اللغه العربيه !!

السلام عليكم ورحمة الله وبركاته

ازيكم يا جماعه ..

بصو

انا هاسأل شوية اسئله كدا ، وهاجاوب من وجهة نظرى ، وعايزة الناس تجاوب معايا ..

1- "بنشوف ناس كتير تقول مثلا كلمة "already" فى وسط الكلام ، او مثلا كلمة "sure" مثلا يعنى ..

او "at least" .. والكلام دا يعنى .. دا غير بقى "noway" و "go to hell" وفى كلمات اتعربت ، زى كلمات مثلا هى حرام وعيب .. "sissy" ودى حرام جدا ، معناها ، مخنث ..

وتلاقى ناس بتقولها ، دا غير الشتايم ، اللى بتترجم فى الافلام ، "عليك اللعنه" و " تباً لك" .. الكلام دا اساسا مش معناه كدا !!

تفتكر دا خطر على اللغه العربيه ؟؟

وليه الناس بتعمل كدا ؟؟

دا صح اساسا ولا غلط ؟؟

=========================

2- الى اى وطن تنتمى ، مصر ، او الوطن العربي ، ام العالم ؟؟

=========================

3- ليه نحافظ على لغتنا ؟؟ وازاى ؟؟

=========================

ana mesh 3arfa elnas betktb belo3'a de keda ezay -3 ??

الجمله دى معناها ، انا مش عارفه الناس بتكتب باللغه دى ازاى !!

هل انت من اللى بيتكتبو بالطريقه دى ، وشايفها صح ؟؟

ليه لا ، وليه اه ؟؟

=========================

اسمحولى اجاوب بقى ..

1- الكلمات اللى بتدخل فى الكلام العربى ، والكلام دا انجليزي ، فى العربي ، غلط غلط غلط ..

اولاً بيدل على جهل المواطن المتحدث ، باللغه الاصلية بتاعته ..

وجهل المواطن المتحدث باللغه اللى بيدخلها فى الكلام !!
حد يقولى ازاى ، هاقولك :- حافظ له كلمتين

ثانياً :- " لا يدخل الجنه من كان فى قلبه مثقال حبه من كبر" او "ذرة من كبر" ..

الحكاية دى احتمال كبير اوى تدخل فى القلب الكبر ، ولو "حبه" او "ذرة" !!

لأننا بنلاقى ناس بتعمل كدا لمجرد الفشخرة على بعض .. ودا حقيقي وانا بلاقيها كتير .. وانا الحمد لله ميييييييح فى الانجليزي ..

بس فى نفس الوقت مااقدرش اقول دا خطر على العربى ، لأن العربى فى اعتقادى محفوظ ..

لكن على الاقل ، فين الهوية العربيه بتاعتنا ؟؟!! فين لغتنا

الشاعر اللى كتب انا البحر .. اسمه حافظ ابراهيم تقريباً ،
شاعر الفقراء ، وشاعر النيل

بيقول فى القصيدة بتاعته :-

وكم عز اقوام .. بعز لغات

ودا حقيقي ، الالمان مايدخلوش كلمه غير المانيه فى لغتهم

الفرنسيين ، يمنع عندهم منعاً باتاً

التحدث بأى لغه غير الفرنسه ، عند التحدث فى اى علم ..

المرحلة الابتدايئه لا يدخلها لغه الا الفرنسيه ..

واى عالم ، يجب ان يتحدث الفرنسيه .. طالما فى بلدهم !!

===========================

وايه يعنى هى اللغه الفرنسيه دى ، بيتكلم بيها اد اللى بيتكلم بيها العرب؟؟

===========================

اما السؤال التانى :-

انا فى الطبيعي بتاعى انتمى للعالم ، ثم مصر ، ثم الوطن العربى ...

لكن انا بصفتى لؤلؤة يعنى

انتمى للوطن العربى وبعدين مصر ، وبعدين العالم دا يتحرق ..

========================

اما بقى ليه نحافظ على لغتنا ؟؟

علشان "وكم عز اقوام بعز لغات"!!

علشان انا شايفه انه لو العربي ضاع ، هويتي هاتضيع .. وانا هاضيع ..

كمان مش هايبقى فى عز لقومنا ، علشان كدا انا شايفه انه فعلا ، لازم نحافظ على اللغه بتاعتنا ..

على الاقل ، لما يبقى عندنا علم ، والناس عايزة تاخده ، تتعلم العربى ، علشان تاخده ..

============================

ازااى دى بقى صعبه .. وانا عن نفسى فى حاجه كدا هاعملها على المنتدى ، قريب ان شاء الله ، بس بعد التعديلات اللى صيحو هايعملها ، وتكون بخصوص الحكاية دى .. يارب الفكرة تعجبكو ان شاء الله ..

============================

اما اللغه اللى هى انجليزي معرّب دى ،
انا ضدها تماماً ،
واحس انه اللى يحكتبها شخص يعنى مش عايزة اقول حاجه علشان الناس ماتزعلش منى ، بس سامحونى ، هو شخص جاهل ، ومش جاهل وبس
دا
أُمى مايعرفس يكتب اللغه بتاعته ، يبقى ايه ؟؟ .. كمان بتولد اخطاء كبيرة جدا فى الكتابه العاديه
يعنى تلاقى واحد كل كتابته بالطريقه دى ، ييجى يكتب عربى ، يخطأ ..

يكتب مثلا :-
"ذنب" >> "زمب"
"ان شاء الله" >> " انشاء الله"
و "والله" >> "واللهى" او "واللة" ..

وبيتهيألى مش مستحب ابداً ، اننا نغلط فى اسم "الله" ربنا يعنى ..

=========================

بس كدا ، انا بس حبيت اسأل كام سؤال ..

الموضوع لسه له بقيه .. بس هاكتب لكم شوية اسئلة قريب

اتمنى ان الموضوع يعجبكم ، واتمنى انكم تكونو بتكتبو صح ، وياريت تكتبو ردكم ، حتى لو مخالف لرأيي ، بس على الاقل ، فى حدود القوانين ..