السلام عليكم

النهاردة كنت بفكر شوية فى اسباب اتجاة الروح النقيه للعنف الشديد

و وصلنى كلام ان الروح النقيه كاتبه مذكراتها كلها و ده اللى اضطرنى لانى اعرض كيس شيبسى على اللى يسرق المذكرات
و بعد صدمة قررت انى اقرا فى مذكرات الروح النقيه و اعرضها عليكم عشان نوصل للسبب اللى خلى الروح النقيه تختفي الايام دي

و نبدأ مع بعض

اول صفحة
بتاريخ 1956

النهاردة اتخرجت من الكلية بعد ما قضيت فيها احلى 30 سنة فى حياتى

صحيح عدوا بسرعة بس فعلا الكلية دى غير اى كلية من اللى فضلت اسقط فيهم


الصفحة التانية
بتاريخ 1962

رجلى وجعتنى من كتر التدوير على شغل

بس الحمد لله تعبى جه على فايدة و معروض عليا شغل فى احلى ورشة فى الدنيا كلها و انا مضطره اوافق عشان اقدر اكون شيئ فى حياتى

الصفحة التالتة
بتاريخ 1965

مكنتش فاكرة انى هكون مبسوطة بالشغل ده اوى كدة

لدرجة انى اتعرفت على الحج برعى الخياط و لاول مرة احس بالبتاع ده اللى بيقولوا عليه الناس اللى كان اسمه الحب باين ولا كان اسمه ايه

قطيعه الواحده مبقتش بتفتكر بسهولة كدة ليه

الصفحة الرابعة
بتاريخ 1970 (واضح ان الروح النقيه قاطعه حته من الصفحة دى)

يقطع اليوم اللى عرفتك فيه يا برعى

كدة تخلينى فى الاخر اقتلك يا سيس بسبب انك مصحينى عشان اطبخلك

طب ده انا كنت اصيلة معاك و بعملك العشا كل يوم يا ندل

الصفحة الخامسة
بتاريخ 1973

الجيش ده صعب اوى

بعد ما هربت من البوليس عشان المضروب فى عينه برعى جوزى انتحلت شخصية راجل و دخلت الجيش و ادينى بحارب بس بينى و بينكم اسرائيل متستاهلش كدة اصل برعى الله يجحمه فى جهنم يا رب كان معذبنى فى حياتى و اكيد اسرائيل احتلتنا عشان خاطر كانت عاوزه تخلصنى من مقصوف الرقبة ده

الصفحة السادسة
بتاريخ 1980

بعد ما خلصت جيش اخيرا و رجعت للشغل تانى قررت انى اعمل عملية تجميل عشان شكلى باظ فى الجيش

ده انا رموشى اغلبها وقعت و مبقتش شبه البت دى اللى بيقولوا هتظهر على 2004 و اسمها هيفا

الصفحة السابعة
بتاريخ 1985

و اخيرا جالى عريس

الاسطى عتريس الشحات بتاع حارتنا

بس هو مش عاجبنى بصراحة مع ان شنبه حلو اوى و بيستحما كل سنة مرة

امرى لله هوافق و خلاص عشان ده برضه راجل طيب و اكيد محتاج واحده تقف جمبه فى الشحاتة و بينى و بينكم عتريس طموحه كبير اوى فى حياته

الصفحة التامنة
بتاريخ 1990

انا يتقالى ان ريحتى وحشة

ده انت ليلتك مطينه يا عتريس هخلى اللى يسوى و ميسواش يتكلم عليك

الصفحة التاسعة
بتاريخ 1991

هو جثة عتريس الله ما يسامحه ابدا ريحتها وحشة كدة ليه

ما هو اللى زيه كدة و يغلب الولايه اللى زيى لازم يكون مش نضيف من جوه

الصفحة العاشرة بتاريخ 1995

انا قررت اشتغل فى المدبح عشان عاوزين حد بيعرف يتعامل مع المهنة دى و طبعا مش هيلاقوا احسن منى ده انا سالخه 2 رجالة و كل واحد فيهم شنبه قد الخروف

الصفحة 11 بتاريخ 1999

اخيرا اشتريت المدبح و بقا عندى فيلا و عربية و لاول مرة يتقدملى عريس يكون شغال موظف

و مش كدة و بس تخيلوا انا رفضته

الصفحة 12 بتاريخ 2002

قطيعه الواحده زهقانة اوى كدة ليه

مش كنت رضيت بالواد الموظف ده بدل ما انا شفت نفسى و قولت بلاش و اخرها مفيش حد اتقدملى غيره

الصفحة 13 بتاريخ 2006

بيقولوا فيه اختراع جديد اسمه المنشرنت ولا الكركرنت مش فاكرة الواحده خلاص مبقتش قادرة تفتكر حاجة بسبب الايام السودا اللى عشتها زمان مع عتريس و برعى الله ما يرحمهم

الصفحة 14 بتاريخ 2008

حلمت خير اللهم اجعله خير انى قاعدة قصاد لوحه كبيييييرة مليانة زراير و جمبها بتاع كدة صغير فيه كليك يمين و كليك شمال و قصادى حاجة منورة كدة شكلها يفتح النفس

انا لازم اعرف اللى كنت قصاده ده ايه عشان قلبى حاسس انه هيكون فيه خير كبير ليا

الصفحة 15 بتاريخ 2009

و اخيرا جبت كمبيورر جديد و شكله كدة شبه اللى كان فى الحلم

نفس اللوحه و المفعوص اللى جمبه الصغير ده و وصلت الكركرنت و دخلت على منتدى اسمه النجعاويه

الصفحة 16 بتاريخ 2010

المحروسة اللى ساكنه قرب منى بتتجوز و انا اللى اسمى احلى و اغنى منها و لسه متجوزتش تانى

قطيعه هو انا ناقصنى ايه يعنى

انا هروح اقولها تحترم نفسها و تسيبلى العريس ده

الصفحة 17 برضه 2010

بقا انا انضرب من كل اللى فى الفرح و يتقال عليا خطافه الرجالة

ده حتى العريس ده لايق عليا اكتر منها

انا كدة منفسنه من جوايا جامد

الصفحة 18 برضه 2010

( فيه شوية صفحات مقطوعة على شوية صفحات متبهدله )

لا انا كدة انا جبت آخر

لا مهدئات نافع ولا خطف رجالة من الشارع و تجويعهم فى البدروم نافع

انا لازم انتقم


منقول