السلام عليكم ورحمه الله وبركاته

من غير مقدمات

كل شويه الاقى حد يتكلم عن مصر والحكومة والمشاكل

هى يعنى كانت مصر والحكومة قالتلك ارمى زبالتك فى الشارع وقول اشمعنى انا لحد مالشوارع بقت كلها زباله

ولا مصر هى اللى قالتلك ماتزاكرش واحفظ ياواد اخر شهر كلمتين ورصهم فى ورقة الامتحان واتخرج ماشاء الله بتقدير بس ولا انت فاهم اى حاجة ومافيش ولا شركة راضيه بيك

ولا مصر قالتلك اول ماتركب الاوتوبيس ياحبيبى كسر وخرب واكتب للابد زى ماانت عايز عشان بعد كده لما تركب الاوتوبيس تانى تبقى قرفان

ولا هى اللى قالتلك اقف اتخانق مع سواق تاكسى ووقف الطريق وراك وفى ستين داهية الناس والمصالح اللى هاتتعطل

عارفين احنا عايزين ايه عشان نبقى راضيين عن مصر
عايزين نتخرج من الكليه تيجى مصر تبوسك من هنا ومن هنا وتقولك هديه نجاحك ياحبيبى وظيفة مدير عام وعربيه وشقة وعروسة لو عايز

امال ماهو ده واجب مصر امال هى ام الدنيا كده على الفاضى مش لازم تدلع ولادها مش لازم ولادها يأنتخوا ويصحوا العصر وياخدوا الشاور ويلاقوا كل حاجة جايه لحد عندهم

والله عيب يعنى لو والدك قالك ياابنى انا مش معايا فلوس كفايه اصرف عليك وعليا ديون تسيبه وتقوله انت مش بابا انا هاروح اشوف بابا تانى احلى منك ولا تقف جنبه راجل وتساعده وتشتغل وتتعب علشانه

ماهى مصر هى كمان بلدنا ومحتاجلنا نقف معاها ولا نشتم فيها
نبدا بنفسنا ونثبت اننا خير جنود الارض ولا نرمى كل حاجة على الحكومه
حتى لو الحكومة وحشة وانت مالك فى حاجات كتيرة فى ايدك انت تغيرها

ياما شباب عرفوا هما عليهم ايه وعايزين ايه وخدوا كورسات وطوروا من نفهم واشتغلوا وخدوا خبرات ودلوقتى الشركات بتخطفهم عشان اتحركوا

وياما ناس فكروا وخدوا خطوات فى حل مشاكلهم اى كانت المشكله واتحلت وعايشين وده عشان هما ايجابيين مش سلبيين زيينا مش فالحين غير فى الكلام وتعليق اخطانا على شماعه الحكومه ومصر

لا حول ولا قوة الا بالله...........والله يا مصر انتى مظلومة معانا