علي بلدنا ومليون لا للتطبيع

هنقضي علي البطاله وهنزود العماله

هنخلي رنوالدينهو يبوس ايد شيكابالا

مفيش عشوئيات وهنديكم شاليهات



اهوه كله كلام وبيطلع في الغسيل

كلام علي حيطه بيتمسح بالمناديل

فات 9 سنين والمشاكل هيه هيه

ولا في نهضه ولا قضاء علي الاميه

وزاد الجهل وكترت الوسطه والمحسوبيه

كلام شعرات وهمنا علي الانتخبات

والكل بيقول يلا نفسي والحق مات



نهضه للصحفيح اتعمل عشش وبيوت

صفيح للغلابه عايشين زي البرغوت

بيكلوا من الزباله وكأنهم خنازير

ملاين فقرانين من الملفات مشطوبين

عايشين مش عايشين



في المجاري غرقانين

من الكهربه محروقين

مع الفران متونسين

مفيش مرافق مفيش مستشفيات

مفيش حته لقمه ولا حتي موصلات

طفل اكبر حلمه يتعلم و يروح المدرسه

وبنت نفسها تبقي عروسه وتعيش كويسه

اب فقير شقيان

من الظلم شبعان



بالحقد مليان

حقد علي الحراميه

والي وكلانها مولعه

عايشين في ترفيه

وحياتهم كلها شخلعه

وهما ناس غلابه

والهدمه مرقعه



اه يا بلد فيكي الظلم الوان

اه يا بلد فيكي الشريف شقيان

هيه دي النهضه وهيه دي الحضاره

هوه ده التطوير ومرحب بالحضاره


.
.
.
.
.
دعاء مواطن مطحون مصحوب السخريه
اللهم أنقذنا من نفسية الزملاء وغباء الأصدقاء

اللهم ارحمنا من استبياع الجيل الجديد..
وحرائق السكة الحديد
واستقصاد كل مدير..

وندالة القرايب
الصغير منهم والكبير

اللهم أغثنا من كل عميل ومن فواتير موبينيل
اللهم أرحمنا من تشريفة عربيات المسئولين ,
وزحمة الشوارع في كل حين
وسحب الرخص في كل كمين من الغلبان مش م المتين

اللهم أهدى لنا سواقين الميكروباص
والمدير البصباص

اللهم ارحمنا من الشئون القانونية وشئون العاملين
واللي بيقفوا فـ وسط الشارع فجأة وبدون إشارة يمين

اللهم قنا شر الكليبات..
وشر شلل البنات الستات
وغباوة الحموات
والمينيمم تشارج كافيهات..
وهيافة الصحف والمجلات

وقطع الحرارة فجأة عن التليفونات وقت الزنقات
والمدارس اللي بتطلب تبرعات بالألافات
ووقــــوع السيــرفـــر وقفلـــة السايتـــات

اللهم ارفع مستوىالزمالك ..
لمستوى انبى والحدود أو حتى مستوى أسمنت أسيوط
أو أرسل يارب عليهم صاعقة..
بدل ما يخلونا نموت ...

اللهم سدد أقساطنا وضلل عنا مآمير الضرايب

اللهم ارزق جيل الوسط عقود عمل في ليبيا و قطر

للهم افتح لجيلنا القديم الطريق الفسيح
حتى ننظف انتخابات البلد من لعبة المراجيح

اللهم ارحمنا من الاكتئاب مرض العصر والشباب
واحمي يارب سماء مصر من سحابة الهباب

واكفنا شر صاحب الدقن الكداب
وصاحب التصريحات النصاب

اللهم ارزق كل بنت بعريس هدية..
وكل شاب بوظيفة وشقة وعربية

اللهم أحرق الـ 0900
واضرب الحرامية بالحرامية

ونجح أي طالب في أي كلية
حتى ولو كان في التربية الموسيقية

دا كلام الشباب الطهقان الزهقان القرفان

هل من راى اخر