المحروس كتب كتابه خلاص كخطوة فى طريق التوريث السلس والحمد لله الحياة ماشية حلاوة وكل قائم بدوره على أكمل وجه

الحكومة جوزت الواد ومن قبلها مسكته امانات المش عارف ايه فى الحزب ومن هنا بقت اخباره تنزل بصفته الحزبية وليست بصفته الأسرية

مما يضمن استقلالا عن جلباب الوالد أمد الله فى عمره لحد 2011

والمعارضة هتقوم تهلل وتطبل وتشتم وتقوم بدورها الوطني لتكمل الصورة الطبيعية في حياة المصريين،

ذلك ان دور المعارضة المصرية يتلخص في فتح مضخات تنفيس جماعية ضرورية لتسكين آلام المواطن ورفع الحرج عنه

والشعب طبعا هيهيئ نفسه لاستقبال رئيس الغفلة الجديد ومن غير ما تتعب الحكومة نفسها،

والنبى ما انتو قايمين ... احنا فرحانين اوى اوى اوى بسي جمال بيه والست خديجة هانم

والحقيقة ان دى الحقيقة،

واللى الجماعة المفكرين والمثقفين مش قادرين يستوعبوه عشان سمموا دماغهم بشوية كتب قروها ففصلوا خالص عن طبيعة الشعب المصري..

اللى هي ايه طبيعة الشعب المصري.. اللي هى "أصلاً إحنا عبيد"

ولا ينفع مع العبد غير ان ملكيته تتنقل من مالك لمالك ويفضل هو يخدم أسياده بعنيه

حد يقدر يفسر تفسير تانى للى بيحصل؟ لما نكون ايام الفراعنة بلد بتحكمها أسر ،

تنام أسرة وتقوم أسرة واحنا كشعب مش فى الصورة أصلا. .أو مش فى الأسرة أصلاً..

بردو كانت تحصل انقلابات وحاجات من دى، بس اللي بيقوم بيها بيقلبها أسرة بردو وتبقى البلد بلده والشعب فى جزمته.. عادى خالص

راح الفراعنة وحكمنا يونان ورومان وعرب وأكراد ومماليك

وآخر الغُرب الأسرة الألبانى بتاعة محمد علي وبعد هُليلة 52 مسكتها أسرة العسكر ويمكن جمال وأنور كان حظهم وحش ما عمروش فى الدنيا كتير عشان يلحقوا يظبطوها..
أصل ما تجيش تقولي انهم هيختلفوا عن النظام الاسري المصري.. وللا يبقوا مش مصريين بقى

حد يقدر يقول امتى فى تاريخ السبع تلاف سنة ده حصل ان كام واحد يرشحوا نفسهم والشعب يروح ينتخب ويفوز واحد

بس يبقى هو خدام الشعب الأول بدرجة رئيس جمهورية وتعدى أربع خمس ست سنين وينتخبوا حد تانى ويطلع هو من غير ما يكون سرق ولا نهب وثروته ما زادتش مليم

حرام.. المشكلة ان دا بيحصل عند ناس تانية.. متحقق عند أمم تانية، يبقى الفكرة مش هلامية

انما عندنا ماحصلش.. فى تاريخنا ما حصلش

وحد يقدر يفسر ليه واحد من عامة الشعب -اللى هو مبارك - اللى هو مش ابن ملك ولا ابن خليفة ولا ابن طبقة الكريمة

اللى على وش الشعب حتى، انما فلاح ابن فلاحين -اللى هما العبيد الأصليون لمصر - لما هو يتفرعن بعد ما يحكم مصر يبقى ليه؟

أبصم بالعشرة ان عرابي لو كان اخدها كان عمل أسرة، ولا ولدتكم امهاتكم احرارا ولا بتاع باه..

ساعتها كان عرق الفرعنة هينطر عليه والهسهس بتاع الأسر كان هيمسكه

وادينا من حظنا كجيل اتولد فى عهد مبارك.. اننا نشهد على حياة عنينا تكون الأسرة المباركية

لنكون لها عبيداً كما اعتدنا ولتسقط كل الشعارات والتوصيفات من نوع مواطن، حر، إنسان.. والأصل أنا عبد وإنت كمان