بتحب مصر؟؟!!

السلام عليكم ورحمة الله وبركاته

ازيكم يا جماعه

بصو انا المرة دى متخيلة انى هلاقى آراء كتير متضاربه ومختلفة جدا جدا

بس انا عايزة اسأل سؤال :-

بتحب مصر
؟؟
مش هو دا السؤال ، معظم اللى هايردو هايقولوا اه ..

بس بقيت السؤال ، هو اللى ممكن يعمل اختلاف

بتحب مصر ، على الرغم .... من عيوبها ؟؟!!

فى علامة تعجب هاتطول هنا

ناس تقول مصر مكروهه ، والمصرى مغصوب .. وناس تانيه تقول انه مصر ، ام الدنيا

وناس تقولك مصر دى ماتستحقش لقب ام الدنيا ، وناس تقولك مصر ، هى الحضارة ، والقوة

ناس تقولك ماحدش بيحب مصر ، وناس تانيه تقولك ، العالم بيحب مصر

انا بقولك

بتحب مصر

على الرغم من حكومتها ؟؟؟

بتحب مصر على الرغم من زبالتها ، وحرميتها ، وريسها وشعبها ، وتعليمها ؟؟!!

بتحب مصر اللى علمت ولادها الخيانه ؟؟

بتحب مصر اللى بتعلم عيالك شعارات ، وقواله ؟؟!!

بتحب مصر ، على الرغم من النصابين اللى كل ما تمشى ، تنكعبل فى واحد منهم ؟؟

بتحب مصر على الرغم من انك ماتعرفش تنزل بناتك ، فى الشارع ، من غير راجل ؟؟

بتحب مصر على الرغم من فقرها ، على الرغم من تخلفها ...

على الرغم من

من انك عايش مش عارف تتكلم ولا كلمة ، ولو قلت كلمة واحده ، تروح "ورا الشمس" ..

"يعنى ايه لما ابقى ماشى فى حالى ، اتشد اشتباه" .. هشام الجخ

تفتكر .. بتحبها ؟؟

يعنى ايه تلاقى فيلم فرنسى ، يحكى حكاية طفل يهودى ، المصار قتلو ابوه ، ويرفضو يرفعوه ؟؟

بلد ابوهم هى ..

يعنى ايه تلاقى الكوبرى واقف وتحت الكوبرى واقف ، اصل الريس معدى ؟؟

بلد ابوهم هى ؟؟

يعنى ايه تلاقى زبال بيتأمر عليك ، والخباز بيتأمر عليك ، والسباك بيتأمر عليك ؟؟

يعنى ايه تلاقى النجار ينصب عليك ، والبياع ينصب عليك ، والنصاب يتنصب عليه؟؟

يعنى ايه تلاقى كل حاجه زباله ، خدمات زباله ، وموظفين زباله ، مايمشوش الا برشاوى .. ناس زباله

يعنى ايه تلاقى واحد يقولك بحبك يا مصر ، والناس تقولك :- دا مجنون ماتصدقهوش

يعنى ايه الريص يتعبد ولا حدش يقدر يقوله لا .. يعنى ايه احمد نظيف لو قال : اه : يبقى الشعب لازم يقوله : اه

يعنى ايه صحافه مرعوب ، واعلام خايب ممنوع


يعنى ايه تلاقى رئيس وزرا انجلترا بالعجله بتاعته ، ورئيس الوزرا عندنا ، ماينفعش نفرجاهله ، لحسن "يتشائم" .

. يعنى ايه لما تقول لا للجدار العازل ، تنقتل .. ويطلع الريس يقولك الديموقراطيه ؟؟

يعنى ايه الريس يقول :قانون الطوارئ .. ولو قلنا لا ، ننقتل ، ويطلع الريس يقول ديموقراطيه ؟؟

يعنى ايه تلاقى واحد يقولك انا بحب مصر ، ويسافر يروح امريكا ، علشان يشوف حياته

فين حبك يا مصر ؟؟

فين حبك فى قلوب الناس ؟؟

خدتى الحب دا ولا ايه يا مصر ؟؟ مع انى لسه بحبك ؟؟

بحبك لانك ام الدنيا

الحضارة


بحب الحجارة المحطوطه على الحجارة ، وعملت هرم

بحب الجمل اللى ماشى ، واتخرم

بحب الراجل اللى راكب الهرم ، يقولك ادفع تركب ، ويقول لسياحك يخمسن جنيه


بحب النقوش دى ، اللى مش فاهمه لها معنى ..

ويقولولك ، دى لغه قديمة ، وفين المخزى ؟؟

بحب اللى يقولك بحبك ، وهو منافق ولا عمره حبك ..

مش بعيب عليه يا بلدى .. انا كمان بنافق وبقولك بحبك

بس مش عارفه اذا كنت لسه بحبك ولا خلاص

زرعك فين يا بلدى ،
لما القمح مش مكفينا ،
ونروح نشتريه سم هارى من امريكا

لما حتى الفن مش فالحين فيه

واما حتى التفاخر مش لاقيين نفسنا فيه

مش عارفين جدودنا بنو ازاى
، ولا عارفين حنطو ازاى ،
ولا عملو ايه تانى وتالت ،
دا احنا حتى مش متأكدين من اللى بناه

ايوة الهرم

مش متأكدين من اللى بناه ...

يا ترى ، بتحب مصر على الرغم من عيوبها

انا عن نفسى ،
احبها لأنها البلد اللى اتولد فيه ،
واحب الارض اللى طفحت منها

لكن ماظنش

انه لو جالى فرصه اهرب منها ،
هاقعد فيها ..
مش مستعدة اموت من الجوع انا وعيالى

مش مستعدة اموت من العطش ،
والنيل ادامى ،
بيتسحب منك ومنانى ..

بس برضه ، ماقدرش اسيبك ، اروح فين ، دا انتى الوحيدة اللى اعرفك ..

اعرف لغتك
واعرف امكنتك ،
واعرف ازاى اعيشك
.
.
مع انى برضه ، حاسه بغربه فيكي ..
يستر منك ،
بخاف منك ،
ماعرفش لسه طبعك ،
ياترى بتغدرى ،
بللى مات فيكي ؟؟!!

يا ترى ياللى قريت كلماتى ..
فهمت انت بتحبها ولا لا ؟؟!!
قولى بقى ، عارف الشعور اللى جواك دا ، شعور ايه بالظبط ؟؟