إكسبايرد !!!!!

إكسبايارد !!


في يوم خفيف لطيف .. كنت في إحدى المصالح الحكومية ..



وكالعادة وقفت في طابور طوله 2 كم

.. ولكن والحمد لله أخيرا نجحت في الوصول للشباك بعد 84 دقيقة من الانتظار

: .. لأجد الموظف الذي يرتدي نظارة كوباية (وليس كعبها فقط) .. ينظر لي من تحتها بقرف

ثم أخرج صوتا لا أعرف من أين خرج :


- أوراقك ؟


- اتفضل يا باشا .. أوراقي كلها جاهزة وسليمة


أخذ الأوراق وهو يواصل تلك النظرة المشمئزة .. ثم بنفس الصوت الغير معروف مصدره :


- بطاقتك ؟

- اتفضل

أخذ البطاقة ثم قلبها ودقق النظر .. ثم ألقى أمامي الأوراق والبطاقة قائلا :

- بطاقتك إكسبايارد يا أستاذه .. اللي بعده :


- استنى استنى .. دانا ما صدقت وصلت للشباك .. إيه اللي بتقوله دة ؟


- بقول لك بطاقتك إكسبايارد .. يعني منتهية الصلاحية .. انتى ما بتفهميش فرنساوي ولا إيه ؟


قولتله : لا يا اخويا كفايا انت بتفهم

- هو إيه دة يا عم .. هي برطمان مربى ؟!! منتهية الصلاحية إزاي يعني؟


- انتى ما سمعيتش القانون الجديد ؟ .. صلاحية البطاقة 7 سنوات

- طب ليه كدة ؟ .. هي بتحمض يعني ولا إيه ؟

- انتى بتهرجى ؟ .. دة القانون يا أستاذه

- طيب حضرتك أنا معايا باسبور .. ينفع ؟


- يووه .. لأ ما ينفعش

- إزاي ؟ .. دانا ممكن أستخدمه في أي دولة بالعالم

- قلت ما ينفعش .. روح اعملى بطاقة جديدة وابقى تعالى


- ماشي .. حعمل بطاقة جديدة .. وحبقى أحطها في الثلاجة أو حتى الفريزر عشان ما تحمضش




==== ============

خرجت وأنا مخنوقه جدا


.. كل يوم نتفاجئ بقانون جديد يعكنن علينا

.. وطبعا مش عايزه أقول لكم الزحمة كانت قد إيه عشان أطلع بطاقة جديدة


.. ما هو طبعا كل الناس بتعمل بطايق جديدة بدل البطايق الإكسبايرد (( يعنى منتهى الصلاحيه ))

فضلت أفكر في الموضوع دة لغاية ما وصلت البيت .. لقيت عم حسن جارنا قاعد مقرفص قدام البيت ..

وحاطط إيده على دماغه وحالته تصعب الكافر .. قربت منه :

- إيه يا عم حسن ؟ .. مالك؟


- آاه .. خلاص راح .. بعد العشرة الطويلة سابني وراح


- معلش يا عم حسن .. كلنا لها .. الأعمار بيد الله .. بس هو مين اللي مات ؟


- لا يا أستاذه .. محدش مات .. أنا بتكلم عن التاكسي بتاعي

- التاكسي ؟ .. ماله ؟ .. عمل حادثة ؟


- يا ريت .. دة زي الفل والله

- أمال فيه إيه بس ؟

- خلاص .. بقى إكسبايارد

- معقولة !! .. برضو ؟ .. إزاي يعني ؟


- دة القانون الجديد .. خلاص أي تاكسي من أيام التمانينات بقى إكسبايارد .. وبعدين العربيات كمان

- طب ليه كدة ؟


- لسة فاكرين إنها مضرة للبيئة .. قال يعني إحنا خلاص حلينا كل مشاكلنا ومافاضلش غير دي


- معلش يا عم حسن .. يتعوض برضو


- يتعوض إزاي بس .. دانا بقالي 30 سنة شغال عليه وهو زي الفل .. يعني أسرح بتوكتوك على آخر الزمن ؟



=======================


سبت عم حسن ودخلت شقتنا وأنا لسة بفكر في القوانين الجديدة بتاعة الإكسبايارد دي ..

لقيت الست والدتي بتقول :


- انت جيتى .. إزيك .. بقول لك .. عايزين نشتري تليفيزيون جديد

- ليه يا ماما ؟ .. هو بتاعنا بقى إكسبايارد ؟

- آه .. انت قريت الخبر ولا إيه ؟

- لا ما قريتش حاجة .. أنا كنت بهزر

- طب امسكى الجرنان دة واقراءى

لقيت خبر في الجرنان إن التليفيزيونات القديمة مش حتبقى شغالة من سنة 2010 .. لأنهم حيركبوا نظام رقمي


- شفتي يا ماما .. كل حاجة في البلد بقت إكسبايارد


- آه يابنتي .. مش بعيد يقولولك ابقى هاتلك أم جديدة عشان أمك بقت إكسبايارد

. . ولا حتى يعملوا فترة صلاحية لكل واحدة .. وجوزها يغيرها بعد كام سنة

- آه .. ولا يحددوا عمر لكل بني آدم لو عداه ياخد إعدام ..

أصلنا خلاص


بقينا إكسبايارد !!!

يا فرحه امنا بينا كلنا هههههه