السلام علييكم يا شباب .. جايين انهارده ومعانا موضوع فى غاية الخطورة لكل شاب مصري وفتاه مصرية وبنسألهم لسه بتحبوا مصر تعالوا معانا نقرا الموضوع وياريت نناقشه مع بعض ..


[size=14pt]يا ترى إحنا لسة بنحب مصر ؟؟؟؟؟



قبل ما تندفع وتقول طبعا دى مصر هى امى ونيلها هو دمى وتكلمنى عن شهامة ولاد البلد واخلاق بنت البلد وبنات وسط البلد ...... خلينا نتكلم بواقعية شوية .
يا ترى يا جماعة مصر بتمثل لكل شاب وشابة فينا ايه ..... ياترى ذكرياتك الحلوة فيها اكتر ولا الوحشة ؟؟؟؟
مصر بلدنا اللى اتحولت الحياة فيها لمعاناة مستمرة من اول ما تفتح عينيك الصبح لحد ما تغمضها باليل ...... تنزل الصبح من البيت ويبدأ الصراع .... صراع مع سواق الميكروباص وصراع مع ركاب الميكروباص ..... صراع مع زميلك فى الشغل وصراع مع ظابط المرور ومع سواق التاكسى ومع موظفين الحكومة ومع الناس اللى فى الشارع وصراع مع أصحابك فى الجامعة او المدرسة وصراع مع المدرسين ....... ...... مصر اللى مبقاش فيها حاجة صح لا تعليم ولا صحة ولا إسكان ولا اخلاق .... مصر اللى الشرطة فيها بتقهرنا واصحاب رأس المال بيستعبدونا .... مصر اللى شعبها من كتر الهم والجوع اتخلقت عنده عقد نقص وكراهية ضد الأخرين ..... مصر اللى كتر فيها الإجرام وبدل شهامة ولاد البلد ... بقى تحرش الولاد بالبنات فى وسط البلد ..... مصر اللى تخاف على بنتك ومراتك واختك يمشوا لوحدهم فى الشارع خايف عليهم من 1000 خطر ... تحرش وسرقة وإغتصاب وسفاح المعادى ورخامة امناء الشرطة وغلاسة ولاد البلد .
شايفين بلادنا بقيت عاملة إزاى يا جماعة ؟؟؟ ....... يا جماعة محدش يفهم انى عايزة اقول انى بكره بلادى او بحرض على كراهيتها ..... ابدا والله انا بفضفض عشان انا نفس مبقيتش فاهمة ........ شايفين كل البلاوى اللى فى مصر دى ؟؟؟؟؟ بس برغم كدة حد فينا حاسس انه بيكره مصر ؟؟؟؟؟ بردو لأ ............ طيب مصر دى ايه حكايتها .
انا حاسة الإحساس ده وعارفة انكو كلكوا حاسين نفس الإحساس ........ كل ما احاول اكرهها ميهونش عليا اقولها ..... كل ما افكر انى اهاجر قلبى مايطاوعنيش انى اتخيل حتى .... كل ما اتخنانق مع سواق ميكروباص أو مدرس فى مدرستى او دكتور فى جامعتى ..... اقابل راجل أو شاب طيب مبتسم قاعد جمبى فلا املك إلا الإبتسام ....... كل ما اتقزز من افعال الشرطة ومن التعامل معاهم ....... اقع فى ظابط ابن ناس اوى ومحترم والاقيه بيعامل الناس كويس ...... كل ما افتكر مشاكل سواقين التاكسى اركب مع سواق تانى راجل بركة يدعيلى........ كل ما اتخنق من البنات الكاسيات العاريات اقابل اخت محترمة كويسة اوى .... اقول الحمد لله الدنيا بردو بخير ............ كل اما اشوف العراق واللى بيحصل فيها واتخيل ان ده ممكن يحصل لمصر احس بألف شوكة فى قلبى واحس ان الدم بيغلى فى عروقى وعايز اقف على حدودها واموت الف مرة دفاعا عن بلادى .
يا جماعة انا بجد مش فاهم ..... يا ترى جيلنا ده بيحب مصر ولا لأ ؟ وحد يرد عليا يفهمنى هو انا لوحدى اللى متعذب فى حب وكراهية البلد دى ولا ده إحساس جيلنا كله ؟؟؟ تعالو نواجه نفسنا ونجاوب عالسؤال ده



ياترى احنا لسة بنحب مصر ؟؟؟؟[/size]