السلام عليكم ورحمة الله وبركاتة



انا اللى اقول

بعد قضاء الربع ساعة الشهيرة اللازمة للتفكير فى مقدمة
وبعد قضاء خمس دقايق فى محاولة اقناع نفسى
انى مش لاقى مقدمة ابدء بيها كلامى
وبعد قضاء حوالى 5 دقايق فى كتابة الكام كلمة اللى فاتو
احب اقول ان المقدمة خلصت والحمد لله



نيجى بقى للمضمون
كنت ماشى فى يوم الساعة 2 بالليل والدنيا رايقاااااا ومفيش زحمة
ولا اصوات عالية ولا حاجة من دى خالص
ببص من بعيد لمحت واحد قاعد على الرصيف المقابل
للناحية اللى انا فيها
قولت لايكون حد تعبان ولا حاجة
قررت انى اروح اشوف فى ايه
وصلت لحد الراجل.. وبدأت كلامى معاه

استاذ...
رفع دماغه وبصلى ...
وكنت فى قمة الدهشة!!!!
لما لقيتة السيد بطرس غالب
وعيناه تسبح فى الدموع

قولتلو ايه ياعم غالب مالك
قاللى اصلى زعلان اوى
قولتلو من ايه بس
قاللى اصلى اتعورت فى صباع رجلى الصغير
وطلبت انى اتعالج على نفقة الدولة
بس حاتم الجملى رفض
قولتلو وازاى يرفض الجملى
انا لازم ارحله
وانهيت حديثى معه
وطمئنته انى هخلص الموضوع مع الجملى
واقنعته بان يكف عن البكاء
ويروح لبيته وينام وباله مرتاح

وبعد كده روحت سايبه وماشى

روحت على البيت على طول مروحتش فى حته لانى كنت تعبان جدا

اول ما دخلت البيت .. لقيت المدام والاولاد صاحيين
جه ابنى الكبير كمال
بيقولى يابابا انا زهقت من القعدة دى
قولتلو طب عايز ايه بس يا كمال
قاللى قولتلك اقعد انت ريح وانا
انزل الشغل مكانك
قولتلو يا كمال يابنى
انت مش قد العالم اللبط دول
انا بس اللى بسلك معاهم
قاللى يابابا صدقنى انا قد المسئولية
قولتلة خلاص يا كمال
هكمل السنادى وانزلك مكانى

وسيبته ودخلت علشان انام
واتعايش فى عالم الاحلام
الذى لا اجد امتع منه
واشعر بأنه جزء من الواقع
ولاكن تزداد عليه الاثاره والمغامره

 
تانى يوم صحيت الصبح بدرى
وقررت انى لازم اروح على وزارة الصحة
واشوف الجملى ده


روحت على الوزارة
ودخلت قابلت الجملى
وكان الحديث كالتالى


ايه ياجملى مش عيب كده
قاللى فى ايه بس
قولتلو يعنى السيد بطرس غالب
يطلب انو يتعالج على نفقة الدولة
وانت ماتوافقش
قاللى ومين قال انى موافقتش
قولتلو اومال ايه يعنى
قاللى انا عرضت الامر على السيد رأفت الشريف
وهو اللى رفض
قولتلو هو الموضوع وصل لرأفت
قاللى طبعا دى اجرائات
وروتين والكلام ده
قولتلو خلاص ياجملى
انا هروح لرأفت

خلصت كلامى معاه وروحت قايم

خرجت من الوزارة متردد اروح مجلس الشورى ولا لا
وبمجرد مرور 10 دقائق
كنت مقرر انى هروح طبعا انتو عارفين اننا شعب صاحبب قرار
ودايما بيكون الصواب


المهم روحت على محطة الاتوبيس
طبعا استغربتو لما قولت اتوبيس
لانى مبمشيش خطوتين الا بالعربية
واللى حواليها
اصلى بصراحة قولت انزل اعيش مع الشعب وادرس احوالهم

وبمجرد دقيقتان ونصف كان الاتوبيس المقصود جه
روحت رايح راكب بكل بساطة وسلاسة
بقيت مستعجب من اللى بسمعو من الناس عن زحمة المواصلات
وقال ايه بيجيبو العيب على الحكومة


طلعت الاتوبيس قطعت تذكرة وروحت رايح قاعد
تقريبا مكانش فى الا حوالى 10/11 نفر فى الاتوبيس
فاضى يعنى


شوية وفى واحد طلع جانبى
ومعاه جرنال
وطبعا بطبيعة الشعب المصرى المثقف
ان لما حد بيكون معاه جرنال
لازم كل اللى حواليه يشاركوه فيه
فانا طبقت النظرية دى
وقعدت اقرأ

وفى وسط الاخبار اللى قريتها فى خبر لفت انتباهى اوى
ان فى علاوة نزلت للموظفين 20%
بقيت مستغرب
هو كل شهر هينزلولهم علاوة
لما اشوف المسئول عن العلاوات

المهم جت المحطة اللى انا قاصدها
روحت قايم ونازل

اول ما نزلت دخلت على المجلس على طول
لقيت السيد رأفت قاعد
ومعاه ثلاثة اصدقائة بيلعبو بووكر
تخيلو بيلعبو على ايه
مش هتصدقو
على اللى يقدر يخدم الشعب
طيبيين اوى

روحت رايح عليهم بدون اى تردد
وقطعت حبل افكارهم
قولتلو فى ايه يا رأفت
بقى السيد بطرس غالب
يطلب انو يتعالج على نفقة الدولة
وانتو ترفضو
قاللى لا اصل انت مش فاهم
الشعب اولى بانو يتعالج على نفقة الدولة
قولتلو والسيد بطرس غالب مش من الشعب يارأفت؟
قاللى ايوه بس فى ناس محتاجه اكتر منو
قولتلو لازم يكون الراجل مرتاح
علشان يعرف يقوم بواجبه
يكفى انو محافظ على مال الدوله
ومفيش مليم بيروح بغير علم الدوله

المهم فضلت معاه واحده واحده لحد ما اقنعتو

روحت بعد كده على السيد بطرس غالب
قولتلو اى خدمه اديك هتعالج صوباع رجلك الصغير على نفقة الدولة
قعد بقى يشكر فيه وربنا يخليك لينا ومايحرمناش منك بقى خلاص هيقلب تامر حسنى

وراح السيد بطرس غالب اتعالج ورجعلنا بالسلامه
وانا بالى ارتاح وريحت ضميرى من ناحيته


عدى يوم والتانى
ولقيت واحد جاى يقولى
ان الدولة عملت ميزانية تقدر ب 2 مليار جنية لاعمار مصر

قولتلو اه مانا عارف
قاللى هما الناس دى بيفكرو ازاى
قولتلو مش عارف بصراحة
قاللى هى مصر محتاجة اعمار
ده مفيش شبر فى ارض مصر
عايز اعمار
قولتلو النصيب بقى
قاللى يلا علشان الزعيم يبقى مرتاح
اه..اه
قالى ماهو لما الزعيم يكون مرتاح
يعرف يريحنا .. هو فعلا مريحنا
بس علشان يريحنا اكتر

ومحدش يقول
زى كاوتش العربية ولا حاجة
لا
احنا الحمد لله مرتاحين
ومعندناش اى مشاكل
لا عندنا بطالة
ولا عندنا فقر
ولا عندنا قهر واضطهاد
ولا عندنا تفرقة مستويات
لان مفيش مستويات اساسا
ولا عندنا تسول
ولا عندنا اطفال شوارع
ولا عندنا عشوائيات

والحمد لله البلد بخير
وكل سنة وانتو طيبين


وبعد ده كله ياترى عرفتو انا مين ولا لسه
مش هقول لانى مش محتاج انى اقول انا مين
انتو اذكى من انى اقولكم

تقبلوا تحياتى