السلام عليكم ورحمة الله وبركاته

ساعات بنصحى الصبح نلاقى ناس كانوا معانا ومابقوش معانا



نلاقى اصحاب كنا مع بعض اصحاب وسنين من عمرنا عدت علينا واحنا اصحاب
وفجاة ........ اصحابنا لقوا ناس غيرنا اصحاب وبقينا احنا من غير اصحاب
وندور عليهم مش عارفين ...........هما راحوا فين




ونلاقى اخوات احلى واعز اخوات امنا ولدتنا اخوات
وفجاة.........نلاقى الشغل والسفر والجواز............خلى الاخوات مابقوش اخوات بقى اللى بينهم يادوب تليفونات وسلامات
وندور عليهم مش عارفين .................هما راحوا فين




ونلاقى زوجة كانت هى وزوجها متجمعين على الحب والود والعشرة متواعدين
وفجاه...... يروح الزوج وينشغل بناس تانين ويبعد عن حب عمره وعشرة السنين
وندور عليه مش عارفين ................هو راح فين




ونلاقى جيران فاتحين القلوب والبيبان........ دى عامله حلة ملوخيه ودى عامله طاجن بامية وعلى سفرة واحده متجمعين
وفجاة........ تلاقى دى بتحسد دى على شقتها الجديدة ودى بتخبى على دى عريس بنتها الكبيرة....... ويتفرقوا وتتقفل البيبان ولا يبقى فى ملوخيه ولا بامية ولا حتى سلام
وندور عليهم مش عارفين .............. هما راحو فين




ونلاقى عيلة ملمومه تحت عباية ابوهم وحنيتة ما هو ابوهم اللى من غيره متبعترين
وفجاة ...........يروح الاب عشان يقابل رب كريم
وندور عليه مش عارفين ............هو راح فين



ياترى احنا كمان حالنا ايه ........ياترى بنحافظ على الصداقة ولا بنبعها .............وبنصل الرحم مع اخواتنا واهلنا ولا بنقطعه.........وبنمسك فى العشرة وحب عمرنا ولا مستغنين ........ وبنود جيرانا ولا بيبانا علينا مقفولين ....................
وياترى عاملين حسابنا لمقابلة رب كريم ولا ايه مستنين


وياترى هنلاقى ناس غيرنا بيقولوا علينا

هما راحو فين