الجزء الاول اختيار مكان الهبوط


عزيزى القادم من الفضاء. من فضلك تذكر الأتى, انت أخضر و أذناك صغيرتان و رأساك كبيرتان, لديك سبعة أطراف بكل منها ثلاثة أصابع. لذلك يجب عليك التنكر فى شكل بنى أدم عبيط... و شكرا.

- اختيار مكان الهبوط. بعد دراسة جغرافيا و تضاريس و عادات الشعوب فى هذا الكوكب العجيب و جدنا ما يلى:

. القطب الجنوبى فارغ و لكنه بارد و سوف تنكمش حتى تصبح كالبازلاء الفاسدة ثم تموت.(البازلاء هى الأستكنسى فى كوكبك)
. القطب الشمالى ده محيط و بارد برضه. (شكلك غبى على فكرة و هتتعبنى معاك)
. الصحراء الكبرى حارة جدا و سوف تتمدد تتمدد تتمدد حتى تنفجر انفك و يسيل منها عصير قشر البطيخ.
. صحراء كلهارى حارة ايضا. (مش بقولك غبى)
. لا يمكنك الهبوط فى اى مكان فى اوروبا او امريكا لأن لديهم كثافة مرور فضائية عالية. بالاضافة الى أن الضرائب مرتفعة. و كمان يعنى هما مش اغبيا عشان يصدقوا التنكر بتاعك, انت هتنزل هناك من هنا يا هيموتوك يا هيخطفوك و فى الحالتين هيعملوا عليك تجارب.
. انسب الأماكن هى فى القطر العربى و أفريقيا و فيما يلى عرض مبسط للأماكن المقترحة:
- الصومال.. أسهلهم و أسرعهم فى الهبوط و لكن احتمال ان تموت جوعا او يتم التهامك على انك طعام كبير نسبيا.
- السودان.. تلى الصومال فى سهولة الهبوط و لكنك قد تعانى بعض المشاكل فى التفرقة بين السكان المحليين و منتصف الليل.
- الجزائر.. بلد جميلة و لكنك قد تصاب بأعاقة فى النطق بسبب اختلاط اللغات فيها.
- العراق.. معتدلة الطقس و لكنهم قد يعتقدون انك مشع. (عشان انت اخضر, شكلك نسيت)
- الكويت.. سيتم توظيفك بسرعة و لكنك قد تتعرض للأتهاض لأنك مهاجر.
- البحرين.. بلد جميلة و لكنها فى حجم مقاطعة شنستر على المريخ.
- لبنان.. بلد جمية. جميلة جدا. جميلة خالص. و لكنك تكاثر بالأنقسام الميتوزى.

لهذا يرشح الدليل جمهورية مصر العربية للهبوط و الأستقرار حيث يتوافر بها المميزات الأتية:
. منصات هبوط.. الأهرامات الثلاثة و برج القاهرة.
. فرص عمل.. نشال اوتوبيسات, نشال ميكروباصات, نشال طوابير عيش.
. سكن مريح.. الرصيف, تحت لورى, صندرة واحد كريم.
. وسائل تعليمية.. بلاى ستيشن, مواقع تثقيفية على شبكة الأنترنت.
. منشأت اجتماعية.. سجون, اصلاحيات, اقسام شرطة.
. وسائل مواصلات.. كل ثلاثة على كرسى.

_______________________________

الجزء الثانى الاستقرار


هذا الفصل يفترض أنك لست من الـ 17 مليون الاميين. و أنك قرأت الفصل الاول و عملت بالنصيحة ونزلت عالهرم.
عزيزى القادم من الفضاء. من فضلك تذكر الأتى, انت أخضر و أذناك صغيرتان و رأساك كبيرتان, لديك سبعة أطراف بكل منها ثلاثة أصابع. لذلك يجب عليك التنكر فى شكل بنى أدم عبيط... و شكرا.

- الاستقرار.
...أولا اختيار سكن ملائم.
بما أن مصدر غذاءك الرئيسى هو مادة الكيتين المكونة لقشرة "جلد" الحشرات. و لهذا يجب عليك ان تسكن فى احد المناطق "الزبالة". أو يمكنك خلق بيئتك "الزبالة" بنفسك بواسطة بعض الأدوات و المهارات المتوفرة لدى السكان الأصليين. سيمكنك الأتى من تحويل اى مكان مهما كان الى منتجع حشرى تمرح فيه انواع الصراصير و البعوض و لا مانع من بعض البلهارسيا فى حوض سباحتك. فى البداية ابحث عن مخزن فارغ فى حى "عشوائى", ستجد بينك و بين أم سيد طابقين و شكرى الترزى فى الزقاق المجاور لك. الان افتح باب مخزنك و انتظر الساعة 8.37 صباحا. بقايا تحضير افطار سيد و كريم و باكينام تهبط عليك من الشرفة الثالثه. الساعة 3.48 بعد الظهر تأتى مخلفات وجبة السمك يقدمها لكم الطفل كريم و ذلك لبعد الصندوق الكريه و استعجال سيادته للعب مع اشرف ابن طنط سعاد. لا تنتظر مخلفات العشاء و اغلق بابك و اذهب للنوم. للأسف ستضطر للأعتماد على أقراص الكيتين الليلة, لكن لا تقلق غدا سيأتى لك الطعام الطازج.
انها الحادية عشرة صباحا. جيد انت مستيقظ, ستجد بقايا الأفطار مع مخلفات تحضير عشاء الأمس منتظرين لقاء اصدقائهم داخل مخزنك. اترك باب مخزنك مفتوحا و أذهب لأستكشاف المكان المحيط ولا تعد قبل السابعة مساءا.
انها السابعة و انت على باب المخزن المفتوح. لقد تحول الى الفردوس بالنسبة اليك. مقلب قمامة مصغر. و اهم ما يميزة التنظيم. ركن لمخلفات الطعام و ركن للمخلفات القابلة للتدوير و ركن للمخلفات الأدمية السائلة و اخيرا ركن للمخلفات الأدمية الغير سائلة. و كل ذلك بفضل حنكتك و عادات اهل "العشوائيات" الصحية.

...ايجاد عمل مناسب.
بما أنك من كوكب اخر. فمن البديهى ألا تعرف اكثر مما تعرفه الضفضعة عن السديم النجمى "حضانة النجوم" . و لكن لا تقلق لدينا العديد من المرتكز الوظيفية فى مجالات عدة لتختار منها.
- الطب: يمكنك ان تكون اخصائى تخدير.. مهنة لا تتطلب خبرات او مهارات خاصة. كل ما عليك فعله هو اختيار نوع المخدر و ذلك بأحدى هذه الطرق ( القرعة, غمض عينك و اختار اللى تيجى عليه ايدك, حطهم كلهم على بعض ). ثم اختيار الكمية المناسبة و هى عن طريق سؤال المريض عن رقمه المفضل, اذا لم يجب اسأل الممرضة الحسناء عن رقم موبايلها.
- الهندسة: يمكنك ان تكون مهندسا مدنيا.. ايضا لا تتطلب خبرات. فقط اخلط المكونات بالكميات التى يطلبها منك المقاول و كله بتمنه.
- الصحافة: فى هذا المجال يمكنك تظوير مهارات التعامل مع الناس من خلال النميمة و الغيبة و النفاق.
أو يمكنك ان تشغل و ظيفة مكتبية بسيطة تتطلب فقط مهارات حل الكلمات المتقاطعة.

_______________________________

الفصل الثالث التعامل مع البشر



هذا الفصل يفترض أنك لست من الـ 17 مليون الاميين. و أنك قرأت الفصل الاول و الثانى و أنك وجدت مكانا للسكن و عملا مناسبا.
عزيزى القادم من الفضاء. من فضلك تذكر الأتى, انت أخضر و أذناك صغيرتان و رأساك كبيرتان, لديك سبعة أطراف بكل منها ثلاثة أصابع. لذلك يجب عليك التنكر فى شكل بنى أدم عبيط... و شكرا.

بعد ما سكنت و اشتغلت و ظبطت المسائل فضل حاجة واحدة بس تتعلمها. ازاى تتعامل مع البشر اللى حواليك. و عشان انا عارف انك غبى - محدش يتخدع فيهم دول مش زى اللى بييجوا فى الأفلام خالص - هعملك تصنيف بسيط عشان تفهم. البنى ادمين خمس انواع فركز كويس و صحصح و اشرب نسكافيه...

النوع الأول : المسالم...
و ده احسن نوع تتعامل معاه. هاديين ماشيين جنب الحيط لا بيهشوا ولا بينشوا, قاعدين زى مايكونوا مش قاعدين. و افضلك انك تسكن جنب ناس من النوع ده لأنهم مش هيدعبسوا وراك كتير.

النوع الثانى : المتعلم...
احذر التعامل مع النوع ده من البشر لأنه غالبا بيبقى سبب انكشاف الأغبياء اللى شبه سيادتك. النوع ده فطن - بكسر الفاء - و يعلم الفرق بين اللى برأس واحدة و اللى برأسين كما انه منتشر اليومين دول فخلى بالك.

النوع الثالث : المتفتح...
النوع ده هو الأصدار المتقدم من المتعلمين. متعلم اه و فضولى اه بس ممكن يقبل حقيقة انك مش وحدة كربونية او 75 % من جسمك ماء. غالبا ده هتقابله بعد فترة مش طويلة و غالبا هيساعدك فى الاستقرار و بناء أسرة و مش بعيد يطلعلك بطاقة.

النوع الرابع : المعجب...
طبعا ده اول مرة يشوف كائن فضائى, و كعادة المصريين هتلاقى الخبر فى الجزيرة بعد ما يعرف بخمس دقايق بالكتير. ده كمان احتمال يكون لسة واقف جنبك ساعتها. النوع ده لو عرفته قول على نفسك يا رحمن يا رحيم و اتكل عالله من الكوكب ده عشان كدة مبقاش ليك عيش فيه.

النوع الخامس : اللى يا لهوى...
جميع انواع الهيستيريا و امراض الصرع مجمعة فيما يبدو انه بنى ادم. النوع ده لو شاف صرصار هيصوت ولا اجدع سرينة اسعاف و بعدين يغم عليه. ما بالك بقى لو شاف اللى بياكل الصراصير هيعمل ايه. من الاخر احسنلك لو شفته تجرى الناحية التانية.

و هكذا عزيزى القادم من الفضاء اصبحت مستعدا للحياة على كوكب الارض. الى اللقاء فى دليل اخر على كوكب اخر فى حال انهيار طبقة الجليد أو اصطدام نيزك او انفجار بركان






ملطوش