طلعتلنا الحكومة في مقدار جديد متمثل في وزراة النقل و المواصلات و بالذات السكك الحديد في طوفان من الاعلانات
يعني ايه معنى وزارة الضرايب و عبد القوي ابو نوتة بمبي بسوستة
حملة عجيبة جدا
متمثلة في مجموعتين

المجموعة الاولى
عبارة عن اعلانات تحفة اكتشفت ان القطارات هي افضل وسيلة مواصلات في الكون

واحد قاعد مع مراته و الا معرفش مين في مكان شيك و لسة ما شربتش العصير
و بيقولها يلا بقى نقوم نمشي عشان انا مسافر بكرة و حتفعص في ( الميكروباز)
لا و ايه المسافة بينه و بين كتف اللي جمبة مش عارفة كام سم

ولد تاني قاعد على البحر مع اصحابة بيشكي همه و يقولهم انه وشه لزق في رجله من الشنط اللي كانت في عربيتهم الملاكي
فلو سافر بالقطر كان لعب في مراجيح السبتية اللي في القطر و مكنش اتبهدل في عربيتهم و دة يا عيني المسافة بين رجه ووشه سالب كذا سم

واحدة مسافرة في الاتوبيس و روكبها يا عيني حتخرج من الكرسي اللي قدامها
فلو سافرت بالقطر كانت مدت رجليها و ارتاحت

و دي كانت المجموعة الاولى اللي كان ناقص تقول فيها ان الاستاذ محسن الفنجري رجل الاعمال الشهير مسافر بيمضي عقد في لندن لكن لان الطيران مخيف و المسافة بينه و بين اللي جمبة كبيرة فركب القطر عشان الونس

او مثلا
كايل اكس واي و هو جاي في مركبته الفضائية كان مخنوق لان الاشكال فيها ما تسرش القلب فلو جه من المريخ بالقطر كان شاف المناظر اللي تشرح القلب الحزين

معرفش بيجيبوا الافكار دي منين

هي الناس لحقت تنسى حريقة القطر
و الا الست اللي وقعت من ارضية حمام القطر !!
الحملة التانية بقى و هي فاكهة رمضان
المصري اللي على حق يقول للغلط لأ

وزارة المواصلات خلاص رمت طوبتنا و مننا فينا بقى نتصرف

يا جماعة القطارات الجديدة دي بتاعتكم

شايف الواد دة اللي بيغز الكرسي بتاع القطر الكرسي دة بتاعك يا رأفت
و مصر امانة في ايديك

و الا الست دي اللي بتقلي بتنجان و طعمية في نص القطر
الطعمية دي بتاعتك يامحسن بية و سمعني سلام رأفت الهجان

و الا الولد اللي بيخربش في الشباك
و الا اللي جايب صاحبه و يسطح فوق القطر
و الا الحرامي اللي سرق حنفيتك يا مغفل
لالالالالالالالالالالالال الالالالالالالا
انت المسئول و خلاص حنعينك مخبر للوزارة
احنا خلاص مالناش دعوة القطارات الجديدة دي بتاعتكم و بفلوسكم
يبقى تاخدوا بالكم منها و تفضلوا تلألأوا طول النهار
لان المصري معروف بقوته و جبروته (ووثيق) من الفوز

لما كنا احنا المسئولين القطارات كانت بتولع و بتتقلب و الحواداث كانت متلتلة
فاحنا خلاص شيلنا ادينا و انت المسئول اهو
و طلعنهالك في التليفزيون وورينا شطارتك

لا بقى معلش يا حكومة
انا مقدرش اقول لواحد ماسك مطوة و بيخرم في الكرسي لا
ما يمكن يغزني انا

فين العساكر بتوعك
فين الشرطة
فين المخبرين
فين الرقابة

مش معنى انك خدت فلوسنا و جبت بيها قطرين جداد و بباقي الفلوس عملت حملة بملايين الجنيهات ان انا اللي اتصدى للبلطجي اللي معاه مطوة و الا الست اللي ممكن تحدفني بالباجور

الحملة دي المفروض متعملهاش وزارة المواصلات
الحملة دي تبقى حمله للتوعية و تعليم الادب و الذوق للناس


بس بصراحة اغرب حاجة في الحملة دي ان الحكومة باقلها سنين بتعلمنا تقول نـــــــــــــــــعم
و المرة دي بتعلمنا نقول لأ
فمش بعيد الحملة الجاية تخلينا نقول ( كفاية)

منقول