من واقع زيارة شخصية لمعرض الكتاب بصفة تكررت مرتين استطعت تصنيف البنات اللى كانوا فى معرض الكتاب الدولى ال39 بالقاهرة :
1-البنت العنيدة :
ودى تلاقيها عند روايات المغامرات زى رجل المستحيل وارسين لوبين او رامبو وماشية تلطش فى خلق الله ومبدأها لا محبة الا بعد عداوة علشان كده اول ماتشوفها تلطشها على طول.
2-البنت الثقيلة:
حتحس انها صعبة قوى وكلها عقد وتلاكيك وماسكة كتاب فى ايديها وعاملة مثقفة وتبصلك من فوق لتحت(تجربة شخصية) وممكن تكلمها عن النسبية لانتشتين او حتى عن ابى العلاء المعرى احسنلك نفضلها.
3-البنت القصيرة:
احترس من كل من اقترب من الارض يعنى بلاش ميكى وسمير عشان هما بيعيشوا الدور موت ولو عايز تكلمهم عليك بالمصاصات والقصص العاطفية وخليك منبهر بكل كتاب تمسكة
4 - البنت الثرثارة:
اعمل نفسك ال ايه عارف الدنيا كلها وكلمها عن الاشىء والاوجود وهى حتمشى معاك موت فى الخط ده على طول وعرفها ان طريقتها فى الحياة تستحق الدراسة وطبعا المعرض مليان بالكتب دى
5- البنت الروشة اللعوب:
وتلاقها فى الكافتيريات او بين ممرات السرايات تمشى بخفة ودلع وعلى طول ايديها فى شعرها ليه الله اعلم وماسكة دبدوب فى حضنها زى مايكون حامل فيه بس خد بالك منها ممكن تتوهك(تجربة شخصية)
البنت المغرورة:
ودى تحسسك انها شغالة فى وكالة الفضاء وجاية مهمة رسمية غصبن عنها اجيبلك من الاخر الكود بتاعها : حبة ملاغية بعقل ورسم حلو على كوليكشن جامد من الكلام الحلو اللى بتصدقه موت وحسسها انك حبيت الجاذبية الارضية لان لولاها كانت هى فى السما مع القمر ومش ماشية معاك

انا عاوز اعرف رأى أى حد على الموقع( مش الولاد بس ) عن الموضوع ده