لعبة جميلة جدا
عندنا وبس
مش هتلاقيها فى اى مكان تانى
ايه هى اللعبة

ازاى تخنق خالك

مخترع اللعبة:
احمد ابن اختى

السن:
فاضله ثلاثة شهور ويتم 3 سنين

الدراسة:
عنده ماجيستير فى الرخامه وبيحضر فى الدكتوراه

هواياته:
السهر الطوييييييييييييييييييييي يل
الجلوس على الكمبيوتر
الرخامه المستديمة على خاله اللى هو انا

بالمساعدة مع:
محمد اخوه

السن:
سنه تقريبا

الدراسه:
معاه بكالريوس عياااااط

هواياته:
الخناق المستديم مع احمد اخوه
شد الشعر
مش السهر بقى لا عدم النوم (دماغ مصفحه)

طريقة عملهم بقى
اليوم التقليدى لما يكونو بايتين معانا

بيجو على الظهر مثلا
يبدء احمد بممارسة اجمل هواياته
وهى الجلوس على الكمبيوتر

طبعا انا ببقى فى حاجات عايز اعملها وطبعا من المستحيل اعملها واحمد موجود

ومحمد بره بيكون بيمارس اجمل هواياته بردو وهى العياط
بعد كده يجى وقت الاكل

حفلة بتبقى فعلا حفلةطبعا لازم استحمى بعد الاكل لانى ببقى شبه الجرنال اللى بنفرشه ناكل عليه
بعد ما بخرج

طبعا عايزين يلعبو بقى وانا مببقاش فايق
بس على ميين هتفوق يعنى هتفوق
تبدأ الكراتين اللى احمد بيتفرج عليها تحضر فى زهنه ويطبق عليه انا
يعنى مثلا الاسد الملك سبايدر مان وتبدأحلقة المصارعة
يقعد يتخانق معايا لحد لما يتعب ويروح يريح شوية

اقول الحمد لله اخيرا سنحت لى الفرصة انى اقعد على الكمبيوتر
مجرد ما اقعد الاقى الباشا التانى جاى وطبعا تبدأ الحلقة بتاعتة آخر ما بزهق بروح شايلة على رجلى ومريح دماغى
بس للاسف ده بيبقى وجع دماغ مش ترييح دماغ
لانه مبيسيبش حاجه مكانها يقعد يلعب فى الماوس شوية يفتحلى حاجات غريبة
وفى الكيبورد شوية وبرد بيكتب كلام غريب بيخلى الناس اللى بكلمهم يقولو عليه اهبل من كتر الكلام الغريب اللى بيدسو فى وسط كلامى

المهم مجرد 10 دقائق بالظبط والاقى الوحش جاى مكشر عن انيابه وداخل على الفريسه مندفع بكل قوتة ويروح شايل محمد رازعة على الارض

طبعا محمد هيسكت هههههههههه يروح محمد مخلية مش واخد باله ويروح شاده من شعره

وتبدأ الحلقة الثانية من المصارعه وطبعا احمد اللى بيفوز نسبة الى انو اكبر سنا واقوى جسمانيا
بيعمل فيه ايه احمد بقى ممكن يبرمو جوه السجاده مثلا او يشيلو من رقبته او يخبطه بالبونية فى وشه عادى
وطبعا التانى مسكين كل اللى عليه انو بيعيط وانا ببقى خلاص دماغى هتضرب

بعد ما يخلص على اخوه
يجيلى انا بقى عايز يلعب لعبة معينة
افتحهالو واجى اقوم يقولى لا العب انت
طب انا مش عايز العب
ملهوش دعوة

هو مبيعرفش يلعب اللعبة دى مثلا يبقى انا العب وهو يتفرج علية زى مايكون بيتفرج على كارتون
ببقى مضطر انى اسمع كلامه اتقائا لشره
لانو بيعمل فيه شوية مقالب محترمة

مره كنت بكتب موضوع هنا
الموضوع انا كنت ناقله بس كنت بنسقه وفعلا تعبت فى تنسيقه
وقمت اشرب وعلى ما رجعت كان احمد قفل الصفحة وفتح لعبة علشان يلعبها

بلاش موضوع وممكن اصلحه
فى مره كنت جايب ورق ليلة الامتحان وقاعد بذاكر وعندى امتحان تانى يوم
بردو نفس الحكاية قومت مش فاكر كنت بجيب ايه وعلى مرجعت لقيتو بيعمل عصافير الجنه
وادور على الورق مش لاقيه خالص ابص فى اديه الاقى ورقه حجمها لا يتجاوز حجم غطاء الحاجه الساقعه اتضحت انها من بقايا الورق بتاعى
طبعا روحت الامتحان تانى يوم فله شمعه منورة

بعد كده بقى بينامو شويه والفتره دى بالنسبالى بتبقى منتهى السعاده
ولاكن ببقى ناسى حاجه انى مش لوحدى فى البيت فى ناس بردو
عايزين يروحو مشوار وطبعا بما انى الولد الوحيد فانا اللى بوديهم فى استنهاز فرصة ان العيال نايمين
او مثلا يكونو عايزين حاجه من تحت
المهم انى مشوفش نفسى وخلاص
وعلى ما ارجع يكونو صحيو وبيتخانقو كمان
وطبعا موال الصبح بيحصل مرارا وتكرارا

حالات جانبيه:
الصلاة
احمد من الشخصيات اللى لايمكن يفوتو فرض
بس بطريقة مختلفة
لو شاف حد بيصلى يروح مستنى لما يسجد ويروح قاعد فوق دماغهومحمد ليه دور بردو
بيقعد قدام اللى بيصلى بحيث انو ما يعرفش يسجد تانى
واللى بيصلى ده بقى يقعد بعلو صوته يقول
الله اكبر الله اكبر
ولاكن بدون فائدة لان محدش بيسمعوا

فترة النوم ااااقصدى الصحيان
طبعا بعد يوم شاااق زى ده الواحد بيبقى نفسه ينام
فى العادة احمد بينام جمبى ممكن مثلا على ما افكر انا انى انام تبقى على الفجر مثلا

وطبعا احمد ورايا وعايزنى بقى احكيله حدوته وانا بيتهيألى ان الكلام ده قدم اوى

وطبعا مش فاكر اى حواديت (والنبى لو حد عنده حواديت يقولى) بقعد االف واخترع لحد الحمد لله ربنا يهديه وينام

يجى دور محمد بقى ماهو معايا فى نفس الاوضه يمارس احب هواياته العياط
ينام 3 دقائق بالظبط ويصحى يعيط
لحد لما احمد يصحى

يروح احمد مكشر عن انيابه ويهجم على الفريسه مندفع اندفاع الاسد
ويضرب محمد

وطبعا يزداد محمد فى البكاء
وطبعا تزداد دماغى فى الصداع لحد لما ربنا يهدى الاتنين وينامو على الساعه 8/9 الصبح

وابدأ انا فى النوم مع العلم انى هصحى على 10/11 لو ورايا حاجه

نظرا لان محمد لسه مبيتكلمش فدى بعض الصطلحات عند احمد

الكلمة : معناها
االو : خالو
دمبك : جمبك
دمبى : بمبى
ايته : حيطه
تمك : سمك
تم ديرى : توم اند جيرى
رادن : راجل
اعمن : اعمل
انا لبك : انا هضربك
لود : رد
تلى : صلى
تدة : كدة
انا توأ : انا اسوق
امبح : اوبح شيلنى يعنى
ازق : ازرق
افره : صفراء
اضرة : خضراء

وطبعا المزيد والمزيد من المصطلحات والمعانى
وانا قربت اتجنن
ياريت لو حد عنده حل يقوللى