الأُمُّ مَـدْرَسَــةٌ إِذَا أَعْـدَدْتَـهَـا أَعْـدَدْتَ شَعْبـاً طَيِّـبَ الأَعْـرَاقِ



دايما احنا مغلبين امهاتنا ... هو مش دايما يعني :] بس لابد انه بيكون في مواقف احنا بنعملها مع امهاتنا مش من المفروض انها كانت تحصل مننا..

خصوصا لو اتكلمنا في نقطة معينة وهي :



(الام والانترنت )..


احنا بنستخدم الانترنت غلط بنخلي اهلنا يكرههوه ... وخصوصا الام لانها هي الي قاعدة معانا فترة كبيرة في البيت .. بتشوف ازاي بنستخدمه وبتشوف كم الوقت الكبير الي بنقعد فيه علي النت اكيد لازم تتعصب مننا وتكره النت حتي لو كان مفيد ..



هعرض عليكم بعض المواقف الي بتحصل لنا في حياتنا مع امهاتنا واحنا قاعدين علي النت ..

موقف (1)



الولد: قاعد علي منتدي ابن مصر بيرد علي موضوع تهنئة للعضو كذا ..


الام : يابني قوم صلي لك ركعتين لله ينفعوك يوم القيامة

الولد : حاضر يا ماما قايم اهو بس اصبري اما اخلص الرد ده ..

الام : رد ايه وبتاع ايه ما انت قاعد من الصبح كل ده مخلصتش الردود

الولد: معلش يا ماما اصل ده واحد صاحبي قوي ولو مش هنيته هيزعل مني وانتي عارفة بقي

الام : اه طبعا متقدرش تزعله انما امك تخبط راسها في الحيطة وربنا ميرضاش عنك .. ده كله عادي

الولد : لا ازاي بس تقولي الكلام ده ... قايم اهو خلاص ... فضل قاعد يهني في صاحبه لغاية اما وقت الصلاة راح عليه




موقف (2)



البنت : قاعدة بردوا علي منتدي النجعاوية :]

الام وهي معدية : نفسي اشوفك مغيرة المحطة قصدي مغيرة الصفحة ..



الام : يا ريتك حافظة الي بتذاكريه زي مانتي حافظة النجاوية بتاعك ده






موقف (3)



مصطفى : فاتح الماسنجر وبيكلم 8 في وقت واحد

الام : يا مصطفى ... يا واد يا مصطفى ... انت يا واد .... يا مصطفى ... يا مصطفىىىىىىىىىىىىىىىى
مصطفي : نعم يا ماما عاوزة حاجة :]

الام : الله يخرب بيت البرود بقالي ساعة بنادي مش سامعني


مصطفي: اصلي بكلم 8 وانتي التاسعة مش قااااااااادر اركز

الام : وايه الي غاصبك علي كده ها ...

مصطفي : ولا حياة لمن تنادي ...

الام : دخلت المطبخ وجابت ايد المقشة دب دب .. دش دش .. الكمبيوتر بقي بسم الله ما

شاء الله حاجة جميلة قوي



مصطفي : ليه كده يا ماااااااااااااااااااااما لييييييييييييييه






كفاية عليكم مواقف ممكن نعملها موضوع لوحدها مستقل هنلاقي كثير والله



فكرة الموضوع بسيطة جدا ..

احنا هنستضيف امهاتنا هنا في عائلة النجعاوية ...

هنكلمهم عن النت واضراره وفوائدة ..

وجهة نظر كل ام بخصوص النت ..

ليه دايما في معارضة من قبل الام علي الجلوس علي النت ..

ايه اكثر حاجة بتضايقك من النت ..

والكثير الكثير من الاسئلة دي..







الاجابات هتوصل لنا عن طريق العضو الي هنستضيف امه ..

هيجيب الاجابات زي ما هي بدون اي تعديلات علشان حابين اننا نعرف ليه هما

متضايقين مننا كده ومن قعدتنا علي النت ...





بعد ما اخلص حواري من ام العضو واخلص كل الاسئلة معاها ... الام هتسال ابنها 3 اسئلة متعلقة بالنت ..

الي نفسها فيه كله تلخصه في ال3 اسئلة دول ...


وهو هيجاوب عليها وينزل الاجابات بتاعته ..






اي حد من الاعضاء له تعليق علي اي حاجة من الاجابات له الحق في ذلك ... ما عدا انه يسال الام اي سؤال اضافي خارج نطاق كلامنا ..

يعني لو هيعلق علي نقطة معينة يبقي في محيط الاسئلة والاجابات الموجوده ... لكن مش

يسال سؤال جديد خالص بيتكلم عن اي حاجة غير الي احنا بنتكلم فيها






اتمني ان الفكرة تكون نالت اعجابكم ..

تحياتي للجميع ..