سؤال سألته لنفسى أولا.. ولكل اصحابى وزمايلى ثانيا

فى البداية احب اوضح يعنى ايه كيس جوافه ؟ والله الموضوع ده لقيت انه واخد جزء كبير من تفكير الشله الحلوة " يظهر ان الدنيا عملتها مع شله افتكاسة " وكذا واحد من اصحابى كان حكالى على كام موقف حس فيه انه كيس جوافه.

واما سألت يعنى ايه كيس جوافه ؟…..عرفت الاتى… يعنى اما تكون مش فاهم حاجه.. او وقعت فى موقف محرج …. او اة شخص تجاهلك او تجاهل وجودك فى مكان ما … او حتى وانت ماشى مع البنت بتاعتك " الجيرل فرند" وحد عاكسها وانت كأنك (قرنى) مع احترامى لسعادتك وهو ومحترمش وجودك .. وانت مضربتوش …وعملت فيها ( متحضر) ساعتها طبعا هتكون … كيس جوافه…. او حتى وانت قاعد معاها فى الكافيه اللى فى المول " اياه" وحد نزل عليكو زى " البراشوط" وكان يعرفها وفضل يتكلم لو تتكلم معاها …. وسلامات وطيبون… وانت بتبص فى ساعتك او بتلعب فى موبايلك …وطبعا هتكون حاسس انك ..كيس جوافه…

مش ده المهم.. المهم فى الموضوع ده واللى شاغلنى فعلا ان طبعا احساسك بكونك " كيس جوافه " طبعا احساس صعب وكله غيظ وحرقه دم….طب ليه ؟!!!

ما تخلى روحك رياضية وتحاول تتأقلم مع الموقف "النقرة- الدوحديرة" اللى انت وقعت فيها …..طبعا مش كل المواقف …..المواقف المتعلقة بالكرامة لازم تاخد قرارك على حسب ثقافتك وتفكيرك وتربيتك وبما يتناسب مع اخلاقك ايا كانت ( ويا ريت تكون اخلاق عالية_ مش ……)

ويا ريت بقى نسيب الجوافه فى حالها لآن الجوافة اشتكت يا جدعااااااااان ويا ريت لو وقعت فى موقف بايخ او حصلتلك مشكله فى منتهى البواخه….يا ريت بلاش (تأنتخ) وفكر شوية مين عارف ….لعل وعسى