فاكرين يوم ما قررنا نتقابل
كان فى يوم كده مش عارف مين اللى اقترح فكرة على جميع الاعضاء
ان كل رجالة النجع هيتقابلو مع بعض فى ميدان رمسيس
..
وبنات النجع حبوا يقلدونا وقررو انهم هيتقابلوا بس فى التحرير
..
واليكم مغامرات النجعاوية وهم فى الطريق
وهبدأ بحبيبى وحبيب كل الاعضاء خيال هانى
..
نزل خيال هانى من بيته متشيك آخر حاجة وفرحان ومبسوط رايح يقابل النجعاوية بقى
راح الموقف بتاع الميكروباص
وهناك
..
التباع :رمسيس رمسيس رمسيس .. رمسيس يا بوب
خيال هانى: باستعجاب شديد بووووب!!!
ايوة يا خويا رمسيس
التباع: طب خش رابع ورى
خيال هانى رابع ايه بس هم تلاتة كويس اوى
التباع: لا بتشيل اربعة
خيال هانى: ياعم خلاص خليها تشيل انا مش عايز اركب هنا هركب عربية تانية
التباع: لا ماهى دى اللى بتحمل
خيال هانى:هستنى اللى بعدها .. وكان هاين علية يطلع لسانه للتباع..
..
بعد عشر دقائق كان الميكروباص حمل وطلع
وجه الميكروباص اللى بعده
..
رمسيس رمسيس رمسيس
..
خيال هانى بارتياح رايح على الميكروباص ميعرفش اللى فيها
حس ان الارض بتتهز تحتيه افتكر ان فيه زلزال
بس فكرته اتغيرت عن الموضوع لما بص وراه
ولقى الناس بتهجم على الميكروباص زى الوحوش
مشى بمبدأ .. اجرى يا بنى آدم جرى الوحوش يا تلحق الميكروباص يا ما تلحقووش
..
راح جارى هانى قال يمكن يلحق قبلهم ولا حاجة
واتفاجئ بالمنظر اللى على الميكروباص
لقى امم واقفة قدامة
بمجرد تفكيرة فى انه هيهاجم معاهم
كان مضروب بالبونية فى وشة
رجع هانى مسالم للخلف
خوفا من الهجوم الشرس اللى بيهجموه الناس على الميكروباص
واستنى يركب زيادة وهو مضطر
..
بعد ما انتهى الميكروباص من التحميل
التباع : رمسيس رمسيس رمسيس .. رمسيس يا بررنس
خيال هانى: باستعجاب اشد برررررنس!!!! برنس ايه بس مش الكلام ده اتلغى
وبعدين انت مش خلاص حملت
التباع : لا لسه فى واحد رابع على الكنبه
خيال هانى : طب امرى لله اركب وخلاص
وركب هانى الميكروباص وياريته ما ركب
..
اول حاجة حصلت
طبعا الكنبة ديقة جدا وبالكاد بتشيل ثلاثة انفار
فمابالكو بقى لما يكون فيها ثلاثة ثيران
وهانى دخل اتظلم فى وسطهم
لا وطبعا قاعد فى النص
..
بدأ التباع فى لم الاجره
وعلشان يقوم هانى ويطلع الاجرة دى فيها مشكلة
وبصعوبة بالغة تمكن هانى من انه يطلع
20 جنية واداها للى جمبه قالو واحد لو سمحت
بصلو الراجل باستغراب
قاله يابنى انت متاكد انك عايز تدفع من العشرين جنية
خيال هانى :اه متاكد (وفى سره .. اما انت راجل سمج صحيح )
الراجل: يعنى انت مش معاك فكه
خيال هانى : لا معايا بس انا طلعت العشرين جنية بالعافية ومعنديش استعداد ادخلها واطلع غيرها
الراجل : انت حر
..
وبعت الراجل الاجرة للتباع
وهانى فى انتظار الباقى
عدى ربع ساعة ولسة الباقى مرجعش لهانى
فسئل الراجل اللى جمبه
هو مش المفروض فى باقى عشرين جنيه بردو؟؟
الراجل: اه بس على مايلم من باقى العربية وبعدين يبعتلك الباقى
خيال هانى: طب ماشى ادينى مستنى
..
وبدأ يشعر هانى بجمل تقيل على كتفة الشمال
بيبص لقى الراجل اللى جمبه نايم على كتفة
طبعا هانى اتنرفز لان هدومه كانت نظيفة ومكوية
والراجل عرقان وشكلة مزرى جدا
..
راح هانى صارخ بعلو صوته
انت ياعم انت مش لاقى غير كتفى وتنام عليه
طبعا الراجل قام مفزوع
قاله يعنى اعملك ايه يعنى مانا تعبان وطلعان عينى طول الليل ومنمتش كويس
خيال هانى : ياعم انا مالى انت نمت ولا مانمتش انت هتقرفنى بنومك ليه
الراجل: اذا كان عاجبك محدش قالك اركب زيادة
خيال هانى : انا اركب زى مانا عايز انت اللى لو مش عاجبك هاتلك مخده معاك وانت جاى
الراجل: انت هتسكت ولا اقل ادبى
خيال هانى : تقل ادبك على مين ثور انت وراح ضارب الراجل بالقلم
الراجل : ثور؟!!! انا ثور وكمان بتمد ايدك وطااااااخ
خيال هانى :_________
خيال هانى: _________
خيال هانى: _________
..
فقد خيال هانى الوعى بعد ما اشترك فى خناقة مع الراجل ده
وبعدها بنصف ساعة فاق خيال هانى على صوت مزعج جدا
جاى من السماعات بتاعة الميكروباص
وهو يشعر بألم فظيع تحت عينة الشمال
ولاكن صوت الاغانى اللى كانت شغالة ضيعت الالم
..
راح قايل للسواق
وطى شوية لو سمحت
السواااق : عايش مع الاغانى ولا فى دماغة اى حد بيتكلم
خيال هانى : وطى شوية لو سمحت دماغى مصدعة
السوااق : بيوطى وهو بيقول : استغفر الله العظيم زباين اخر زمن هيشترونا بالاجرة اللى دافعنها
..
افتكر هانى الاجرة راح مخبط على كتف الراجل اللى جمبه اللى كان بيلم منه الاجره وقاله
هو الباقى لسه مارجعش
الراجل: لا لسه قول للتباع لايكون نسى
نده هانى على التباع
الباقى فين لو سمحت
التباع : دافع كام
خيال هانى : 20 جنية
التباع : (فى سره .. انت هاتستنصح مانا عارف بشوفك بس يمكن تكون نسيت)
..
وراح مدى هانى الباقى
مسك هانى الباقى وهو عبارة عن مجموعة جنيهات وانصاص فضة
مافيهومش ربع جنية ورق حتى
راح قايل للتباع
ايه ده انت مدينى الباقى كله فضة
التباع : اللى موجود مفيش فكة اعملك اية يعنى
الراجل اللى جمب هانى : ماقولتلك من الاول ماتدفعش العشرين جنية
خيال هانى : بص للراجل وضحكلة ضحكة صفرا كده وفى سره (انت مال اهلك .. راجل سمج)
وحط الفلوس فى جيبة والود وده يطلع لسانه للراجل ده
..
وفضل هانى قاعد مظلوم بين الراجل التنح اللى بيتدخل فى اللى ملهوش فيه
والراجل البغل التانى اللى اتخانق معاه
وشويه والراجل البغل ده قرر انو ينزل
قال لهانى : عدينى اما انزل
خيال هانى : بالراحة طيب عدى
الراجل : هو ده اللى عندى عاجبك ولا لا
خيال هانى : بصلة بقرف ومردش علية
الراجل وهو نازل طبعا فعص خيال هانى
وراح مديلو بالكوع فى وشة
خيال هانى : اااااااااااااه حرام عليك وشى باظ
الراجل التنح : تاخد مانديل
خيال هانى : لا شكرا
الراجل : دانا ماستخدمتوش غير 7 مرات بس
خيال هانى حس بقرف شديد ومبقاش قادر يتكلم
وراح قايل للراجل :ممكن تسيبنى فى حالى لو سمحت
الراجل : خلاص براحتك انت الخسران
..
وبدأ هانى يشعر بالانتعاش بعد نزول الدبابة البشرية اللى كانت جمبه
ولاكن لسوء حظ هانى
بعد نزول الراجل ده بخمس دقايق
طلعت واحدة هى وابنها الصغير
وقعدوا جمبه
وللاسف حجمهم قد الراجل اللى كان قبليهم مره ونص
وطبعا هانى مبقاش عارف يتنفس
..
قال للست ممكن تتاخرى شوية
الست بكل شراسة وقوة : يعنى اروحلك فين يعنى ناس معندهاش دم
وبدأت بقى مجاملة الشعب الجميلة
اللى يقوله ياعم اعتبرها والدتك
واللى يقوله انزل اركبلك تاكسى
واللى يقوله انت خدت الميكروباص لحسابك
والكثير والكثير من الكلام الجميل ده
..
لحد ماهانى راح قايلهم خلاص خلاص حقكو عليه
على جمب يا اسطى نزلنى هنا
قام هانى ودمه محروق ومتنرفز من الميكروباص
وهو نازل اوم ايه اللى يحصل
القميص بتاعه شبك فى باب الميكروباص
وطبعا اتقطع نصين
طبعا هانى بقى فى قمة غيظة ودمه اتحرق اكتر
واصبح هدفه الوحيد دلوقت انو يوصل لاى محل ملابس
..
دخل على واحد سئله على محل ملابس
وصفله الراجل المحل
واتجه هانى علشان يروح يجيب اى حاجه بدل القميص اللى اتقطع
ونجح بعد مجهود خرافى وضياع كثير جدا من الوقت انو يوصل لمحل ملابس
واشترى هانى قميص جديد
وغير القميص المقطوع
..
بس كان فيه مشكله القميص التانى اللى جابه كان واسع سنه ومبهوق اوى بس مشى الموضوع عادى ومن لخمتة
نسى التكت بتاع القميص وماشالهوش
وبقى كل اللى رايح واللى جاى يتريق على التكت
لحد ما هانى خد باله وراح شايله
وبعد كده بدأ يفكر انو يستكمل مشواره
..
وقف هانى على الطريق علشان يوقف تاكسى
اول تاكسى قابله
رمسيس لو سمحت
السائق : نعم يا حبيبى؟
خيال هانى : رمسيس
السائق : انت بتستخف يعنى ولا ايه .. وراح سايبه وماشى
هانى ايه الهبل ده.. ياعم غور اشوف غيرك
..
رمسيس
______________
رمسيس
______________
هم سواقين التكوسه كلهم اتجننو ولا ايه
رمسيس ياسطى
السائق: وهتدفع كام بقى
خيال هانى : اللى تشوفه انت عايز كام
السائق : 50 جنيه
خيال هانى : لا كتير هم ثلاثين جنيه كفايه
السائق : (ضحكة ساخرة جدا) هاهاهاهاهااااااى ثلاثين جنيه
خيال هانى : اه قليلين
السائق : هاهاهاهاهاهاهاااااااااى وراح سايبه وماشى
..
خيال هانى : هم الناس كلهم اتجننو ولا انا حصلى حاجة
راح موقف واحد وقاله : لو سمحت انا كل ما اوقف سواق تاكسى واقوله رمسيس يتريق عليه ويسيبنى ويمشى
راح قايله : يابنى صباح الخير انت هنا فى رمسيس وراح ماشى
..
خيال هانى : هنا فى رمسيس يانهار ابيض
وانا اللى كنت عايز ادى سواق التاكسى 30 جنيه
يلا الحمد لله اما اروح اسئل بقى على المكان اللى هنتقابل فيه
وراح هانى سئل ووصل للمكان اللى عايزه
ومالقاش حد من النجعاوية خالص
قال الحمد لله جيت اول واحد
وفضل مستنى فترة كبيرة جدا
وهو فاكر انه هيقابل النجعاوية
بس بعد فوات الاوان
لان النجعاوية جم وروحو من بدرى
وتعيش وتاخد غيرها يا هانى
..
والى اللقاء مع عضو جديد
وهو جاى يقابل النجعاوية