مدخل{
SpiRit of GhosT :"عالم الغموض عالم تحتبس فيه الانفاس
من هول ماترى من حقائق لا يستطيع العقل استعابها..
نعم إنها حقيقة اثبها العلم ان كنت لاتصدق عليك أن تثبت العكس"}


مساء الرعب والغموض \ صباح السحر والشعوذه


المدخل هو عباره عن تمهيد لما وراء الطبيعة أو لعلم ما وراء الطبيعة

اللي كثير منا للاسف يغفل عنه..ووضعه في كفة الخزعبلات والخرافات او بمعنى اصح الكلام الفارغ والعقول الخاوية

::علم ما وارء الطبيعة ::


كتير بنشوف لما بتعرض قضيه زي عن الجن او العفاريت او الخوارق بنلاقي واحد لازم يقول العبارة دي "ده كلام فارغ وانا مش مصدق ولا كلمة او دي خزعبلات"



طيب ليه مش بنصدق..؟!

اول حاجه وده السبب الظاهري..أن كثير من العلماء لا يعترفوا الا بحاجه واحده الحاجات اللي ظاهرة والملوسه يعني لا يعترفوا بغير المادة

وده جعل الناس تنقسم إلى تلات انواع:

الاول: اللي هو لا يصدق ابدا بالكلام ده ايمانا منه ان علم الطبيعة بيقول كده"الفيزياء" يعني هو لا يعترف بغير المادة الملموسة فقط

التاني: اللي مصدق على طول الخط..خرافات يصدق خوارق يصدق ومؤمن بالكلام ده جدا جدا..والنوع ده هو السبب في ظهور الدجل والشعوذه

التالت: اللي هو مصدق ومش مصدق..قلبه مصدق وعقله رافض


طيب تمام نرجع لنفس السؤال الاول تاني..ليه مش بنصدق..؟!

السبب بسيط جدا..بما اننا بنتكلم ان ماوراء الطبيعه ده يعتبر علم بل هو فعلا علم يطلق عليه "الميتافيزيقيا"

هرجع بيكم لايام ما كنا في الدراسه وبندرس الكمياء..كانو بيقولولنا اياميها ان
العالم كله مكون من ذرات وجزيئات و الكترونات وبروتونات سابحه ومهتزه..<<< ها فاكرين ولا

وده القانون العام :"إهتزاز الذرة بما فيها"

يعني ايه الكلام ده..؟!

ده يعني ان الكون كله عبارة عن موجات بتختلف في طولها الموجي

برضه يعني ايه..؟!

يعني ببساطة كده كلما ذاد اهتزاز الحاجه كل ما بتزيد الرقه و بيكون عنده شفافيه بنسبه عاليه

وده ايه علاقته بموضوعنا..؟

ده هو ده اصل موضوعنا..قالو ان الطبيعة بسيطة والعقل البشري معقد
لكن الحقيقة هي العكس الطبيعة معقدة جدا والعقل البشري هو اللي بسيط بالنسبه للطبيعة
فالعقل البشري محدود بمعنى انه مش بيقدر يستوعب غير اشياء حاجات معينه فقط
وكل حواسنا البشرية محدودة مش بتقدر تستوعب غير مدى معين
فمثلا لو هنتكلم عن حاسة السمع فهي مقيدة بين عتبة السمع وعتبة الالم (من 20 الى 20000 ذبذبة في الثانية) اي ان الاذن البشرية لا تدرك الا احد عشر سلما ونصف من اصل بلايين السلالم الصوتية واي شي ذو رتبة اقل او اعلى فاننا لا ندركه

عارفين الكلام ده يعني ايه..؟

الانسان لا يستوعب الا الاحداث الظاهره فقط!!


وده اللي اوجد علم الكونيات اللي افترض فيه العلماء وجود اكوان متداخلة مع بعضها اي يخترق بعضها الاخر دون ان يشعر احدها بوجود الاخر نظرا لتغاير رتبته في التردد

وده السبب الاساسي لوجود علم الميتافيزيقيا او فيزيقيا او كما يطلق عليه علم ماوراء الطبيعة او علم الباراسيكولوجي .. و يعني بعلم ما وراء النفس .. او ما وراء الفيزياء .. مع انه متعلق بشدة بعلم الفيزياء..


لسه معترض ومخك رافض..؟!

لو لسه معترض..هقولك طيب انت ناسي ليه القرآن الكريم اللي وضح لينا الحكاية دي بوضوح تام

{قال ياأيها الملأ أيكم يأتيني بعرشها قبل أن يأتوني مسلمين* قال عِفريتٌ من الجن أنا آتيك به قبل أن تقوم من مقامك وإني عليه لقوي أمين* قال الذي عنده علم من الكتاب أنا آتيك به قبل أن يرتد إليك طرفُك} 38-39-40

ايه ده ده كان سيدنا سليمان عنده خوارق وكان بيقدر يشوف ويستوعب اللي احنا مش بنقدر نشوفه ونستوعبه

معلش اقرى الايات كمان مره..

سيدنا سليمان كان ملك لجميع الكائنات الحية..
وده اثبات ان الجن او العفاريت عايشين معانا في نفس الكون بتاعنا بس احنا مش بنشوفهم وده زي ما قولنا التردد والطول الموجي بيفرق

ايه اثبات كمان ان احنا مش بنستوعب غير قدر محدد او الاشياء الظاهره لينا فقط
ان العفريت من الجن بيقدر يعمل حاجات البشر مش بيقدر يعملها..وده الدليل ان الانسان ذات قدرات محدودة ولا يستوعب غير الظواهر

الايات دي بتوضح ايه كمان
ان رجل من جلساء سليمان، والذي قال "أنا آتيك به قبل أن يرتد إليك طرفك" والوارد في كتب التفسير أنه رجل ـ أي إنسان ـ وقد أتى بعرش بلقيس في حينه، نظراً لبعد المسافة التي قام هذا الرجل بنقل العرش منها (بين فلسطين واليمن) والزمن القياسي الذي قطعه للقيام بذلك "قبل أن يرتد إليك طرفك" فقد قطع المسافة في اللازمن..!!! ايه ده يعني الراجل ده كان خارق للشيء الطبيعي
معنى كده ان كمان علم الخوارق موجود..يعنى محدش يقدر ينكره


ومن هنا ما أثبته علم نفس الخوارق من الحقائق ممكن يجعلنا نوسع من مداركنا واستعابنا ونخلينا نتعرف نوع من المعرفه الجديد

- فقد ثبت ان بإمكان العقل ان يتصل بعقل آخر دون واسطة مادية
- وان بامكان العقل الاتصال بموجودات او مخلوقات أخرى يشعر بها دون واسطة
- وان بامكان العقل تخطي المسافات الشاسعة
- وان بامكانه التأثير في حركة الجماد والحيوان ..


طيب اقولك على حاجه..

مش احيانا حد من اصحابك او اهلك او ايا كان يتصل عليك..او ما ترد عليه تقوله:" والله لسه كنت هرفع السماعه اتصل عليك دلوقت"
فالطرف التاني يرد يقولك"القلوب عند بعضيها..!!!"
ومع ذلك انت جواك بتعتبرها مجرد صدفه مش اكتر ولا اقل!!!

طيب عارف بقى لما تقول ايه"انا قلبي مقبوض حاجه هتحصل انهارده".."قلبي اكلني على فلان انا مش مطمن" وتلاقي فعلا حاجه حصلت
مع انها بتتكرر كل كتير جدا في حياة كل حد فينا ولكننا ديما بنعتبرها مجرد صدفه!!!

طيب هو في اساسا صدف في حياة كل مافيها مقدر ومسخر..؟!


علم ما وراء الطبيعة او ما وراء النفس علم بيدرس في الجامعات والمعاهد والكليات الامريكيه والاوربيه والروسية..من القرن التاسع عشر

وطلما قولنا من القرن التاسع عشر استحاله مش نجيب سيرة جوزيف ستالين واهتمامه بالتخاطر في وقت ما كان زعيم الاتحاد السوفيتي

اوعى تفتكروا ان العلم ده غريب علينا كعرب..انتوا ناسيين ابن القيم وكتابه "الروح"


وكمان من اهم الادباء العرب..اللي اهتموا بعلم ماوراء الطبيعه
كان د.أحمد خالد توفيق اللي اصدر سلسلة ماوراء الطبيعه في رويات مصرية للجيب وللي في اغلب الرويات كان بيحكي عن ظواهر خارقه حقيقية
وكان بيقول ازاي ظهرت وشوية معلومات عنها في ايطار روايه رعب
ومن اشهرها اسطورة المستذئبون ومصاص الدماء

وكمان مش هنقدر ننسى د.نبيل فاروق واهتمامه بالاشباح وعلم الاشباح وكمان مقالاته ودراساته في غموض ولعنة الفراعنة

واما من الادباء الغرب اللي اشتهر في الرعب وما وراء الطبيعه كانوا
ستيفن كينج و ريتشارد ماثيسون ودين كونتز و إدجار الآن بو


الخلاصه:

-علم ما وراء الطبيعة علم موجود في حياتنا لا يمكن انكاره لان انكاره بيعني انكار حاجات كتير من دينا و اولهم الروح والجن والشياطين
وده اللي ادى للالحاد كمان والعياذ بالله لانهم كمان انكروا الذات الالهية
لان عقولهم محدودة مش قادرة تستوعب غير المادة الملموسة فقط..!!

- الانسان يتكون من جزئين: المادة والروح
المادة..وهي الحاجات الملموسه اللي بنقدر نتعامل معاها ونتعايش بيها زي الجسد
الروح..وهي شيء غير ملموس وصعب التحكم فيه ولكن يمكن تغذيته بالايمان والطاعات والعلم والعمل


اتمنى إنشاء قسم يختص بعلوم ما وراء الطبيعه..يكون نواه تجعل عقولنا تتفتح اكتر ونتعمق في علم الخوارق
او الغموض

وتأكد ان هذا العلم لا يعارض الدين ولكن لا ننكر انه في اشياء بتخالف الدين ومافيش مانع نجبها ونناقشها ونثبت انها غلط وضعيفه للكل

واتمنى اني اكون قدرت اغير مفهومكم عن ما وارء الطبيعه واللي بتختلف تماما عن الاساطير والخرفات

"يخلق ما لا تعلمون"
"و ما أوتيتم من العلم إلا قليلا"


أختكم \ أحلى بنوتة

مخرج
{
اترك لعقلك العنان..لاتحبسه في قفص الا استيعاب الا لكل ما هو ملموس
رب أعوذبك من همزات الشياطين
وأعوذ بك رب أن يحضرون
}


ملحوظه :
الموضوع..بقلمي اعتمدت فيه على عدت مصادر وحاولت انه اكتبه ليكم بطريقه سهله على الكل
لانه اساسا بيعتمد على علم الفييزياء


ومن المصادر اللي اهتميت بيها وجبت منها كتير من اللي كتبته
كتاب حافة العلم..لريتشارد موريس
دراسه من موقع الفيزياء..موقع فيزيائي متخصص<<<وده كان ملخص كتير من كتاب حافة العلم

ملحوظه: الموضوع ده كتبته في منتدى تاني من فتره وحابيت اشاركم بيه
واللي حابب ينقله مش في اي مشاكل خالص بس ياريت ربنا يكرمكم مع ذكر المصدر
وشكرا ليكم