انا معرفش اصل الموضوع مين الي كتبه بس عالعموم يبدوا ان الكاتب الاصلي : أبو مجد الدين

بسم الله الرحمن الرحيم

ولا ليمون ولا عسل ولا دواء ولا اى شىء نافع

اتشووووووووووه

عذرا هذه عطسه اجباريه تخرج من انفى كل خمس دقائق
ليهنئنى العارفون ببواطن الامور فيما يختص بالبرد وخلافه ويقولون لى
حلوه كده -- كده يبقى البرد بيطلع !!!!
وهاقد مره اسبوع بحاله ولم يطلع
اتشووووووووه
اتشى

وكأنه عفريت لابسنى وليس فيروسا
وهذا يقول لى : اعطس ماتحبسشى العطسه
ده ف التشاطيب
كح !!!
كح
كح



قال لى احدهم

سيبك من الدوا
البرد عاوز تتكلفت له كويس بكام بطانيه ولحاف لحد ماتعرق جامد
عرقت !!
حتقوم تلاقى نفسك زى الحصان ....
وعملتها
وقعدت طول الليل سابح ف بحيره م العرق كأنى سمك مشوى ملفوف ف جرايد
ومكانش ناقصنى غير شوية ملح لاتحول كأى سمكايه بورى مفتخره فى لمح البصر
وقممت فى وهن كسمكه مخليه فصصوها ومصمصوها لألقى على نفسى النظره الاخيره متأملا شحوبى وهزالى والهالات السوداء التى تحيط بعينى الغائرتين
ولم تفلح المعرقه فى ان يطلع البرد من جتتى



قالوا لى

شوف ... البرد عاوز نوم
البرد فعلا علاجه انك تنام
لانك لما بتتحرك بتهيج الفيروس
انما لو نمت الفيروس بينام هوه كمان
وكأى دكتور زى حالاتى استمعت لتلك النظريه واستغربت
ومع ذلك سمعت الكلام
وقررت انى انام حتى يموت الفيروس كمدا ويموت ويشبع موووووووووت
بقالى يومين نايم
ومع ذلك اخذ الفيروس يصول ويجول ويمرح فى جتتى وعظامى ومناخيرى وحلقى بكل شيطانيه



الى ان اتى احدهم وقال لى

انت مالت عامل ف نفسك كده ليه ؟
ماهو ده اللى مخلى البرد مش عاوز يخرج من جتتك
البرد عاوز اللى يقاومه
قوم وانزل واتحرك وانساه
انا عندى برد اهوه
علاجه حاجه واحده
مناديل ورق فى جيبك
واديله وقته وهوه هيطلع لوحده
قوم ياراجل ايه ده ؟؟

قمت وخبطت على صدرى خبطه طرزانيه كأى رياضى محترف

ثم قفزت من على السرسر وكانى فى حلبة مصارعه مع الفيروس
وشعرت بأن روح الفانله الحمرا وامجاد صالح سليم تسكننى الان
ملعون ابو الرقده
يلا بينا
ف الطريق حيانى نجم الشمس بشعاع ضعيف .. سرعان مااختفى على الفور
وكأن الشمس تقول لى على ماقسم
ليعود الجو غامقاا ملبدا بالغيوم

وجلسنا على احد المقاهى

مااجمل الحياه
الكل من حولى يعطس ويكح وينف
وانا حابس نفسى ف البيت
وبدأ الرشح وطلعت المناديل
وصديقى يهنئنى
مش قلت لك
اهوه ابتدى يطلع اهوه
وفجأه
جاءت الرعشه ... والحراره
وشعرت فعلا ان روحى هيا اللى بتطلع
ولم اشعر بأى شىء بعد ذلك


قال الطبيب الذى افقت على وجوده فالحجره

ازاى ساكتين عليه ؟؟
لازم ياخد مضاد حيوى وفيتامينات و و و و و
وادركت وقتها ان دور البرد اللى عندى هوه اقوى ادوار البرد على الاطلاق فى كتب الطب الحديث
وبدأت المضادات الحيويه تواجه الفيروس بنفسها بعد ان ثبت فشلى ف الصمود امامه
ولكن تلك المضادات للاسف
هدت حيلى انا وماقدرش برضه على الفيروس
بل لازالت العطسه والكحه والرعشه والسخونيه والرشح من الاشياء الروتينيه فى حياتى
بل وصارت سمة من سمات شخصيتى مستسلما لكل وصفات الاصدقاء والاعداء
متناسيا كلية الطب وعلاجاتها
اشرب كل ماينصحوننى به
ولا اعترض على اى شىء
وقد شربت فى اسبوع واحد
لبان دكر مغلى
وشيح
وجنزبيل بالقرفه
وماء ترمس مغلى مع ورق الجوافه والبابونج
وكان كل منهم يقدم لى المشروب المعجزه بمقدمه رائعه عن بركاته واثره المؤكد
ويقول لى
استحمله بس .. هوه صعب شويه انما هتشربه وهتروق على طوووووووول
والان بعد ان استحملت كل سخافات الاصدقاء والاطباء ولم يطلع ذلك الفيروس اللعين




هل ارجوكم بأه بألا يتدخل احد بعد ذلك فى مسألة البرد دى ؟


لانها اصبحت بالنسبه لى مسأله شخصيه
بل وعائليه كمان
محدش له دعوه بيا من دلوقتى

اكل جيلاتى متلج
اخد دش ساخن واطلع ف البلكونه
اشرب شيشه
محدش له دعوه بيا

ده فيروسى وانا حر فيه


-----------------------
وهكذا انتهت مذكراتى البردانيه
مع القبائل الفيروسيه
من تحت البطانيه
وحتى نلتقى -- لكم منى اجمل تحيه