[size=20pt]السلام عليكم ورحمة الله وبركاته

يارب تكونو بخير ويارب محدش فيكو يكون واصل للمرحلة اللي انا فيها
برغم اني اشك
كلنا بقينا كدة، كل المصريين بقو كدة
انا مش عارفة اقول ايه حاسة اني مخنوقة قوي
ايه البلد دي... ايه الحكومة دي؟ في ايه؟
كدب كدب كدب ونفاق طول محنا قاعدين
اعصابي تعبت بجد
بيبقى نفسي ابوس رجل ابويا علشان يطفي التليفزيون ولا اسمع ولا اشوف اي حاجة وهو شغال طول الوقت
طول عمري طوووووول عمري بكره نشرات الاخبار والبرامج الحوارية مبحبش السياسة وكنت فاكرة ان ده جهل مني وكنت كل مشوف حد مهتم بسياسة بلده يعجبني واقول نفسي ابقى زيه
مكنتش اعرف عن مصر غير اناشيد.. كنت دايما اغني في المدرسة لمصر في الحفلات واللقاءات واتنطط هنا وهنا، وكنت بغني للريس كنت بحبه والله قوي، مكنتش حاجة في بالي مشوهه حبي ليه ولمصر خالص خالص، كنت بحبه ببراءة.. بابا حسني وماما سوزان ومصر وطني وبلدي
وكبرت اهه وشفت بقى وبقيت اعرف في السياسة.. سياسة البلد دي.. مصر، ياريتني معرفتش حاجة وكنت فضلت حتى جاهلة ياريتني متعلمت اقرا ولا اكتب ولا افهم حتى، كنت اتمنى افضل على عمايا ولا اني افوق والاقي نفسي عايشة كدة...

ايه اللي بيحصل حوالينا ده؟ بحس ان والله العظيم لو حكومتنا دي كانت مؤلفة من شوية عيال في حضانة كانو عرفو يتصرفو عن كدة في اي مشكلة بتواجهنا
كل اللي بيحصل ده والحكومة مش بتعمل اي حاجة غير استغلال الازمات والنصب وان كل واحد فيهم يرمي المسئولية ع التاني...

بعد م الريس فضل ساكت ساكت يوم مربنا كرمه وطلعله بمنظر عمل اجتماع مع وزير الصحة والتعليم وقال فيه انا مليش دعوة تقفلو المدارس تاجلو الدراسة مليش دعوة المهم صحة ابنائي الطلاب وصحة المواطنين..
يعني رمى عليهم المسئولية بالثلث وعمل اللي عليه...


والهبل اشتغل بقى..
قمة الغباء والله العظيم.. قمة الغباء
قرارات بتطلع تحرق الدم..
فتوى من المفتي باجازة دفن ضحايا المرض في مقابر جماعية والغريبة ان ده كان اول قرار...
كياس تتوزع ع المشفيات علشان اللي يموت يتحط فيها...
الدراسة.. تاجيل اسبوع قال يعني هو ده اللي هيخليهم يستعدو وقال يعني استعدو فعلا ما شاء الله...
مزيع يطلع يمسك وزير فيهم علشان يقول انا متفائل وشوية انا خايف واحنا الشعب الغلبان اللي مستني الوزير يطلع في برنامج علشان ينقلنا مشاعره واستعداداته ويقول وزعت ملصقات وكمامات ع العيال الصغيرة وعملت غرفة عزل....

تمااااااام غرفة عزل...
انا امي ناظرة في مدرسة ومقلكومش على غرفة العزل بتاعتهم.. اقسم بالله هي عبارة عن سرير كان قديم في اوضة العمال اتربط بخيوط واتلصم واتحط فين؟؟ في اوضة المدير والناظر.. الاوضه اللي فيها مكتب امي وكلها قرارات مديرية وتنظيم ادارة وياريت كان بايد ماما ولا غيرها اي حاجة غير ان كل اللي حصل ان منسقين جم م الادارة وهما اللي رتبو كدة لما ملقيوش مكان في المدرسة اللي يعتبر مستواها متوووسط بل فوق الموسط بالنسبة ل.. خرابات هنا مش هقول مدارس....
والسرير ده طبعا بقى مقعد كل اللي يدخل الاوضه م المدرسين يقعد عليه يريح شوية عادي خااااااااالص...
وبقى كل واحد يتبرع بملاية تتفرش عليه والاوضه لا تصلح ابدا تهويتها ولا موقعها انها تكون غرفة عزل
اوضة المديرين اساسا يا ناااااااااس
ده انا بقول لامي والله لو كانو عملو خيمة في الحوش للتمريض كانت بقت اصح من كدة....

مهاااااااااازل مهاااااااااازل
كل اللي فالحين فيه يجيبو ورق ويحطو خطط 1 2 3 4 وبنود كتيييير، وبكدة يبقى تمام والامور زي الفل

بعد ماوزير التعليم يقرر انه الدراسة خلاص 3/10 (ويحذر) اولياء الامور من عدم ارسال ابناءهم للمدارس ويجزم وياكد انه مقلش كدة غير لما اتاكد بنفسه ان كل المدارس على مستوى الجمهورية مستعدة في الوقت اللي كانت المدرسة اللي شغالة فيها امي وبيدرس اخويا فيها في فترتها التانية متعملتش فيها (غرفة العزل)

ولما المذيعة تقوله اولياء الامور خايفين يقولها انا برضه عندي اولاد وهوديهم مدارسهم
دي اللي هي مدارس ايه؟ بتوديهم فين حضرتك؟ مدرسة في الارياف ولا في الصعيد ولا في قرية ايه ؟

ازاي وزير يطلع قرار يقول فيه لما يبقى عدد الاصابات 10 مليون نبقى نقفل المدارس؟
ازاي مستشار من وزارة الصحة ييجي يقول احنا مش عاوزين ناجل علشان الفيرس دلوقت خفيف خلو العيال ياخدوه خفيف قبل مايتشد؟

حصل ايه؟ حصل ايه من ساعة م الدراسة اتأجلت

اتقسمو العيال بقوا شوية يروحو سبت واتنين واربع وشوية يروحو حد وتلات وخميس؟
بقو 30 في الفصل بدل 60؟
ايه الفرق؟
اللي خلى الفيرس بيتنقل من شخص للتاني على مسافة مترييين، في مسافة مترين بين كل عيل والتاني؟ في؟
لا تبقى مفرقتش..
اديت لولد صغير كمامة؟ يافرحتك يا اخي
وزعت الملصقات والنشرات تقولهم كحو واعطسو جوا المنديل؟ مبرووووووك
وحاجات كتييييير وقرارات كتييير كانت نزيهة بجد والواحد ( قرفاااااااان) يقول...


الحج..

عملت ايه؟
جبت مصل خايف منه يجيب للناس شلل؟
جبته ليه؟
طبعا مش مشكلة ميهمكش يتشلو المهم ايه؟
المهم يكتبو على نفسهم تعهد ان الحكومة ملهاش دعوة
طيب يا اخي متكتبهم على نفسهم تعهد انهم ميخدوش المصل.. والحكومة ملهاش دعوة!
بقى مياخدش الانفلونزا ويعيش مشلول؟ لا ياخدها ويموت بيها حتى ولا انه يتشل في يوم م الايام او يكون عرضه لاي سوء..
ميهمهمش حياة الناس؟
عاوزين يخفونا؟

معملتش الحكومة حاجة حتى الفلوس والله مصرفت اي حاجة ملناش ميزانية ندير بيها الازمات
ممكن ندعم الفن والفنانين
ممكن نفتح استاد نستضيف فيه كاس العالم للشباب
مهرجانات وسفريات وماتشات لينا نشطات كتيييييييير نصرف عليها
والحل انهم نهبو م الحجاج فلوس بالعبط


الناس لما تيجي تقرر توجه وتفتح معامل ودعم طبي
بدل متبني مقبرة تبني معمل واتنين وعشرة
لو معندكش كوادر ودكاترة استورد حتى
لقيت نفسك مش مستعد يبقى تخرس خاااااااالص متشلش الناس
تقفل المدارس وتقفل كل حاجة لغاية متعملك اخر


انا تعبانة قوي اسفة بجد اني اتكلمت بالاسلوب ده بس انا حالتي وحشة بجد
وكمان انا في قلب الحدث قوي وكل حاجة مساني من كل حتة
اخويا الصغير في مدرسة وامي ناظرة وانا في جامعة واللي اهم بقى....
ان بعد مبويا وامي قدمو كتيييير علشان يطلعو الحج
طلعو في القرعة السنة دي
والمفروض انهم رايحين
ومتتخيلوش كمية النصب اللي حصلت عليهم دي قصة لوحدها
ابسط حاجة اقولهالكم انهم بعد ما الحجاج عملو الكشف الطبي برسوم كل واحد ب100
قالو لازم يعملو واحد تاني وياخدو بعده شهادة انهم لايقين وهيتكشف على 8 امراض وهيكون فحص شاااااامل برسوم 306 جنيه للفرد
وانا ابويا عنده سكر خااف
فضل ايام يلعب في الجرعات بتاعت الانسولين
ويزود وينقص
وتعب كذا مرة قوي بسبب كدة ووصل لمراحل صعبة وكنا في رمضان
وبعد ماراحو
اكتشفو انه كدب
يدوب واحد بيقيس سكر وضغط
وكان في حالات السكر عندها مرتفع جداااا
كله خد لااائق
كله الناس خدت لائق عادي خالص
لا كشف فيرس سي ولا دي ولا قلب ولا الامراض اللي متفبركة دي بيقولو عليها
ابويا بعد الي حصل ده قال انا عمري في حياتي حسيت اني تعبان غير في الفترة دي، طول عمري عندي سكر ومش حاسس انه مشكله!
والدكتور يضحك ويدي لائق وياخد الفلوس
والعيب مش في الدكتور دول ال306 جنيه دول رسمي يعني هيروحو للحكومة
تخيلو بقى 306 من حوالي 70000 حاج على مستوى الجمهورية اتاخدت بالطريقة دي؟
يبقى ايه؟ الحكومة هي اللي صرفت؟

ليه كدة احنا الحمدلله ربنا ميسر امورنا
بس الناس الغلابة؟ وهما الاكترية؟
والله ابويا وامي كانو بيحكولي مناظر..
مش عارفة اقول ايه والله

البلد دي اتسرقت كتير على مدى تاريخها بس دلوقت بقت عيني عينك لدرجة تقهر تقهر
انا اه لو لم اكن مصريا لوددت ان اكون مصريا، بس مش مصريا مقهورا
ياريتني مكنت مصرية وعلى عيني اقول كدة بس ياريتني مكنت مصرية

اي حد مننا ليه مشاكله والله ومش بيبقى ناقص
انا وصلت لمرحلة من الياس خلتني مش طايقة اي حاجة اي اي حاجة
كل حاجة حواليا مدايقاني

تصدقو بالله كل الكلام اللي كتبته ده؟
ووالله عندي كلام اكتر بس كفاية كدة عليكو قوووووي
انا اسفة بجدبس محدش يقولي كلمة اصبر بيها خاااااااااالص
محدش يصبرني خالص لاني عديت المرحلة دي محدش يواسيني علشان خاطري
ادعولي بس ربنا يفرج كربي

اخر حاجة هقولها

حسبي الله ونعم الوكيل في اللي كرهونا في نفسنا وفي بلدنا اللي ملهاش ذنب

وربنا يرجعني اصبر تاني واعدي
وانتو كمان ربنا يوفقكو ويصبركو ويبارك فيكو
انا اسفة قوي


اه صحيح نسيت اقول حاجة
فاكرين الموضوع اللي عملته قبله عن زيارة الوزير والحكاية اللي حكتهالكم؟
فاكرين المخبز اللي كان محور الزيارة واكيد بعض منكو شافه في التليفزيون
المخبز ده اتقفل دلوقت وبقاله اكتر من اربع شهور مقفول والناس بتتشحطط علشان تاكل عيالها لقمة
ولا تعليق


حسبنا الله ونعم الوكيل
حسبنا الله ونعم الوكيل
حسبنا اله ونعم الوكيل
[/size]