من يومين كده كنت بكلم مع واحد صاحبى امريكى على الميل وكعادتنا فى كل مره بنكلم فى الحاجات اللى ممكن اى حد مصرى يكلم فيها مع اى حد امريكى (نظرة الامريكان للعرب ونظرة العرب للامريكان).
ولكن فى المره دى فاجأنى بعبارة احرجتنى جدا ولاول مره معرفش ارد عليه السؤال كان بيقول:


انتم قدمتم ايه للبشريه خلال الثلاثة قرون الماضيه؟

اول ما سألنى اتحركت عندى النزعه التهجيسيه العربيه والتى يبدو لى اننى اكتسبتها من زعماء الحزب الوطنى فهم يعرفون كل شئ ويملكون اجابات

ومبررات لكل شئ ... وسارعت بالاجابه ..... احنا قدمنا حاجات كتير زى ... وبعدين ملقتش حاجه أقولها.

بجد معرفتش ارد وسألت نفسى سؤال معرفتش اجاوب عليه اشمعنى الثلاثة قرون ليه مش الاربعه او الخمسه ليه هو اختار الثلاثة قرون ما علينا....


ياه احنا مقدمناش حاجه للبشريه الفتره دى كلها احنا للدرجه دى عاله على الشعوب المتقدمه

ثلاثة قرون واحنا متخلفين ياه ده احنا متخلفين كتير قوى ياجماعه.

قعدت افكر كده مع نفسى احنا ليه متخلفين ؟

ايه الاسباب اللى خلتنا متخلفين للدرجه دى؟

ولو حتى عرفت السبب هيكون الحل ايه؟
................
تانى يوم روحت الشغل شوية ورق وكتبت فى كل ورقه منهم سؤال

احنا ليه متخلفين كعرب

ووزعت الورق ده على زملائى فى الشغل

وهقول لكم الاجابات بتاعتهم


اول واحد


احنا متخلفين ليه كعرب
اسباب عديده منها
1/ عدم وجود هدف للامة العربية.
2/حب كل واحد من العرب للزعامة الشخصية.
3/عدم احتضان النوابغ من ابناء الامه العربيه.
4/الغفلة عن مخططات الاعداء.
5/ عدم الانضباط فى تنفي> القانون (المجامله والمحسوبيه)
...............................
...


تانى واحد

احنا متخلفين ليه كعرب؟
السعى وراء افكار الغرب كلها بدون فلترتها.
الكسل وعدم وجود القوة الدافعه للتعلم والابتكار.
الاعتماد على الغير فى سد احتياجاتهم الاوليه.

.................................


تالت واحد
ليه احنا متخلفين كعرب؟
سيطرة عدد قليل على الحكم
الاهتمام بالشكل وليس المضمون
عزل الحكم عن الشعب وعدم الاهتمام بالشعب
(انا عن نفسى مفهمتش منه حاجه بس نقلت كلامه للامانه)

........................................
رابع واحد
احنا متخلفين ليه كعرب؟
عشان مش عاوزين نفكر
(مكتبش حاجه تانى)

...........................
خامس واحد
احنا متخلفين ليه كعرب؟
مرديش ياخد الورقه من اساسه وقالى مش عارف انت هتدخلنا فى متاهات.

.................................
سادس واحد
ليه احنا كعرب متخلفين؟
مأخدش الورق وقالى ياعمنا الاسئله دى هى التخلف بعينه ما الدنيا ماشيه زى الفل ايه؟
وقطر الساعة خمسة بيجى الساعه سته

...........................
سابع واحد
ليه احنا متخلفين كعرب؟
الامبالاة وإهمال العمل
التواكل على الغير
ننتظر من الحكومه ان تغيرنا ونحن لانساهم فى >لك
عدم البحث عن التميز فى اى شئ نفعله (على قد فلوسك)

................................................
ثامن واحد
احنا مش متخلفين احنا متقدمين ومتحضرين كمان ومش ناقصنا الا الامكانيات سواء مادية او معنويه احنا احسن من غيرنا بكتير بس بصراحه عندنا نقص فى الضمير.
..........................
تاسع واحد
احنا ليه متخلفين كعرب؟
بسبب اهملنا لتعاليم ديننا وانتشار الرشوه والفساد واتباع نظام الوتين حتى فى التعليم وعدم الاهتمام بالقراءة

.................................................. .................................................. ............................
ده كان رأى زملائى فى الشغل
انت بقى من وجهة نظرك ايه هى اسباب التخلف اللى احنا فيه ده؟
وايه الحل ازاى نقدر نقف على رجلينا تانى ويبقى لينا كاين وتأثير فى العالم.

تحيتى للجميع وفى انتظار وجهات النظر


طبعا الموضوع منقول