" يارتني كنت ولد..اجري واتنطط واعيش حياتي براحتي
يارتني كنت بنت..ابقى ملك زماني كل حاجه بتجيلي لحد عندي وياسلام ع الدلع اللي كنت هبقى فيه "


أحمد و حلا..وعقار ماء الورد..!!!

أحمد وحلا اخ وأخت توأم متربيين من صغرهم على عادات وتقاليد بلادنا العربيه

وزي أي اخ وأخت يوم متفقين مع بعضهم ويوم مختلفين ويوم خناق ويوم ضحك وهزار

امهم ربت منزل كل همها انها تربي اولادها وتفرح بيهم وابوهم دكتور كميائي وممكن نقول عليه العالم المغمور

:: العشا ::

الام: حلا يلا قومي حضري العشا لاخوكي

حلا: وهو صغير مش هيعرف يحضره لنفسه يعني

الأم: اخوكي ولد انتي بنت..يلا قومي وبطلي الدلع اللي انتي فيه ده

حلا: ييييييييييييييييييه عليييييييييينا..علشان هو ولد ولد ولد وانا ايه الخدامه ولا لقتوني على باب الجامع

الام: وانتي فاكره لو كنا شفناكي على باب الجامع كنا اخدناكي..ده انتي جتلنا كده زي القضا المستعجل يا اختي

حلا: شكرااااااااااااااااااااا يا ماما

الام: العفو ياروح ماما..يلا قومي حضري العشا

حلا قامت تحضر العشا..وكل اللي في بالها انها ليه اتولدت بنت وانها بتتمنى تكون ولد زي اخوها..لانها شايفه ان الولد حياته كلها مميزات وهي حياتها مش فيها ولا ميزه..!!!


:: ميعاد بكرة ::

احمد وصل البيت وكانت لسه حلا في المطبخ بتحضر العشا

احمد: السلام عليكم

الام: وعليكم السلام يا استاذ..لما هتكون هتتأخر ياريت يعني تفتكر اني امك وتبلغني

احمد: ياست الكل ما انا كان غصب عني كان ماتش جامد فنسيت نفسي

الام: نسيك الموت يا حبيبي

احمد: فين العشا

الام: حلا اختك بتحضره جوه بقالها ساعه دلوقت

احمد: ييييييييييييه حلا اللي هتعمله الحكايه ناقصه وجع بطن وقرف

الام : يا واد اختشي مش تقول كده على اختك

احمد : مش انا اللي بقول ده واقع وهتشوفي بنفسك بعد شويه

الام بتبتسم: حرام عليك ياواد انت ههههههههههه..الا بالحق يا احمد بكره لازم تصحى الصبح بدري

احمد علمات وشه كلها اتغيرت: لييييييييييييييييييييه ان شاء الله

الام : ابوك كمان شويه هيرجع وانا هنزل معاه البلد لان جدك بعافيه شويه

احمد: ماشي وانا مالي اصحى بدري ليه
الام : علشان توصل حلا الصبح وتخلصلها ورقها الناقص

احمد : لازم بكره يعني مالما بابا يرجع

الام : مافيش وقت عبالت مانرجع يكون التقديم خلص

احمد: ادي الاخوات البنات مش بيجلنا من وراهم غير القرف والتعب كله لكن هما قاعدين وايه ياعمي اخر دلع
الام: ماحدش عجبه حاله الزمن ده وعجبي

احمد : ما تاخد مواصلات وتروح تخلص ورقها بنفسها ناقصها رجل ولا ايد

الام: اختك وعايزها تتبهدل في المواصلات..لا فعلا راجل

احمد: تتبهدل مين..دي تبهدل بلد وتخوفهم كمان

الام : اتكلم على اختك كويس ولو عرفت ان بكره مش وصلتها وخلصتلها ورقها مش هيحصل كويس

احمد دخل يغير هدومه وهو مضايق وشايف ان اخته مدلعه وفيها ايه لو راحت لوحدها يعني هو كان الخدام والسواق الخصوصي بتاعها..


:: وقت السفر ::

الاب وصل البيت بعد ما احمد دخل اوضته علطول..وسلم ع الام ونده على حلا

الاب: ازيك يا حلا

حلا: الحمد لله يابابا

الاب: خدي العصاير دي حطيها في التلاجه انا جيابهلكم انتي واخوكي علشان انا وماما مسافرين دلوقت

حلا: طيب يابابا يا حبيبي ما تستنوا للصبح دلوقت الوقت متأخر اوي

الاب: كلها ساعتين ياحلا..متخافيش ياحبيبتي

حلا: خلاص يابابا لازم ترن عليا اول ماتوصل علطوووووووول

الاب: من عيوني يا حلا..يلا روحي استعجلي مامتك وقوليلها اني مستنيها تحت في العربيه

حلا: حاضر يابابا

حلا استعجلت مامتها و حطت العصير في التلاجه واعدت تحضر السفرا علشان تتعشا هي واحمد


:: على السفرة ::

بعد ما حضرت حلا السفرة..دخلت تجيب العصير بتبص لاقيت ازازة عصير شكلها غريب شويه استغربتها اوي
فتحتها وشمتها لاقيتها ريحتها زي ريحة ماية الورد عملت العصير وحطت عليه شويه من الازازه دي
وندهت احمد علشان يتعشوا

احمد: يااااااااااااااه انتي لسه فاكره انا من زمان قالولي انك بتحضري العشا
حلا : كنت بحضرلك عشا مفتخر مع انك متستهلش
احمد: لسانك اطول منك يا فاشلة
حلا: ال فاشلة ال..كُل كُل
احمد بيدوق العصير: هو العصير ده طعمه كده ليه
حلا: اصلي حطيت عليه ماية ورد بابا كان جايبها مع العصير
احمد: طيب
اتعشوا وشربوا العصير وكل واحد فيهم دخل ينام


:: الصبح ومعاد حلا ::

حلا فتحت عنيها الصبح بدري على غير عادتها وقبل ما المنبه بتاعها يضرب وقامت فايقه جدا وكلها نشاط

قامت علشان تحضر نفسها وتصحي اخوها علشان يفطروا قبل ما ينزلوا وكويس انهم يروحوا بدري

بعد ما قامت بتبص في المرايه بتاعتها..اتصدمت صدمه كبيره

واعدت تعيط كتير معقول..اللي شايفاه ده صحيح طيب إزاي وليه

قالت في نفسها انها اكيد لسه بتحلم معقول انها تكون لسه صاحيه راحت دخلت الحمام وغسلت وشها مليون مره ودخلت جري على اوضتها

وبرضه شايفه في المرايه نفس المنظر..حلا بقيت ولد..!!!

حاسيت انها في مصيبه ازاي هتوري احمد اخوها منظرها ده..والمفروض انه في ميعاد كمان بعد شويه هتتصرف ازاي وهتعمل ايه مع الوضع الجديد..؟!


:: الاتفاق ::

رن منبه احمد واحمد ولا هنا ولا كإنه سمعه فين وفين لحد ما سمعه وقفله
ومامته اعدت تتصل عليه ع الموبايل علشان مش ينسى معاد الصبح
قام احمد وهو كله خمول وكسل وعلى غير عادته بص في المرايه
احمد اتصدم..هو كمان اتحول

أحمد بقى بنت..!!

احمد مش مصدق نفسه جري على اوضة اخته يقولها انها شايفاه ازاي

وكان في نفس الوقت حلا قررت انها تقول لاخوها ع المصيبه اللي هي فيها

دخلت حلا على احمد

هما الاتنين بصوا لبعض في ذهول..!!

حلا: انت بقيت بنت
احمد: بس متقوليش بنت اكيد في حاجه غلط
حلا: هنعمل ايه دلوقت
احمد: اكيد ده حلم..اكيد مش كده يا حلا
حلا: حلم ازاي بس شكله حقيقه احنا اتحولنا يا احمد اتحولنا
احمد: طيب ازاي وليه
حلا: مش عارفه مش عاااااااااااارفه
احمد: مافيش غير حل واحد مؤقت لحد ما نشوف دكتور ولا حاجه
حلا: ايه هو
احمد: اني اكون انا انتي وانتي انا علشان محدش يحس بحاجه..ونتفضح في الحتة
حلا: بس ازاي
احمد: هقولك على مواعيدي كلها انهارده وانتي تقوليلي على اللي هتعمليه انهارده واللي يتزنق يتصل ع التاني على موبايله
حلا: موافقه..مع اني متأكده اننا مش هنقدر

بعد ما كل واحد ادى التاني الحاجات اللي مفروض يعملها..لبسوا وخرجوا علشان يروحوا يقدموا لحلا ورقها

ياترى هيحصل ايه وهيقدروا يستمروا في الوضع ده كتير..؟!



لو عايزني اكملها هكملها مش عايزين يبقى باقي القصه متروك لخيال القارئ

القصه دي مش حطتيها غير في منتدى واحد قبل ده بس