بنات كتير بيشتكوا من إنهم بيضيعوا وقت كتيييييييير أوي عند الكوافير في عمل المانيكير والباديكير ده، غير الفلوس اللي بيدفعوها كل مرة، واللي ممكن بمنتهى البساطة يوفروها خالص.........
طبعاً عاوزين تعرفوا إزاي..

كل الحكاية هو أنكم تتعلموا إزاي تعملوا المانيكير والباديكير في البيت..

وده اللي هنعرفه حالاً /wik

الأدوات اللي محتاجاها

الموس
وده بيستخدم لإزالة الجلد الميت في الكعبين. وخلّي بالك إن كل مرة لازم تستعملي موس جديد، واطمني يا ستي بيتباع هو والموس بتاعه في جميع محلات الخرداوات والصيدليات كمان. نصيحة: حاولي ماتبدئيش بالموس غير لما تتدربي كويس عليه، ده غير إنه –أينعم- بيشيل الجلد الميت؛ بس بعد فترة الجلد الميت ده بيطلع تاني. مش محتاجين نقول لك إن الموس بيعور.. لو حصل كده -بعد الشر- لازم تحاولي توقفي الدم بسرعة وتطهري المنطقة دي كويس. وأخيراً لازم تعرفي إنه ممنوع استخدامه لمرضى السكر والضغط وسيولة الدم.

الفرشة

ودي بتستخدميها للتنظيف علشان تشيلي الحاجات اللي بتتجمع تحت الأظافر..

مبرد الأظافر

وده طبعا لبرد أظافر القدمين واليدين، وطبعاً الأحسن يكون من الخشب..

سنفرة الجلد
وده بيستعمل لتنعيم القدمين..

مبشرة

ودي لإزالة الجلد الميت زيها زي الموس، وممكن اللي ممنوع عليهم استخدام الموس يستخدموا المبشرة.

عود البرتقال

هو اسمه كده.. عامل زي خلة الأسنان بس أعرض، وده بتستخدميه علشان ترجعي جلد الأظافر لورا، علشان تتغسل كويس وتقدري تحطي عليها المانيكير.

قصافة+ مقص= 2 ×1

ودي قصافة للأظافر ومقص في نفس الوقت.. هي شكلها طبعاً مختلف لأن بيستخدمها المحترفين.

حجر طبيعي

وده برضه بيستخدم للتنعيم..

حجر صناعي

وده شكل تاني وموجود عند الصيدليات..

فيه كمان شوية حاجات تانية زي:

1. وعاء تحطّي فيه مية سخنة لإيديك ورجليكِ.

2. فوطة للتنشيف.

3. كريم تقشير.. ممكن تستخدمي نفس النوع اللي بتستخدميه لبشرتك.

4. صابون استحمام سائل، ولو ما فيش يبقى شامبو.

نبدأ بالباديكير

1. هتجيبي الوعاء وتمليه مية سخنة على قد ما تستحملي، وتضيفي شوية سائل الاستحمام أو الشامبو، وبعدين تنقعي رجليكِ حوالي من 1/3 لـ1/2 ساعة أو لغاية ما تحسي إنها باشت.

2. تبدئي تشيلي الجلد الميت سواء بالمبشرة أو الموس أو الحجر.

3. دلوقتي بقى نشفي قدميك وقصي الأظافر وابرديها.

4. ضيفي بقى كريم التقشير وافركي رجليكِ بيه كويس.

5. اغسلي رجليكِ بالمية ونشفيها، وحطي كريم مرطب على قدميك وسيبيه لغاية ما يجف.

ودلوقتي المانيكير
ناس كتير فاكرة إن المانيكير هو وضع المانيكير، في حين إن معناه هو الاهتمام بالإيدين وهنبدأ دلوقتي.

1. برضه هتجيبي الوعاء وتمليه مية سخنة على قد ما تستحملي وتضيفي شوية سائل الاستحمام أو الشامبو، وبعدين تنقعي إيديك حوالي من 1/3 لـ1/2 ساعة.

2. نشفي إيديك ورجعي الجلد لورا بعود البرتقال، وبعدين قصي الأظافر، ابدئي بالمنتصف ثم الجانبين. وبعدين ابردي الأظافر.

3. وزّعي الكريم الخاص بالتقشير، وافركي إيديك كويس.

4. اغسلي إيديك بالمية ونشفيها، وبعدين حطي الكريم المرطب.

طلاء الأظافر
لازم تستخدمي لون مناسب للون بشرة إيديك

1. هاتي اللون اللي إنت عاوزاه.

2. هاتي طلاء أظافر شفاف. واعملي بيه أول طبقة.

3. ابدئي بدهن خط من منتصف الظافر للأعلى.

4. ادهني كل جانب على حده ويجب أن يطلى الظفر بكامله من ثلاث ضربات للفرشة بس.

5. لو حبيت يطلع اللون تقيل حطي طبقة ثانية وانتظري دقيقة أو أكتر لغاية ما تجف الطبقة الأولى تماماً.

6. لو هتطلي أظافر رجليكِ كمان لازم تستعملي السيبراتور ده علشان الحكاية ماتتلحوسش.

لو عاوزة تحافظي على الطلاء لفترة أطول، بعد مرور خمس دقائق على وضع الطلاء، ضعي صوابعك ثواني معدودة في المية الباردة؛ لأن ده بيساعد على تثبيت الطلاء لفترة أطول وبيخليه أكثر لمعاناً.

وبكده يكون خلصنا طرق عمل المانيكير والباديكير في البيت...
/wik