السلام عليكم ورحمة الله وبركاته



ازيكم عاملين ايه

امبارح حصلى حاجه غريبة جدا


اول ما صحيت من النوم كالعاده دخلت اخود شاور


وبعد ما خرجت ببص فى النتيجه لقيت اننا يوم الجمعه الموافق

2075/1/1 والساعه كانت 10 صباحا وكان الجو حااار جدا

واحنا لسه فى شهر يناير


فابنى قاللى هات انزل اجيب فطار

قولتله ماشى ادخل خود 100 جنيه من جيب البنطلون

رد وقاللى 100 جنيه دول هجيب بيهم ايه قولتلو هات ب 30 جنيه عيش

ومعاك 70 جنيه هات اللى تجيبه

قاللى لا هاخد 150 قولت يلا مش مهم كدا كدا هقبض بكره


نزل جاب الفطار وجه

قعدنا فطرنا وروحت متوضى ونازل علشان اصلى الجمعه


(عايز اقولكو حاجه سر..الشوارع مفيهاش مكان يتمشى فيه)

كافحت وسط الزحام لحد ما وصلت للمسجد وقعدت


بس الامام طول جدا فى الصلاه تخيلو قعد يخطب بس 10 دقايق مش ممكن

المهم خلصت وروحت مروح على البيت


فتحت التليفزيون لقيت مطرب قديم اوى بيغنى معتقدش انكو ممكن تفتكروه اسمو عمرو دياب

خلص غناء وانا روحت قايم انام شويه

وبعد ما صحيت على العصر كده

لقيت ابنى الكبير بيقوللى انا خارج هات فلوس قولتلو طب ماتصبر لبكره ولا بعده

قاللى انت هتمشينى على مزاجك قولتلو انا ااسف عايز كام

قاللى هات 200 جنيه قولتلو يابنى حرام عليك كده مش هنعرف نعيش

راح قايللى هتجيب ولا هروح اعملك محضر قولتلو لا مش ناقصيين

اصل نزل قانون جديد بينص على ان لما واحد يطلب من ابوه فلوس وميرضاش يديلو

يتحبس 3 سنين ويدفع غرامه 200 الف جنيه

قولت لا مبدهاش روحت مديلو الفلوس


وببص على اللى متبقى معايا لقيتهم اول عن اخر 500 جنيه
يمشونا انهارده واروح الشغل بكره


روحت قعدت قدام التلفزيون تانى لقيت مصر بتلعب خدتنى الحماسه وقولت لازم اتفرج على الماتش

قعدت اتفرج كانت مصر بتلعب قصاد الصومال فى تصفيات كاس العالم لسنة 2076

وكانت الصومال كسبانه 2/0 وقعدت كملت المباراة للاخر ومصر جابت جول فى آخر دقيقه

وطبعا ده انجاز تاريخى يحسب لمصر لان الصومال مصنفه المركز الثانى عالميا

ولسه لينا مباراة هنا فى المنوفيه
(اصلها بقت العاصمه طبعا عارفين ليه)

فبكده يبقى فى امل كبير اننا نوصل كاس العالم بعد 95 سنه من محاولة الوصول


المهم قولت انزل اتمشى انا والمدام شويه وروحت واخدها ونازل وقفنا على عربية بيبسى

شربنا زجاجتين وروحت محاسب وجايين نروح قالتلى مش قادره امشى قولت اوقف تاكسى

وقفت تاكسى وركبنا وبعد ما روحنا بقوله كام يا اسطى

قاللى اسطى وانت شايفنى شغال على تاكسى قولتله انا آسف عايز كام يا بشمهندس

قاللى ايوه كده اتعدل هات 200 جنيه قولتله ليه بس 100 جنيه كويس والمسافه كلها على بعضها 3 كم

قاللى انت هتجيب ولا اروح اعملك محضر قولتله اسف اتفضل

اصل فى قانون جديد بينص على ان اللى سواق التاكسى يقوله يمشى حتى لو قال هات المدام اللى معاك سيبهالو وامشى

فطبعا انا خدتها من قصيرها واديتلو ال 200 جنيه ومشيت


طلعنا البيت طبعا هلكان ومش قادر يدوبك غيرت وروحت نايم على طول

صحيت على الساعه 4.5 يعنى ربع ساعه اجهز واصلى الفجر وامشى على الساعه 5 اوصل الشغل على الساعه 8

اظن 3 ساعات كفايه اصل انهارده السبت والبلد رايقه


اول ما نزلت روحت اشتريت الجرنال وروحت وقفت على المحطه مستننى الاتوبيس

لحد اما جه بعد ساعه الا ربع
(جه بدرى)

المهم روحت راكب
والحمد لله لقيت مكان احط فيه طرف صباع رجلى على الباب

وكنت هتخانق مع المحصل قاللى هات الاجره قولتلو استنى لما اقف كويس وطبعا قعد يزعق ويهلل لحد لما دخلت جوه شويه وروحت مطلعله الاجره

(ده الاتوبيس ابو 5 جنيه فى واحد تانى ب 10)

دفعت الاجره وروحت ساند ظهرى على الماسورة وبدأت فى قراءة الجرنال

قرأت كام خبر سدو نفسى على الصبح


1/استمرار العنف فى اسوان بين الاحتلال السودانى والمكافحة الاسوانيه

2/المقاومه الفلسطينيه تحاول دخول فلسطين بعد ان قامت القوات الامريكيه والاسرائيلية والانجليزية والروسية والالمانية بطرد الشعب الفلسطينى من ارضه
للبحث عن سلاح نووى

3/الرئيس مبارك يرسل 3 عساكر للتفاوض مع القوات السودانية بشأن اسوان

4/السيد بطرس غالى وزير المالية يفرض ضرائب على العمال والموظفين

5/قال السيد فتحى سرور رئيس مجلس الشعب ان من حق اى عسكرى بهدلة اى مواطن طالما يوجد قانون الطوارئ


وفى صفحة الحوادث


1/قام 7 بنات بخطف شاب يبلغ من العمر 20 عاما وقامو باغتصابه وقتلوه بعد ذلك وتولت النيابه التحقيق

2/قام احد المواطنون بمظاهره امام مجلس الشعب مما اضطر الامن الى اعتقاله

3/حريق بمصنع بالقاهره ادى الى خسائر فادحة وتبين ان سبب الحريق ماس كهربائى

4/اصطدام قطارين على طريق اسماعيلية الصحراوى مما ادى الى مقتل 200 شخص واصابة اكثر من 400 شخص

وقد تبين السبب انه كانت توجد ظلطه على قضبان القطار المتجه الى القاهره خبطت فى تيل الفرامل وادت الى وقوع الكارثة


طبعا نفسى اتسدت
روحت قافل الجرنال وواقف


فيييين وقف الاتوبيس فى المحطه اللى انا عايزها
ونزلت بالظبت الساعه ثمانيه الا ربع


طلعت مضيت حضور
وروحت علشان اقبض لقيت قبضى ناقص قولتلهم ليه قالولى ضرائب اخدت القبض واترزعت

وسكتت وخلصت شغل وروحت على البيت طبعا هلكاان جدا روحت نااااايم لعلى لم استيقظ بعد

 

كل الكلام ده تهييس من دماغى ومش منقول وطبعا كله خيال فى خيال

ممكن يكون مبالغ فيه وممكن يكون فيه نقص بس الواضح ان معظمه هيتحقق

قلة الدين وانتشار الفوضه وغلوا الاسعار والحجج اللى زهقنا منها فى الحوادث وكل ده هيحصل

ربنا معانا