اسلمى يا مصر إننى الفدا
وادفعى حاجة نجيب بيها الغدا
إدفعى يا مصر ياما كتير دفعنا
من دمانا
من عرقنا
من دموعنا
بعدما استجدعنا ضعنا
والكفاح.. ولا نفعنا
ع الرصيف واقفين بنشحت الغدا
قلتى ياللا اشتراكية.. قلنا عال
آهو نضمن رزقنا ورزق العيال
حلمنا بالعدل كان آخر «جمال»
لحظة حلوة
زى غنوة
بعدها الكوابيس وعار الاحتلال
تسلمى م الشريا نور العيون
ترخص الأرواح ولا عرضك يهون
ولا نرضى يشمتوا فيك العدا
قلتى ياللا ديمقراطية.. قلنا هيا
طلعت الحرية مقلب حرامية:
انتخابات مسرحية
برلمانات بلطجية
فضائيات دوشجية
والحكاية هيه هيه
ع الرصيف واقفين بنشحت الغدا
تسلمى وتعيشى.. لكن مش كده
أنا من طول انتظارى شعرى شاب
إدفعى يا مصر دفعة ع الحساب:
يا نزاهة الانتخاب
يا وظايف للشباب
يا مساكن للى مسكنهم خراب
وإن ما كانشى.. إدفعى حق الغدا
تدفعى ما تدفعيش
أنا غير حضنك ماليش
وف ضيا اسمك باعيش
إسلمى.. وخلى علينا إحنا الغدا
نقلا من المصري اليوم