عايش ليه
انت عايش ليه
بجد مش باهزر ولا بانكد ولا باهيس حتي
ماتقفلش وتقول يا عم ده هايخنقني عالصبح
بجد يعني بتعمل ايه؟
فكر كده
بتشتغل وبتنتج؟
انتاجك ده هايتسرق
بتروح شغلك ازاي بالقطر؟
هاتموت محروق
علي طريق سريع؟هاتموت في حادثة
طيب بتدون علشان تغير وتتغير وترضي ضميرك وتعبر عن رأيك وبتاع؟
هاتتسرق زي مدونين كتير اشمعنا انت يعني
طيب لو بتدرس
جامعة؟
في الاخر الفشلة هايلموا المناهج وهاتتساووا
ممكن واحد طول عمره مايعرفش حاجة يجيب واسطة ويديك علي قفاك وياخد مكانك في الشغل
في ثانوية عامة؟
بتذاكر ليه؟
فكر كده شوية
مالهاش لازمة وانت عارف كده كويس
متجوز وعايش لعيالك؟
ممكن يتداسوا وهم جايين من المدرسة
او ممكن يبوظوا ويفشلوا
هاتدخلهم ازهر علشان يطلعوا متدينين؟
مدير المدرسة هايغتصبهم
طيب نسيب البلد يا رجالة ونسيبها للي بوظوها قبل مايبوظونا؟
لو معاك فلوس وركبت طيارة ممكن تقع بيك
لو هاتركب عبارة هاتولع بيك في البحر واللي موتك مش هايحصلوا اي حاجة بالعكس هايروح يتفسح في اروروبا علي مالعاصفة تهدي
طيب هاتولع انت في نفسك؟
هاتبقي وفرت عليهم والمصريين نقصوا واحد منغير ما يتعبوا
ماتقوليش انت اللي اهدي
اهدي انت بس وفكر بجد عايش ليه؟!
مش عارف
طب مانا عارف انك مش عارف
او ممكن ماكنش عارف.بجد مابقتش عارف