أنا قلمى عبدك

وان حتى عاندك

لكنه على طول ينحنى

طالب رضاكى وراجى ودك

ياللى انتى منحوتة ف روحى

مش عارف اكتب الا عنك

ما انا قلبى اصلو كان يوم ف قلبك

وطول عمرى أسير جمايلك


نفسى اقلك ارتاحى حبة

مش كل حبة ازيد ف حملك

بارتاح ف حضنك

ولما بابعد باحلم أضمك

بلاقى نفسى بس اما اشوفك

ما دمى اصلو كان هوا دمك

وحتى روحى واخدها منك

دا انا حتى ربى عرفتو عنك


انا ايه فاضلى ف الدنيا بعدك

ما تشدى حيلك

ولا اجيلك

واشيل همى من وسط همك

يا امى هانت ولم تهونى

والسكة بانت شافت عيونى

وحلمى بردو موصول بحلمك

وبردو يرجع الفضل ليكى

دا انا كلى منك