السلام عليكم ورحمة الله وبركاتة



اخوانى واخواتى
ازيكم جميعا
كل عام وانت بخير
اعاد الله علينا الايام الجميلة دى
واحنا متجمعين

واحشنى جدا جدا
عندى لكم موضوع اعلم جيدا ان طرحى له الآن ليس وقتا مناسبا
ولاكن فكرة الموضوع تراودنى من فترة
وبسبب ظروف غيابى فى الفترة الاخيرة لم اجد فرصة لطرح الموضوع
واخيرا وبعد طول غياب دام قرابة شهر عدنا والحمد لله
ولاكن لا احد يعلم ما هو السبب الخفى وراء هذه الغيبة الطويلة
مش دى مشكلتنا دلوقت مشكلتنا اكبر من كده بكتير حد يقوللى ايه هى
المشكلة التى تواجهنى وتؤرقنى دائما فى بداية اى موضوع الا وهى المقدمة التى اخسر بها وقت ومجهود من الافضل توفيرهم
وهنا نقطة البداية
الحمد لله المقدمة خلصت نخش فى المفيد بقى

من يجى يومين ثلاثة كده كنت ماشى فى الشارع بمنطقة الى حدا ما شعبية وفى نفس الوقت راقية
نظرت الى احد البيوت التى لها بريق غير طبيعى
شدنى جدا منظر عمارة وهى واقفه فى شموخ منقطع النظير
عمارة جميلة جدا رأيتها من الخارج تمنيت ان اكون من المحظوظين سكان هذه العماره
وعندما ذهبت لكى اسئل عنها علمت بأنها من اقدم البيوت فى المنطقة
فاستغربت كثيرا كيف هى قديمة وبهذا الجمال
قادنى الفضول لكى اقترب كثيرا واتعايش مع سكان هذه العمارة ولو ساعة من الزمان
فاقتربت وانا اتأمل تلك العمارة الرائعة
وعندما اقتربت اكثر سمعت هذا الحديث دار بين اثنين داخل العمارة

الاول: ياباشا عايزين نخلص بقى
الثانى:ومين قاللك اننا مش شغالين
الاول: بتعملو ايه يعنى
الثانى: دلوقتى الكهربا قاطعة فى العمارة وده بقى فى اغلب الاوقات
وطبعا احتياجات الشعب اااقصدى السكان مش هتتم بدون الكهربا
وبالاخص فئة الادوار العليا
الاول: وفى الحالة دى ايه اللى هيحصل
الثانى: اللى هيحصل اننا كده خلصنا من فئة الادوار العليا وحطمنا حياتهم
الاول: طب ماهم ممكن يطلبو مساعده اااقصدى دليفرى
الثانى: انا قولتلك ان الكهربا قاطعه يعنى الاسانسير مش شغال
يعنى اللى هيجى يساعدهم هيدفن معاهم
الاول: ياسلام عليك يا اخى دانت دماغك سم

وسكتو قليلا ثم استكملو حديثهم
قائلا الاول:
طب يا سيدى كده خلصنا من فئة والباقى
الثانى: قصدك على فئة الادوار المتوسطة اللى هى الوسطى يعنى
الاول: اه
الثانى: يا سيدى الناس دى بتفلفص اساسا
يعنى هم مفحوتين ليل نهار فى الشغل وفى زنقة اتوبيسات ووجع دماغ
مش محتاجين عناء فى القضاء عليهم
الاول: ازاى يعنى
الثانى: يعنى احنا بس نفرض عليهم ضريبة ااااقصدى ايجار عالى
وهم اساسا قبضهم مبيكفيهمش
فما بالك بقى لما يكون الايجار عالى عليهم
هيموتو من الحسرة
الاول: ده غير مشكلة الكهربا والغاز اللى بيواجهوها بردو
الثانى: لا مشكلة الكهربا والغاز دى على السكان كلهم واى حد هيعانى منها
الاول: لا بجد تسلم افكارك

الاول: مش باقى غير فئتين
الثانى: قصدك الادوار الارضية يعنى
الاول: اه والناس اللى تحت الارض
الثانى: خلينا نمشى واحده واحده
بالنسبة للادوار الارضية فاهم ميتين اساسا مياه الصرف اللى غرقانين فيها وغبار العربيات اللى ليل نهار عندهم
بالاضافة الى الامراض اللى بتجيلهم من الحاجات دى + مشكلة الكهربا والغاز
يبقوا مش ناقصهم غير حاجة واحدة
الاول: ايه هى
الثانى: احنا نخليهم يبيعو مخدرات ويشربو كمان
الاول: ازاى وقوانين العمارة ماتسمحش بكده
الثانى: هو ده الوتر الحساس اللى هنلعب علية
الناس دى عايزين دخل باى طريقة احنا هنديهم مخدرات بطريقة غير مباشرة علشان يبيعوها فى العمارة
الاول: طب وهتديهالهم ازاى
الثانى: هخلى ناس من خارج العمارة تديهالهم
وهو ما هيصدقو
اولا هيدمنوها
ثانيا هيبيعو لسكان العمارة
الاول: وبعدين
الثانى: نقفشهم احنا بقى وبم ان قوانين العمارة ما تسمحش بكده
وبم ان الاتجار فى المخدرات عقوبتها الاعدام
يبقى احنا خلصنا منهم
وفى نفس الوقت زودنا هموم الناس الثانية
الاول: الله عليك انا كنت شايل هم الناس دى اوى لانهم اكتر فئة موجودة عندنا فى العمارة
الثانى: ماتقلقش من اى حاجة كل شئ معمول حسابه

الاول: مش باقى غير الناس اللى تحت الارض
الثانى: اديك قولت تحت الارض
يعنى مدفونين تعرف ان الناس دول اساسا كانو من اصحاب الادوار الوسطى
ومن اللى احنا بنعمله بقو تحت الارض
الاول: ايوه عارف بس عايزين نخلص منهم خالص
الثانى: الناس دى كده كده لا بيوصلهم مياه ولا كهربا ولا غاز ولا اى مرافق
يعنى لو وصل لواحد فيهم حاجة زى كده
ممكن جيرانه ياكلوه
الاول: مش فاهم
الثانى: فتح مخك شوية
الفتن لازمتها ايه
الاول: العداوة بين الناس
الثانى: بالظبط هو ده اللى هنعمله
هنشعل الفتنة ما بينهم
لان الناس دى متشردين وبلطجية وبتوع مشاكل
فالما احنا نوقع ما بينهم هايقضو على بعض
وبكده نبقى اتممنا العمارة كلها

الاول: طب ما انا عندى حل هنخلص بيه من العمارة كلها
الثانى: قول
الاول: نعمل كل يومين حريقة فى دور ونقول انهم بسبب ماس كهربائى لان الكهربا لما جت
كانت عالية وعملت ماس وولعت
الثانى: يااااه دانت قديم اوى
الكلام ده اتلغى من زمان وبقى مكشوف اوى
لا هو زى مانا قولتلك
الاول خلاص زى ما تحب

وعندما انتهو من الحديث بدأت فى الابتعاد عن هذه العمارة
التى كدت ان ابكى بجوارها من المعاناه التى يعانيها سكانها
وبدأت ان اسرح فى افكارى
واردد حديث هذان الشخصان وافكارهم الدنيئة التى تنم على الهدم والخراب

وفى وسط دهشتى فوجئت باحد قادم بأتجاهى
فنظرت اليه من بعيد
انا تعبت هتكلم عادى بقى
بصيت على الشخص اللى كان جاى عليه لقيت انه شاب
عمره من 25 الى 30 سنه
ولقيته داخل على العمارة
قولت لا لازم اندهله

وندهت عليه لف وبصلى فى استغراب وكانه بيقول ايه اللى موقفه هنا ده
وجه عليه وقالى
نعم انت بتندهلى
قولتله ايوه معلش لو فيها تطفل منى
انا كنت معدى من هنا وعجبنى اوى منظر العمارة بتاعتكو فا وقفت جمبها شوية
سمعت اتين بيتكلمو عن خراب منقطع النظير
سوف يلحق بالعمارة
فا ممكن لو تكرمت اخد من وقتك شوية وتشرفنى وتقعد تحكيلى عن مشاكل اعمارة دى

قاللى هاها قال عمارة قال هاحكيلك ايه ولا ايه
العمارة دى هنا من آلاف السنين
شايف كل العماير اللى عمالين ينضفو فيها جمبنا دى
قولتله اه
قاللى كل دى كانت عشش
واحنا عمارتنا كانت هى منبع الخيرات
على كل الناس
لاكن للاسف من كثرة الافعال الدنيئة بالعمارة دى
اصبحت عمارتنا من بره زى مانت شايفها كده جميلة وحلوة
لاكن من جوه حاجة تانية كلها مشاكل وقرف
وفوق كده جيرانا اللى كان خيرنا عليهم طول العمر ومكناش بنبخل عليهم بحاجة
دلوقت بيستحكرونا وبيقولو علينا شحاتين

قولتله طب وايه السبب فى كده
قاللى كل فترة واحد يجى يشترى العمارة يخرب فيها شوية
وآخر واحد اشتراها بقاله 30 سنه ومش عايز يسيبها
قعد يهتم بالظواهر لحد اما العمارة خربت من جوه
الفساد انتشر فيها
معظم السكان بقوا جهلة
معظم السكان بقوا فقرا
معظم السكان بقوا عاطلين
يعنى حاجات كتير كده

ده غير مشاكل المرافق اللى بقت زى الزفت
الكهربا يوميا بتقطع مده لا تقل عن 6 ساعات
المفروض اننا عندنا غاز طبيعى
اسكت مش هنشتريه من عمارة تانية
هههههه
هنشتريه من عمارة تانية كنا بنبيعه لها ب جنيه
وهنشتريه ب 14 جنيه
آخر حلاوه

يعنى من الآخر احنا قربنا على النهاية
قولتله معلش ربنا معاكم
قاللى ربنا يسهل وراح سايبنى وقايم

قعدت لوحدى افكر فى الكلام اللى قاله الشاب ده
وبقيت حزين جدا على حال العمارة دى
قولت لو السكان دول اتجمعوا ووقفوا قصاد الناس اللى بتخرب دى
هيمنعوهم
بس ياريت صوتى يوصلهم
ويفهمونى ويفهموا مين هما السكان دول

يارب يكون الموضوع عجبكم
لكم منى ارق التحيات