كنت ماشيه فى وقت العشاء كده فى الشارع بعد ما خلصت درس كيميا والرموز والمعادلات وكل اللى تتخيله فى دماغى شبه السلطة .. وفجاه ريحه الطعميه بتاعت محل الفول والطعميه فحفحت فى مناخيرى
المحل زحمه واحتمال اقف ساعتين على ما اعرف اقتحم المعركه دى
الافكار تضاربت فى دماغى بين حاجتين اول حاجه انى اجازف واقتحم المعركه والحاجه التانيه انى استسلم وانسحب
فى االاول استقريت على الانسحاب بس مقدرتش اقاوم ريحه الطعميه وكل ما امشى ما يبقاش قدامى غير صورة واحده بس
صورة نص رغيف بلدى جواه طعميتين سخنين وعليه سلطه وطحينه
ووواااااااااااااااااااااا ااااااااااو تحفففه
اه صحيح نسيت اوصف ليكو المحل
المحل عبارة عن اوضه متر ونص فى متر ونص متقسمه ل3 مناطق واوضه كمان معموله عشان المجنى عليهم( قصدى الزباين) بياكلو فيها
من ع اليمين عم شحته بيقلى الطعميه وع الشمال سيد بيعمل السنكروتشات وع الجنب كده فى اول المحل قااعده ام سيد بتاخد الفلوس من الزباين وجنبها على المصطبه فارشه العيش البلدى وفى زوقر كده فى المحل حاطين براميل طرشى وزيت قلى وبتنجان وعجينه طعميه
نسيت اقلكو ان المحل هو صحيح اوضه بس نشاطاته كتير الله اكبر
يعنى قصاده كده واخد يجى متر من الشاارع عافيه كده حاطط فيهم خيار وطماطم ومشمش ولمون وجرجير ولفت
ومتسالنش طب ايهه علاقه المشمش بالطعميه ؟ :to2to2:

المهم
قررت انى اقتحم المعركه وابذل كل جهدى انى اخرج منتصرة
وفعلا دخلت
ويااااا ريتنى ما دخلت
اول ما دخلت خير اللهم اجعله خير برميل طرشىىى من اللى قلبك يحبه وقع ع الارض
قلت معلش حصل خير كويس انها جت فى الطرشى
لافاجئ ان البياعين اللى فى المحل بيلموة من ع الارض ومن جنب الطينه عشان يحطوة تانى فى البراميل ولا كئن حاجه حصلت نووو بروبليم ويقدموة للناس مع السنكروتشات وعاااااااااااادى جدا ,والاقى اللى بيعمل السنكروتشاات يجى ياخد شويه شويه فى الطبق قصدى فى الجردل البلاستك اللى الضحيه هياكل فيه
قلت معلش هعذرهم صعبان عليهم شويه الجذر واللفت يترمو

وقفت جنب عم شحته اللى بيقلى الطعميه عشان يدينى بسرعه بعد ما يئست انه يلبى نداءاتى من بعيد
فبالصدفه ببص على صفيحه الزيت اللى جنبه اللى بيقلى بيها الطعميه
هقلوكو ايه يا جماعه ... حاجه كده ولا زيت الميكروباسات
سيبك بقى لا تقولى زيت عافيه ولا كريستال ولا زيت قليه ولااااا غيرة ده زيت متميزززز زيت عربيات مهبب لاخر قطرة
قلت معلش يمكن الزيت قديم شويه يمكن الزيت خلص من عندهم .. معلش .. معلش
المهم بنادى بقول ياعموووووووو شحته عمو شحته عموووووووووو
ولا حياه لمن تنادى
الرجاله والشباب اول من بياخد
والغلابه اللى زيى يتلطعوووة بالساعه
بعد حوالى تلت ساعه من المعانااااه وصلت الاغاثه و عمو شحته حس بوجودى الحمد لله
وقالى عاوزة ايه يا شاطرة
قلتلو والنبى يا عمو عاوزة ب2 جنيه طعميه وبجنيه فول
وبلاش طرشىىى الله يكرمك احنا مش ناقصين وجع بطن
العجيبه ان الناس اللى واقفين بعد ما شافو موقعه الطرشى بردو بيوصوة ع الطرشى
كل واحد يخش يطلب بقد ايه فول وقد ايه طعميه ومينساش يقول فى الاخر ( متنساش تكتر الطرشى يا سيد )
الجمله دى ممكن تسمعها فى دقيقتين اكتر من 50 مرة
المهم الحمد لله عمو شحته ادانى الطعميه فى قرطاس من الجرايد
قلتله ممكن كيس يا عمو قالى مفيش اكياس يا شاطرة
المهم خدت بعضى وانا فى قمه السعاده انى لسه فى عمرى بقيه
لاطلع من الشارع الصغير على الشارع الرئيسى فاجد ما يعكر هذه السعاده واشوف الصدممممه
المجااارى ضاربه فى الشارع والطريق مليان ميه وحاجه تقرف والريحه مش هوصفهلكووو
بصيت لقيت الناس مظبتين نفسهم واخر تمام والمنظر كان كده
حاطين طوبه طوبه كده على بعد خطوة من بعضها اللى عاوز يعدى بينط زى القرد من ع الطوب ده
مانتو عارفين المصريين عندهم لكل مشكله حل ... عندهم حاله من التكيف على اى وضع اى كان
المجارى ضاربه .. بس عادى جدا
ممكن تقعد ضاربه اسبوعين وتلاته والناس مستسلمه وراااااااااضيه بالطوب اللى بينطوا عليه ... حاله رضا عحيبه عند الشعب المصرى
وتضاربت فى دماغى فكرتين الاولى انى ارجع الشارع كله واعدى من اى حته تانيه
و الفكرة التانيه انى اعمل زى القرود وانط ع الطوب وامشى امورى
المهم قررت ارجع والف من شارع تانى واحافظ على كرامتى
لكن بصيت ع الشارع لقيته طويل وانا كنت على وشك الاغماء بعد هذه المعركه الحربيه اللى خضتها مؤخرا
قررت قرار نهائى انى اعمل زى الناس( اقصد القرود) وانط
تماسكت اعصابى وضحكى فى نفس الوقت على منظر الرجاله والستات اللى بينطو بشكل متراقص ولا رقص باليه محترف
منظر خرافه يهلك من الضحك
المهم تماسكت اعصاابى ومسكت شنطه ايدى بايدى الشمال وقرطاس الطعميه بايدى اليمين
وبدات انط ولما الطريق العويص قرب يخلص وباقى طوبتين ولا حاجه مقدرتش اتحكم فى اييدى وقرطااس الطعميه وقع فى المجارى
وقضيت ليله من اصعب الليالى فى حياتى باكيه حزينه اسفه على الطعميه وعلى المجهود الخرافى اللى بذلته فى سبيلها
انتظرونى اكمل هذه المأسى وحلقه جديده فى محل الحواوشىىى