السلام عليكم ورحمه الله وبركاته

إزيكو يا نجعاويه ..... يارب تكونو دايما بصحه وعافيه


النهارده عايز اتكلم عن موضوع بجد بقى منتشر وكتييييييييييييييييييير جدا لدرجه تخلى الواحد يتهبل


الموضوع النهارده عن البتاع ده .... إسمه إيه ؟

ايوه والله عن البتاع ده

كلنا دلوقتى - انا وإنت وماما وبابا وكلنا وزوجتى وكلنا فعلا بقينا بنتكلم بلغه البتاع

إيه هى لغه البتاع

البتاع ده .... تطلق على كل حاجه واى وقت وفى كل مكان وللأسف بتنفع

يعنى عايزين نقول أى حاجه ومش متذكرين إسمها يكفى نقول البتاع ده والطرف التانى هيفهم (إلا انا بستهبل واعمل نفسى مش فاهم علشان إللى قدامى يفتكر ويقول)

المهم كنت فى الأول بقول عادى معلش من التركيز فى حاجات تانيه ايا كان إيه هى فاللى قدامى (سواء كان بابا او ماما او أم عائشه ..... وخصوصا أم عائشه ) بيقولو على أى حاجه البتاع ده

بس لاقيت الموضوع بقى زى المرض ... بيكتر ويتنشر لدرجه إن أم عائشه دلوقتى بقت بتقول لكل حاجه البتاع ده خمس ست مرات الأول لغايه لما تفتكر إسمه وكذلك أبويا وأمى وأختى


قولت معلش يا عم احمد يمكن إحنا عائله عندها زهايمر إستحمل معلش وركز إنت بس وإنت هتفهم البتاع ده معناه إيه وخلاص


بس لاقيته فى الشغل وفى البيت وفى الشارع مع زمايلى وفى كل مكان


دة دليل خطير على عدم التركيز فى أى بتاع يعنى الناس دى كلها مش مركزه ليه وبتستسهل وتقول بتاع ليه ماتاخد ثانيتين بس هتفتكر

لكن إزاى وإحنا كسولين لدرجه التفكير فى إسم البتاع ده إيه ؟؟؟؟

انا اسف للإطاله بس فعلا البتاع ده تاعبنى جدا وانا مش عارف أعمل أى حاجه وكفايه كده لأحسن انا طولت فى البتاع إللى انا بكتبه ده

بس إزاى مطولش فى البتاع ده وانا متدايق كده وبعدين انا مش عارف اعمل إيه استسلم انا كمان واقعد جمبيهم ونعم إسطوانه بتاع ونشغلها طول ماحنا قاعدين بجد دا كل حاجه بقت بتاع

امى تقولى وطى البتاع ده شويه ... اختى تقولى انا خارجه اشترى بتاع ..... ابويا يقولى انا مش عارف البتاعه دى مش جايبه هوا ليه ..... ومراتى تقولى البيت هات بتاع معاك وإنت جاى

يا صلاه النبى احسن افهم انا إيه بقى إن شاء الله

امى بتقولى وطى التليفزيون ... طب ماتقولى التليفزيون
اختى خارجه تشترى طرحه ... طب ماتقولى طرحه بدل ما تقولى بتاع
ابويا طبعا بيتكلم عن المروحه ..... وأم عائشه عايز عييييييييش وانا جاى .... عيش ... كلمه من 3 حروف .... دة كلمه بتاع 4 حروف ... لا تعليق


بجد كفايه كده لإحسن البتاع إللى بكتب بيه ده هيتكسر منى