السلام عليكم و رحمه الله و بركاته
احلا سلام علطول السلام .. للنجعاويه اللي منورنا قدام
و نبدأ قصتنا و يارب تعجبكو


ابرهيم ابرهيم قوم اصحي يا هيما

نعم عايزه ايه يا اخرة صبري

قوم اصحي يا حبيبي

ليه هي الساعه كام

4.30

يعني انا اتخمد الساعه 4 و تصحيني 4.30 ليه يا ظالمه ما انا قايلك صحيني الساعه 8 علي الماتش

طبما انا باصحيك دلوقتي علشان تلحق الماتش يا حبيبي

يارب عوض عليا عوض الصابرين .. يا بنت الحلال الماتش هاشوفه في الصاله مش في الاستاد

عارفه بس علشان تلحق تروح مشوارك و تيجي بسرعه قبل الماتش

مشوار ايه

تروح لماما

ليه

تروح تجيبها و تيجي بسرعه قبل الماتش

اجيبها منين و اوديها فين

ابرهيم بطل دلع يا حبيبي و قوم بسرعه انا كويت لك هدوم خلاص

والله ما بادلع انا بس عايز اعرف هاجيبها منين و اوديها لفين

هتجبها من بيتها طبعا علشان تيجي تقعد عندنا شويه

تقعد ليه بقي

انت نسيت اني حامل يا حبيبي

لا ما نسيتش بس هو انتي تعبانه ولا ايه

لا الحمد لله انا زي الفل

امال هانتعب طنط ليه

يا هيما هاتيجي تقعد معانا لحد الولاده

ولادة مين ده انتي لسه في السادس يا حنان

اه ما انا عارفه بس انت شوفت مها بنت عمتي ولدت في السابع

طب و انتي مالك

يا سلام يا خويا افرض ولدت زيها في السابع يبقي العمل ايه بقي

طب افترض انك هتولدي في السابع رغم ان الدكتور قال ان الحمل طبيعي و انك زي الفلل انتي و البي بي طنط تيجي تقعد معانا ليه

علشان لما يجي لي الطلق تبقي جنبي و نجري بسرعه علي الدكتور

طب و هو الطلق بيجي فجأه مش ليه علامات

يا ابراهيم ما انت شوفت مها كانت هتموت هي و النونو بتاعها علشان ماحدش لحقها بسرعه

ما اختلفناش بس ده لان مها عايشه لوحدها في محافظه تانيه و جوزها مسافر .. لكن احنا بينا و بين بيت مامتك نص ساعه زحف يعني برنه ممكن تجيلك

ابراهيم ما تخنقنيش انا حامل و انت عمال تعصبني علي فكره و انا ماسكه اعصابي عنك بالعافيه

طب اهدي يا حببتي بس استفسار اخير .. هو مش كان اتفقنا انك هتروحي تقعدي عند مامتك و اننا مش هانشحططها

ماما قلتلي مش هينفع طبعا

ليه بس

انت عارف ان خالد اخويا في ثانويه عامه و بصراحه ابنك ما بيبطلش شقاوه و مش هيخلي خاله يعرف يذاكر

هو خالد يعني فالح اوي ده اللي في سنه مخلص جيش

اخص عليك يا ابراهيم انت بتتريق علي خالد .. طب ايه رأيك احنا املنا فيه كبير اوي السنه دي

بأمارة ايه يا حنان دي تالت مره ثانويه عامه

ماهو علشان كده دي تالت مره بيذاكر نفس المنهج يعني بقي خبره خلاص

ماشي يا حببتي ربنا معاه .. بس باباكي هايرضي طنط تسيبه و تسيب خالد 4 شهور بحالهم

ما تقلقش بابا موافق و بيقول كله يهون علشان خاطري

ماشي هاروح اجبها و امري لله

الله يرحمك يا امه طول عمرك تقوليلي (( خد المجنونه بنت العاقله ولا تاخدش العاقله بنت المجنونه )) اديني خدتها مجنونه بنت مجانين

و كده نكون وصلنا لنهايت حلقتنا
و نلتقي في وقت اخر ان شاء الله لننقل لكم حديث هيما و حنون