بابا طلق امى من 8 سنين كدا

كنت لسة عندى7 سنين

كنت فى المدرسة متفوقة وبتعلم زى بقية خلق الله



وكان عندى اخ اكبر منى عنده10 سنين

ولما حصل الطلاق

بابا اتجوز وحدة تانية

وامى اتجوزت راجل تانى

هما اتجوزو وكل واحد راح فى بيته

وسابونى انا واخويا نتربى مع واحد صاحب بابا

كان عنده اولاد كبار ومتجوزين وهو كان راجل صاحب عاية محتاج حد يساعده او يناوله حاجة

وكان بيعلمنا وحبيناه وحسينا فيه يعنى ايه كلمة بابا

وعشنا معاه سنتين لحد ما الراجل دا مات

واولاده ورثو البيت وطردونا وقعدونا فى أوضة ع السطح



وبقينا مقطوعين من شجرة ومحدش بيسأل فينا

بعد كدااخويا ساب المدرسة علشان يشتغل ويصرف عليا انا وهو

اشتغل مرة كمسرى على ميكروباص ومرة اشتغل ميكانيكى واشتغل فى فرن عيش

وكان فى كل مرة بيطرد من الشغل علشان صحاب الشغل كانو بيقولو ان عضمه لسة طرى ومش انفعهم فى الشغل

وربنا كرمه واشتغل مع واحد نجار واتعلم منه واستمر معاه وعرف ناس كتيرة

وميت معاهم وفى مرة لقى واحد بيعزم عليه بسجارة رحاح واخدها وشاربها ما هو لو مش شربها هيقول عليه عيل

وشوية شوية شرب ممنوعات وادمنها وسرق الراجل صاحب الشغل وبقى بتأخر عليه وطرده من الشغل

وانا كنت فى الاعدادية وعايزة فلوس علشان اشترى ملخصات واروح عند مدرسين

حاول يرجع الشغل تانى معرفش ......وكان قاعد فى سهرة مع اصحابه وقعدة كيف الساعة 3 قبل الفجر

لقينا شوية شباب من اللى هما ولاد الناس الاكابر دول ماشيين فى الشارع

رواح ماسك سلاح علشان يقلبهم ويصرف على مزاجه وانا طبعا

راح واحد منهم عاند معاه وحاول يمسك السلاح من ايدى رحت معوره ومكانش قصده انه يعوره

كان قصده يهوشه علشان يبعد ايده عنه .....لقاه مات وراح فيها




________________________________________


بعد دا كله لقيت نفسى قومت من النوم
قومت اشوف بابا وماما
والحمد لله لقيتهم موجودين



غمضت عينى وفكرت


انا لو بابا طلق امى هيحصلى ايه؟!!!


عايزاكم تتناقشو معايا فى الموضوع دا


ابناء الطلاق


مسئولية مين ؟


وحقهم مين هيجيبو؟


نعاملهم ازاى؟


دور المدارس والجمعيات فى تربيتهم وتعليمهم ؟


وبما اننا من اكبر الدول اللى بيحصل فيها حالات طلاق ...مش عارف الاحصائيات بالظبط قد ايه

لكن اللى اعرفه ان كل 6 دقايق بيحصل حالة طلاق فى مصر

واكيد معظم المطلقين عندهم اولاد

طيب الولد او البنت دا لو عاش مع شخص واحد من الطرفين ....اكيد هيكون تعبان نفسيا ومحتاج رعاية ومحتاج تكامل الطرفين ومشاركتهم مع بعض

وحاجات كتير عايزين نتكلم عليها هنا فى الموضوع دا

مش مهم نتكلم عن الاب والام اللى بيطلقو بعض ....دول يولعو بجاز

المهم نتكلم عن اطفالهم اللى هما فى حاجة لحد يربيهم ويساعدهم على التعليم علشان يستمرو فى الحياة



اسفه على الاطالة



القصة عبارة عن قصة وهمية تم صياغتها لتخدم الموضوع


noraaaaaaaaaaaaaaaaam