طبعا كل واحدة ساعة تحضير الغداء او عند اى عزومة وقتها مزنوق بتتمنى لو كان عندها مصباح علاء الدين خصوصا لو فى اطفال مش بيخلوا الواحدة تعرف تتنفس او لو بتشتغل ووقتها مزنوق و بما ان الصين لسه منزلتش المصباح عندنا فى مصر لسه فاحنا حنشوفلنا طرق تانية تساعدنا فى توفير وقت الطبخ.

و بالنسبة لى انا بعد ما اتجوزت كانت الميه دايما مقطوعة فتصوروا بقى الطبخ بما فيه من استخدام لحوم و بصل و ثوم و تنظيف خضار مع الميه المقطوعة ..بالذمة مش حاجة هايلة ؟؟فكان لازم ادور على حل و مع الوقت قدرت اظبط شوية حاجات بحيث احط الحاجات على بعض و تبقى عندى اكله فى وقت بسيط و بمجهود بسيط برضو فحشارككم خبراتى المتواضعة و طبعا لو اى واحدة عندها اضافة يا ريت تفيدنا بيها

1- بالنسبة للطماطم انا باجيب مثلا 8 كيلو و باعصرهم و اصفيهم و احطهم على النار مع شوية زيت و ملح و اسبكهم لحد ما يبقوا فى قوام الصلصة و دا من غير ثوم و لا بصل و نروح مقسمينها على اكياس تكفى كل واحد لوجبة و احطهم فى الفريزر ما عدا 5 اكياس او 3 عشان طبخ الاسبوع باحطهم فى الثلاجة و متخافيش ممكن يقعدوا 10 ايام من غير ما يحصلهم حاجة فى الثلاجة .

2-نجيب 8 رؤوس ثوم و انا عن نفسى باحب الثوم المستورد عشان فصوصه مليانة و اسهل فى التقشير و نقشرهم و نفرمهم و نقلبهم فى شوية زيت بسيط و ملح مش على النار و لا حاجة احنا بس نخلطهم و نحطهم فى اكياس ساندوتشات و نبططه بحيث يبقى مفرود فى الكيس زى البفتيك و نحطه فى الفريزر و كل ما تحتاجى اكسرى حتة و خلصت الشغلانة .

3-بالنسبة للبصل جيبى حوالى 8 رؤوس بصل كبيرة و افرميهم و حطيهم على النار مع شوية زيت و قلبيهم لحد ما يبقوا نص تسوية و تكون السوائل اتبخرت منه تماما و لما يبرد حطيه فى برطمانات زجاج او علبة زجاج و حطيه فى باب الفريزر او فى رف الثلاجة المخصص لفك تجميد اللحوم و اسحبى منه لكل طبخة و حيقعد معاكى فترة كويسة جدا و ادعيلى .

4-بالنسبة للخضروات انتى و ظروفك ممكن تبقى موفرة باستمرار بامية و بسلة سادة من غير جزر و ملوخية مجمدين جاهزين او تجيبى فاصوليا خضراء و بامية و بسلة تنضفيهم و تحطيهم فى اكياس و فى الفريزر و تسحبى منهم لان دول الخضار اللى ممكن يقعد فى الفريزر مدة و بينقذ الموقف على طووول .

5- بالنسبة للفراخ يستحسن تشيليها نظيفة و مغسولة و كل حاجة عشان متحتاجيش تستنى انك تفكيها من التجميد عشان تغسليها و تسلقيها فممكن تحطيها تتسلق و هى متجمدة على طول و مفيهاش مشكلة و تاخدى الشوربة طبعا و تحطيها فى اكياس او علب خاصة بالفريزر عشان تسحبى منها و تعملى الذ اصناف .

6-اللحوم الحمراء دى بقى ممكن تعملى زيها زى الفراخ و ممكن تعملى حاجة لطفة انك تبقى عاملة خلطة الكفنة الكسلانة بالفلفل الاخضر و التوم و البصل و البهارات و تبى جاهزة و تحطيها فى اكياس و فى الفريزر و قبلها بيوم تخرجيها تسيح و تبقى عندك احلى اكلة سريعة جنب المكرونة و نفس الكلام بالنسبة لكفتة الارز الاتنين دول دايما عندى فى الفريزر للطوارئ و مفيش حد الا لما يكون بيحبها و طبعا متنسيش انك تعملى لحمة مفرومة معصجة و تشيليها فى الفريزر فى علبة و تسحبى منها للبشاميل او الرقاق من غير ما تشيلى هم .

هى دى الحاجات اللى فى بالى دلوقتى و كل ما اجرب حاجة و تنجح حاضيفها و يا ريت نفيد بعض بتبادل الخبرات