السلام عليكم ورحمه الله وبركاته

اعزائى النجعاويه

يشرفنى إنى اقدم ليكم وحصريا على منتدى النجعاويه الحوار الذى دار بين مصر والشعب والحكومه ... خلال قاعده العرب إللى كانت اول إمبارح

قاعده العرب دى كانت إتعملت علشان نقعد مـــصـــر مع الشعب وتيجى معاهم الحكومه ونشوف المشاكل إللى بينهم هما التلاته وإللى ليه حق هياخده وإللى عليه الحق هنشوف وضعه إيه ....

انا كنت قاعد معاهم ... عدت عليا مـــصـــر وقالتلى تعالى علشان تنقل الكلام إللى هيتقال وتبقى شاهد عليه ... قولتلها ليه إشمعنى انا .... وشها إحمر وردت بنرفزه وزعقت اوووى وقالتلى إنت هتيجى معايا ولا لاء ... كانت شكلها زعلان جدا بجد ... طبعا قولتلها انا اسف انا جاى ... اصلها مـــصــــر

روحنا قعدنا فى حته هاديه ... إستنينا شويه ... لاقيت واحد تخين اووووووووووى وكلبوزه كده جاى من بعيد ... سألت مـــصـــر مين ده .. قالتلى ده الشعب

فضلنا مستنيين شويه كتير ولاقيت واحده متشيكه اوى نازله من عربيه طوييييله ... حاطّه برفان وريحتها فايحها لسه ببص لمــصــر علشان اسألها مين دى ... قالتلى دى الحـــكـــومـــه

المهم بعد السلام والتحيه إللى من غير نفس بين التلاته ... انا لاقيت الجو مشحون اوى .... صراحه كنت مرعوب لأحسن ينزلو ضرب فى بعض ومعرفش احوش بينهم ... قولت اعمل شاى ولا حاجه ... بصولى هما التلاته كده ولسان حالهم بيقول .. هوه ده وقت شاى يا بيه

بدأت مــصــر تتكلم وقالت: انا جايبه احمد يحكم بينا بالعدل ... ونشوف بأه .. لأحسن انا زهققققققققققت (قالتها من قلبها وهى وشها محمر)

بصولى كده الشعب والحكومه وبعدين قالو وإحنا موافقين مافيش مشكله ... مين هيبتدى يتكلم ... سألو هما التلاته ... بصراحه فى الأول سكت كده وكنت متوتر جدا ... معلش يا جماعه الموقف حساس جدا ... بس فى الآخر قولتلهم مـــصـــر تتكلم الأول .. عشان شكلها مخنوق أوى ومحتاجه تتكلم .. وسكت انا

ثوانى عدت تقيله اوى بعديها مصر بدأت تتكلم وعنيها فيها لمعه .... وبدأت بنبره صوت حزيييييييييين

مـــصـــر:انا مش عارفه ابدأ منين وأقول إيه ... انا بجد مخنوقه اوى ومتدايقه ومش عارفه ... هل من حقى ازعل ... ازعل منكو وإنتو حتـــه منى ... ليه بتعملو كده معايا وليه سايبينّى كده

الــحــكــومه:بس يا مصر.....

مـــصـــر: متقاطعينيش وسيبينى اتكلم .... انا خلاص بجد ماعدتش قادره اسكت بأه تعبتونى ... إنتى اكتر واحده مزعلانى ... ضيعتى هيبتى قدام باقى العرب .... وخليتينى فى عنيهم صغيره اوى ... رغم إنى معملتلكيش حاجه ... ولا بخلت عليكى بحاجه فى يوم من الأيام ... دا كل الخير إللى إنتى فيه ده والشياكه والعربيه الضخمه دى من خيرى انا ... عمرى ما حسستك إنك بتاخدى ومبتديش رغم إنك علطول كده

(الشعب كان ملخوم وطلع ساندوتش وكان قاعد بياكل ومش مركز اوى)

مـــصـــر: وإنت يا شعب ... خلاص بقى همّك على بطنك ... هاكل بكره إيه وهعمل إيه وهجيب أكل منين ... دانت بقيت قد الفيل ... وحملك بقى تقيل اوى عليا ... وانا مبقتش عارف اعمل إيه ... وياريتك بتشتغل وبتعمل حاجه تفيدنى وتفيد نفسك بيها ....

(الشعب مش عاجبه الكلام وساب السندوتش كده ولسان حاله بيقول عايزانى اعملك إيه يعنى)

مـــصـــر: انا مش عارف اقولك إيه يا شعب بجد ... سلبى ومهمل وغير مهتم بأى حاجه غير بنفسك .... ومش فالح غير إنك تجيب كل مشكله على الحكومه وتقولها مانتى مش عايزه تشغلينى ومش عارفه تأكلينى وتشربينى ... ونسيت إنك كائن حى .. وإن فى حاجات تانيه بتتعمل غير الأكل والشرب ... بجد انا إتخنقت منك ... انانى ومش بتفكر غير فى نفسك

الــشــعــب: ماكفايه تهزيق بأه فيا مانا كمان زعلان....

مـــصـــر: انا مش بهزقك يابنى انا بعاتبك ... إنت لو ماكنتش غالى عليا ماكنتش عاتبتك ولا عبرتك وكنت شيبتك وإتبرّيت منك وقولت دا لا هو إبنى ولا اعرفه ... لكن إنت حته منى ... ضنايا ... سندى ... مصدر عزّتى وفخرى وكرامتى ... إللى راحو بإهمالك وتفكيرك فى نفسك وبس ....

(انا بصراحه لما شوفت مـــصـــر كده كنت هعيط بجد )

أنا:طيب إهدى يا مـــصـــر كده ووحدى الله ... (لا إله إلا الله) ... نشرب بس كوبايه الشاى دى وبعدين نكمل كلامنا تانى نكون هدينا كده

يـــتـــبـــعــــ بإذن الله