متعلق بقشاية...

بغنى للحياه والموت غنواية
ومنايا...
يضحك قلبى قبل ما اموت
ضحكاية

بغنى للبلح والتوت
واغنى للعيون السود
وليكى غنايا
وانا بين الحياه والموت...

أحبك لو تبصيلى بنظرة عطف...

واشتاقلك أنا واحتاس
واحطك ايوا تاج الراس
واحتاجلك وادوب وأهيم
واغنيلك مواويلى
وأقوم من نومى اندهلك
واراعيكى بكل احساس
واكون ليكى

كدا وخلاص!!

وأما لو تبصيلى بنظرة شوق....

أفوت الدنيا وأجيلك
وأفوت نفسى
أفوت ناسى
وأموت نفسى م التدوير
على حاجة توفيكى
وأرجعلك وأنا المحقوق....

ولو تصفيلى أنسى الكون
ولو تشكى أبات مهموم
ما انا العاشق

وانا المحروم....

براقبك من بعيد لبعيد
وامنى نفسى بالمواعيد
وبالايام مع الاحلام
وخايف بكرة ينسانى
وتبعد خطوتى عنك
مايبقاش فى أمل تانى
وما اتهناش بيوم العيد
وكمل ف الحياة دى وحيد

وأخاف لو تبصيلى بنظرة عشق....
أتشاهد واطب أموت!!


وانتى عليا ليه قاسية ونساية؟!!

وانا اللى بيكى متعلق....

باين متعلق بقشاية
!!