السلام عليكم ورحمة الله وبركاته ..

ازيكم يا جماعه

===========================

انا بس جه سؤال كدا فى دماغى عايزة اعرف يعنى

احنا لما سمعنا عن انتخابات امريكا ، لقينا اوباما مشهور فى امريكا جدا ، وكان مع اوبرا وينفرى فى حلقة من الحلقات ، وفى ناس كتير مناصرة ليه ، واللى مش مناصر ليه مناصر لكلينتون ، واللى مش مناصر لدا مناصر لدا ، وهكذا ..

((ومش عايزة حد ييجي يقولى:- يعنى هى امريكا مش عارفه ايه ، انا عايزة ردود على الموضوع نفسه ، علشان الناس اللى بتحب تترك بصمتها فى غيظي))

انا لغاية دلوقتى ، مش لاقيه ولا وحد ينفع يبقى مؤهل انه يبقى رئيس !!

يعنى واحد زى ايمن نور ، انا مش شايفاه حد عدل ، ومش قادرة اتخيله ينفع يبقى رئيس !
مش عارفه مش قادرة اتخيله ،قاعد قعده بشار الاسد ، ولا قوة اردوغان ف الكلام ، ولا اصرار نجاد ، ولا ذكاء مبارك فى وقت ما ..

ولا شايفه واحد زى البرادعى "حاليا" ينفع يبقى رئيس خالص !!!!
يعنى واحد ماعاش فى مصر ، وعايش حياته فى لندن .. ايه اللى ممكن يخليه يبقى رئيس !! يعنى يوم ماييجي مصر ، يبقى رئيس!!!!!!

ولا واحد زى عمرو موسى ينفع يبقى رئيس ، واحد اساسا تحت حكومة مصر ، مبارك يقوله يمين ، يمين ، شمال شمال !! وطبعا حكومتنا مش بتقول حاجه كدا ، دا كله من ماما امريكا ، وماما اسرائيل!!
يعنى واحد بلا شخصيه ، مش عارف يشكم ولا يحكم جامعة الدول العربيه ، ولا عارف يقعدهم على ترابيزة !!!!!!

وطبعا لو رحنا على جمال مبارك ، الاهبل دا ، ماينفعش يبقى رئيس ، احنا شوفنا من الوطنى الهطل ، وكفايه كدا عليه ، لأنه هو وابوه حاكمين مصر ، هايبقى شكل وبس ، انه الرئيس اتغير !!!!! لما يبقى زى ابوه كدا فى الحرب اهلا بيه ، انما فى اى وقت تانى يبقى فى ستين الف داهيه ، ودا شكله فافى اساسا مادخلش الجيش!!!!!

انا عايزة اعرف ، رأي كل واحد فى الاربعه اللى اتذكرو دول ، ولو فى خامس ، الشخص يقول الفكرة بتاعته عنه ، ويقول ان كان ينفع ولا لا ..

اتمنى الموضوع يعجبكم !!!!!!