السلام عليكم

اقسم بالله ان الموقف ده حصل معايا شخصيا...

عارفين ايه هو اللى انا شوفته

تخيلوا كدة ....شوفت

.(( الموت))

شوفته بعينى ....... شوفت صورة مصغرة من يوم القيامة
(( يوم تاتى السماء بدخان مبين.يغشى الناس هذا عذاب اليم . ربنا اصرف عنا العذاب انا مؤمنون))

تخيلوا ان المشهد ده انا شوفته......

والموقف ده كان امبارح الساعة 1 صباحا اثناء صلاة التهجد
كنت فى المسجد وكنت معتكفة ... وكنا فى صلاة التراويح ماتور الكهرباء اتحرق..
والانوار كلها اطفئت عشان يقل ضغط الكهرباء

بمجرد ما كبرنا فى صلاة التهجد..(((والشيخ شرع فى القراءة )))فجاة.....

النور انقطع... ودخان دخل علينا من احد الابواب .... واضواء النار بتتزايد .... وناس بتجرى على الباب
وفجأة جاتلى رهبة الموت ....
وقلت خلاص المكان هيتفجر بينا لان الكهرباء فى كل مكان والمراوح هكذا والماس والحريق بيزيد
واصبح ضغط الناس كلها عن باب واحد وسلم لا يتخطى عرضة 110سم
و المسجد لوحده مساحته كبيره جدااا
5 ادوار مساحة الدور لا تقل عن 250 متر مربع
وكنت فى الدور اللى قبل الاخير .... يعنى قدامى مشوار على ما اطلع لغاية الباب
وزحمة بتكتر وناس بتجرى.. لو حد فيهم طال ان يدوس على اللى قدامه عشان ينقذ نفسه هيعمل كده بالفعل


-ساعتها بس حسيت بالناس اللى كانت فى عبارة السلام وماتت.... لاننا كنا فى موقف زيهم بالظبط
بس الفرق انهم فى البحر واحنا على البر...(( الموت حوالينا من كل ناحية ))
ومش عارفين نتصرف
ولا نعمل اى حاجة غير اننا نحاول ننزل للباب

وتوقف الشيخ عن القراءة ... لان فعلا المسجد اصبح فيه صراخ وصياح

صعب ... بجد صعب اوى الموت ... ساعتها بس مكنتش بفكر فى اى حاجة الا امى ثم نفسى..
كانت معايا والدتى بس كنت حاسة انها مطمنة ....... كانت هى شغلى الشاغل وهمى الاكبر ...
المكان فيه حريق ناتج من ماس كهربى ... وناس بتصرخ من شدة الفزع

يا الله .... اقسم بالله جالى احساس راسخ بانى خلاص هموت وسبحان من ثبتنى بذكره
بقيت بقول::
والله العظيم الكلمة دى قلتها كدة بنصها(( يارب انت فى السماء الدنيا انجدنا يارب))

وبدأ لسانى بردد كلمة : (( يارب يارب ))
وبعدها بقيت اقول ((لا اله الا انت سبحانك انى كنت من الظالمين ))
لانا كنا فعلا فى قمة الكرب والهم؟... وبها نجانى الله وامى

وانا فى وسط الزحمة الناس خلاص هتموتنى وانا كان نفسى اهم حاجة اوصل ماما لغاية الباب
اقسم بالله .. انا مش جريت انا بالفعل كنت بهرول ... اسفة فى اللفظ حتى(( الحذاء)) ما اخدتهوش معايا
لانى مش شايفة اى حاجة الدنيا ظلام تااام ... يادوب انا منورة الموبايل عشان
منقعش على السلالام لانها عاليه جدا

من كتر الرعب والدنيا ضلمة .. وكل المصابيح اللى كانت منورة بتتطفى واحدة واحدة
وكنا خلاص هنموت هنموت...... لقيت نفسى وصلت عند الباب ....... انا وماما وكنت بأسدال الصلاة
ومن كتر الزحمة ووالتعب والجرى حجابى لكن الحمد لله الذى نجانى من الموقف ده
.
.
.
.
حد فيكم جرب قبل كدة موقف زى ده.... اقسم بالله ما اصعبه

فعلا موقف (( يوم يفر الرء من اخيه وامه وابيه وصاحبته وبنيه ))
وذكر جماعى (( لا اله الا الله ))

وناس خلاص بتنطق بأخر كلمات فى حياتها
خلاص موت موت وقضى الامر

صدقت ربى (( امن يجيب المضطر اذا دعاه ويكشف السوء))
واقسم بالله ... ما فى موقف اصعب من انك تلاقى نفسك فى لحطات الموت
ومش عارفة اخرتك ايه .. وحسابك هيكون ازاى ... وقبرك هيبقى ايه
واحساس بجدوالله ما لقيت اصعب منه فى حياتى ولا هلاقى الا لو قابلت نفس الموقف تانى

وانتهى الموقف على كدة والحمد لله على سلامة امى
__________________________

بس عارفين انا بحكى الموقف ده ليه ....
لاننا فعلا فى غفلة مش حاسين بيها وانا ما اخدتش بالى من شدة الغفلة دى الا امبارح بس ومن الموقف ده
كنت بحسب نفسى عارفة دينى ومؤمنة بالله .....
وبمجرد ما انتهى الموقف كنت فى قمة احتقارى لنفسى

عارفين ليه .....
لانى لو كنت مؤمنه بالله مكنتش حتى خفت ...
ولانى لو كنت مؤمنه ان الموت حق مكنتش اتحركت
ولانى لو خايفة من الموت اوى كدة ليه معملتش للحظة زى دى
ولانى لو كنت مؤمنه بالله
كنت افتكرت انى بيت ربنا
كنت افتكرت انى فى مكان تحفه الملائكة
كنت افتكرت انى بقيم الليل بين يدى الله
لو كنت مؤمنه بالله كنت اتمنيت الشهادة والجنة
وحسن الخاتمة و احنا بنصلى

فى اجمل من كدة ميته بالله عليكم

صدقونى بكيت اشد البكا بعدها .... وحسيت زى ما يكون عندى شلل الرعاش فى رجلى ومش قادرة اقف
وعلى الحال ده ناس كتير على الرغم من ان كان فى ناس كتير حواليا بعد ما نزلت كانت بتطمنى

ولقيتنى بكلم نفس واقول
لسه فى فرصه تانية ..... لسه فى فرصة تانية
انا لسة ممتش ...... انا عايشة لسه.... معقول كل ده من ماس كهربى
ياااااااااااااااااااااااا ااااااااه
هو الموت قريب اوى كدة واحنا مش حاسين ... ايه قمة الغفلة دى
بس والله ربنا ارحم الراحمين

ممكن نعمل لنفسنا وقفة
وقفة بجد...... قبل ما تشوفوا اللى انا شوفته
بس يمكن ساعتها ميكنش فى فرصة تانية عشان تعملوا للحظة دى

ارجوكم ارجوكم ....... عايزاكم تعملوا لحسن الخاتمة
الموت قريب اوى والله العظيم
انا شوفته فى حياتى كدة مرتين ..... كانت اول مرة فى حادثة
ودى المرة التانية بس دى كانت اقوى
لانه فعلا كان مشهد مصغر من يوم القيامة

تخيل لو مفيش قدامك الا فرصة واحدة هتعمل ايه؟.

اختى حبيبتى ::
ارجوكى فوقى قبل ما تتاخدى على غفلة وشوفى نفسك
شوفى حجابك..شوفى سلوكك... شوفى معاملتك
ارجوكى ارجوكى اقسم بالله ما الموت الا شخص بجانبك
ينتظر الامر للقيام بعمله... بس ساعتها عمره ما هيسألك ولا هيستاذنك

يمكن الموقف اللى قابلنى فعلا غير جوايا حاجات كتيييير وفعلا خلانى اعيد
حساباتى من اول وجديد
والله العظيم واجهت الموت بدون اى مقدمات ..... فجأة كدة
(( وانذرهم يوم الحسرة اذ قضى الامر))
صدقينى والله انا كان قدامى فرصه تانية ..... بس مضمنش يمكن تكون الاخيرة

اللهم قد بلغت اللم فاشهد

وانت اخى المسلم::
ماذا عن اسلامك
هل انت مجرد شخص منسوب ليه ولا فعلا بتعمل بيه ..
الاسلامك اللى اداك نسبتك ليه بدون اى تمن .... اعزك الله به فأين انت من الاسلام
بجد..
امتى هتاخد خطوة جد.... وتغير حياتك لافضل... ويبقى هدفك رضا الله عنك
هتفضل فى سماع الاغانى لغاية امتى ..... هتفضل تايه عن الصلاة لغاية امتى
اوعى تفكر انك لسة العمر فيه باقى ..... اقسم بالله ابدا
الموت ياتى بغته

___________________

بس الحمد لله ...... حسيت ان ربنا بيحبنى
عارفين ليه ......
لانه ادانى انذار بالموت ومأخدنيش على غفلة
وسبحانه جل وعلا
كأنها رسالة من لله بتقولى
(( شوفتى الموت قريب ازاى .... الحقى اعملى له بسرعة ربنا بيحبك عشان كدة وراكى الموت شكله ايه
وراكى صورة مصغرة من يوم الحشر...ياما ناس ربنا بياخدهم غفلة على اسوا ذنوبهم من غير اى سابق انذار))

.
.
.
.
.
.
.
.
.
اللهم لك الحمد والشكر كما ينبغى لجلال وجهك وعظيم سلطانك